14 Magamaridabá würi to maríeitu luma amu wügüri.

10 —Anhein adüga gürigia agabarahani tuma lúmari wügüri líledi, lasiadirúba lun lounwen dandu ligía kei würi to úmaboun ladüga agabarahani.

20 —Marounrabá tuma lúmari amu gürigia, magamaridunbounme luéi bawiyedun lau katei ligía.

32 Ibidiouguati hau gürigia ha ádaragubaña houngua

tumoun würi maríeitu!

Ha adügütiña katei le, hagünrinchaguña houngua!

32 Ibidiouguati hau gürigia ha ádaragubaña houngua

tumoun würi maríeitu!

Ha adügütiña katei le, hagünrinchaguña houngua!

33 Háfaguba buleseiti luma anabawaguni,

ani úabei ni kata lun lagidaruni lǘnabun hanügǘn.

34 Ladüga wügüri emeiditi, ítara liña kei watu gemeti,

úati feruduna lan lidan lidaani láguyugüdün wuribani.

35 Máhati lun fáyeiti ni ka úmagiñe,

magalumarun ligía ni anhein ichugúa saragu idewesei lun.

27 Ha íchugutiña watu gemeti haniguagu,

táguduba hadaüragun.

28 Ha éibugutiña ligibuagu leñegura watu,

lachuraruba hagudi.

29 Ha arumugutiña tuma würi maríeitu

meredebaña mabeichúnga.

27 «Aganbaadün luagu ariñawagúa lan meha: "Magabaraha humá". 28 Au nariñahare hun luagu furumiñeguarügü lan le awamadirutu aban würi, agabarahaali tuma tidan lanigi.

32 Au nariñahare hun luagu furumiñeguarügü lan wügüri ígirutu lúmari, anhein mama lubéi ladüga tagamaridun ligibuagun, aba taganóun luma amu wügüri, adügagüda lumutu furumiñeti wügüri agabarahani. Le giñe agamaridutu würi ígiraguaaru ladügüña giñe agabarahani.

19 ladüga tídangiñe anigi láfurida saminaü wuribati, áfarahani, agabarahani, agamariduni mamarieidunga, íweru, iyeeni luma lanabúniwa Bungiu.

11 aba lariñagun Hesusu houn:

—Le ígirutu lúmari, aba lagamaridun amu, lagabarahañoun. 12 Anhein giñe tígira würi túmari, aba tagamaridun amu, tagabarahañein giñe.

18 «Anhoun lígira aban wügüri lúmari, lun lagamaridun amu, ladügüñein figóu le gíribei agabarahani; le giñe agamariduti aban würi to ígiraguaaru, ladügüña giñe agabarahani.

4 aba hariñagun lun Hesusu:

—Máisturu, anuhán würi to, dariguawaaru agabarahei túmari. 5 Lariñahare lilurudun Moisesi hawagu hibe würiña ha, lun lachamurawagún dübü hawagu darí hóunwegun. Angia buguya ka bariñagubei?

6 Hariñagunbalin lira lun hóuchaguni, lun gébuna lan híchugun lidurun. Ábati lélemuchun Hesusu, aba labürühan múarugu lau lúhabu. 7 Keiti hasigirun álügüdaguei, aba lararamun, aba lariñagun houn:

—Furumiñeguarügü hídangiñe le mafigounti, chülei furumiñeti dübü tuagu.

8 Ábaya lélemuchun, aba lasigirun abürüha múarugu. 9 Dan haganbunbalin le lariñagubei, aba háfuridunga aban aban, hagumesera hámagiñe ha wéinamutimahañabaña. Hesusurügüñein eredera tuma würi tuguya. 10 Ábati larihin tuagun, aba lariñagun tun:

—Hagaña san buga ha íchugubaña bidurun? Úati san ni aban asiadirutibu?

11 Aba tariñagun lun:

—Uá, úati ni aban Nabureme.

Ábati lariñagun Hesusu tun:

—Ni au, masíadirun nubadibu; beiba, mafigouhadigiabá.]*

3 Ladüga semeeti tiyanun würi gagabarahatu,

ani fínuti tumalali sügǘ lau garaba,

4 gama lumoun lagumuhóun oura, gífiti sügǘ lau asiwaru

hamana ligía sügǘ tau aban eféin to biangua tamana.

5 Leibugúniwa tuma,

kéisigubeirügü leibugún lidoun óunweni;

tanügübadibu reiti lidoun umúahaü.

6 Meberesentu lau lémeri ibagari,

segeti tǘmate, ani ibidiñeti tun.

3 Ladüga semeeti tiyanun würi gagabarahatu,

ani fínuti tumalali sügǘ lau garaba,

4 gama lumoun lagumuhóun oura, gífiti sügǘ lau asiwaru

hamana ligía sügǘ tau aban eféin to biangua tamana.

5 Leibugúniwa tuma,

kéisigubeirügü leibugún lidoun óunweni;

tanügübadibu reiti lidoun umúahaü.

6 Meberesentu lau lémeri ibagari,

segeti tǘmate, ani ibidiñeti tun.

7 Ítara liña lubeiti niráü, aganbabána,

madireirabá luéi narufudahan.

8 Disebá tuéi würi gagabarahatu,

mayarafadabá lun tubenari tuban,

9 mederegerun báamugei bere houn amu,

ni birumudiri houn gürigia salufuritiña;

8 Disebá tuéi würi gagabarahatu,

mayarafadabá lun tubenari tuban,

9 mederegerun báamugei bere houn amu,

ni birumudiri houn gürigia salufuritiña;

10 manügün láamugei ni aban terencha birisin

lebegi báfaagun luma buadigimari,

11 luéi basakürihan

danme le lagumuchagun búgubu murusun murusun.

12 Bariñagame:

«Ka san meha uagu numaganbadinbei?

Kame san namahara lun eweridihani?

13 Máhatina meha naganbuniña numaisturungu,

metenitina houn ha meha arufudahabaña nun,

14 ítagaraü yebe nadariragun nungua

kei ni kata hagibugiñe sun gürigia!»

19 magadiñetu ani wende tugía kei aban usari.

Hóuburatabu lau tínsiñehabu.

Gundaaguagüdatabu lau tuenden.

20 Ka san uagu bádaragua bungua tumoun

würi gagabarahatu, niráü?

Ka uagu báguragua bungua tarünarugun?

18 Ánhabu ñüdün tuma túbiñoun,

kéigubeirügü bídiña lan lidoun óunweni.

19 Ha ebelurutiña tuma túbiñoun, magiribudúnhaña,

magiribudúndigiaaña éibugei lémeri ibagari.

14 Ítara liña tiyuma würi to agabarahatu túmari kei fusu huliliti

le ñeinhin lubéi hábürüha ha líñaragubaña Bungiu.

18 Anuraha humá lubeiti luéi ahoruhani. Furumiñeguarügü amu figóu le hadüga gürigia, bóugudi luéi hágubu ladüga damichi; ánhaña ha ederegeragutiña houngua lun ahoruhani, hadügüña figóu luagu hágubu guánarügü.

16 Anihán katei le nariñagubei hun: Abagarida humá kei labusenruni Sífiri, ítara luba michu humá gúnfuli lun layumahan ǘgürügü. 17 Ladüga múaradunti Sífiri luma layumahan ǘgürügü; múaradun ligía ǘgürügü luma layumahan Sífiri. Gáganiguati aban luma le aban; ligía lásiñarunbei hadügüni katei le habusenrubei yebe hadügün.

19 Ménrengunti larihíniwa katei lan burí katei le hadügübei ha afalarubalin layumahan ǘgürügü: Agabarahani, gámariguatiña hámagua mamarieidunga, adaaguatiña burí katei wíyeti; mabusigaritiña lau hasalufurin; 20 huduguatiña houn guáriua; abiñaraha hagía. Anihein iyereehabúni hadan, gáganiguaü, luma emeidini. Ménrengunti hagañidun; hawouguarügüñein haritagua súnwandan; fánreinguagüda hamuti adamurini. 21 Gimugatiña, gáfarahadi, gátadi, wéinamu heigin; adüga hagía amu burí katei lenege burí le. Nariñaguñein hun kei nariñaguni lubaramegiua luagu mebelurunbaña lan ha adügübalin katei le lidoun larúeihan Bungiu.

4 Inebelá maríei hun súngubei, lunti giñe hagunfulirun úmarigu hámagua lau úarani; lugundun laguseragüdübaña giñe Bungiu ha agamaridubaña mamarieidunga hama ha agabarahabaña.

3 Le labusenrúbei Bungiu, lun sándubadün lan; lun ua lan ni aban agamariduti mamarieidunga, 4 lun lasubudiruni kada aban ida luba lan lagumadiruni lúgubu guánarügü lidan sánduni luma inebesei, 5 mama lau luriban ayumahani kei hadügüni gürigia ha ibidiñehabúbaña lun Bungiu.

4 Gürigia múarantiña! Ibidiñeti san hun luagu anhein lan gamadagua hubéi luma ubóu, háganiñein lan Bungiu?

21 Rúhadina dan tun lun tasansiruni tigaburi, máhagiru tígiruni tahoruhan. 22,23 Ninarün hau luagu nábürügüdaaru lan gabanarugun, áfaragua náñame tirahüñü hama ha agabarahabaña tuma, nóunahaba asufuriruni hawagun, ánheingubeirügü hígira hadaaguni katei le burí tadaagubei; ítara luba tasubudiruni sun ligilisi luagu subudi nani leben aritaguni luma teben anigi; ábame nafayeiruni kada aban hídangiñe según le ladügübei.