1 Dan le lasubudirunbalin Marüdokéu sun le asuseredubei, aba laheiridagunu ladaüragun le ligarigu, aba ladaüragun daüguaü súsutu, aba líchugun baligi lábulugun, aba léibuguni uburugu agúaraheinei ligarigu. 2 Ítara liña lachülürün dagá tubenarin lani urúei palasiu, gama lumoun mebeluti ladüga máhawati lun lebelurúniwa ñeinhin tau daüguaü tibe to luáguboun. 3 Lidan giñe sun fulasu le ñeinhin lubéi lachülüra lugumadin luma iseri lilurudun urúei, ñeinñein óunwenbu idiheri hadan huríu, aba harufuduni hirun lau hayunarun, hayahun luma hamumehan, ani saragu hádangiñe aba harounrun lidan baligi, aba hadaüragun daüguaü súsutu.

4 Ábati lachülürün uganu tun Esütérü luagu Marüdokéu, hámagiñe würiña ha eseriwidubarun hama wügüriña ha óunigirubarun. Ábati tírudagun urúei Esütérü, aba tóunahan daüguaü lun Marüdokéu, lun lasansirunu daüguaü súsutu to buga luáguboun, gama lumoun máhati leresibirunu. 5 Ábati tagúarun Esütérü lun Atakü le úfisi hadan óunigirutiña lúbiñe urúei, aba tóunahani arihei Marüdokéu, lun lálügüdüni ka lan suserebei luma ka lan uagu ladügei katei le. 6 Aba lidin Atakü adimureha luma Marüdokéu lidan lubara ebegidinaü le tigibugiñebei lani urúei palasiu, 7 aba labahüdaguni Marüdokéu le ladügübei Amán lun, luagu sun pülata le füramase lubéi luagu líchugubei lan lidoun lirisin urúei lafayeiruahame háfarawagun sun huríu. 8 Deregeti giñe aban kopia lani lúrudu le luáguti hagumuchaguagüdüniwa huríu le asubudirawagüdübei uburugu Susa, lun líchugunu tun Esütérü, lun gayaraabei lan tasubudiruni sun katei. Ariñagati giñe lun lun lariñagun tun Esütérü, lun tadimurehan luma urúei, lun tebegirun lun, lun ladügüni liyaraati luagu hafulesein huríu.

9 Aba lagiribudun Atakü, aba labahüdaguni le lariñagubei Marüdokéu lun tun Esütérü. 10 Ábayati tóunahani Esütérü Atakü lumoun Marüdokéu lau óunabuni le: 11 «Sun ha eseriwidubaña lun urúei, hama sun ha aganóubaña lidan burí fulasu le lábugiñebei larúeihan, subudi hamuti luagu anihein lan aban lúrudu le asiadiruti eyeri o hiñaru lun óunweni ánhaña ebelura lidoun tibürürün palasiu lun harihini urúei anhein magúarun lubéi hawagu, ánheingubeirügü liñura urúei lubadun lánina agumadihani le láutibei golu luagun o tuagun lan gürigia tuguya, arufudei lugudemehabu, eferudunarei tibagari. Nuguya, darandi weyu guenlé lúmagiñe magúaragüdün lan urúei nuagu».

12 Dan leresibirunbalin Marüdokéu tóunabun Esütérü 13 aba lóunahan ariñaga tun: «Maritaguabatia luagu ladüga lídanñadibu lan lani urúei palasiu, luagu buguyarügüba lan huríu esefurei bibagari 14 Ánhabu mariñagun ni kata guentó, liábinba hesefurun huríu siélugiñe, gama lumoun buguya hau sun liduheñu búguchi, hóunweguba. Máfuna lun besefuruniwa lídangiñe katei le bachülüra lun urúei ban!»

15 Ábati tóunahani Esütérü óunabuni le lun Marüdokéu: 16 «Beiba óundaraguabaña sun huríu ha Súsana lun hayunarun luagu nufulesein. Lun meigin hamá, matun hagíame ni kata luagu ǘrüwa weyu luma ǘrüwa áriebu. Nadügübei giñe hau sun ha eseriwidubaña nun, lárigiñeme, ábame nidin arihei urúei lau sun nadüraaguñein lanme lúrudu lau lira. Ánhana afarúa, áfara hamana».

17 Ábati lidin Marüdokéu, aba ladügüni sun le tubeibei Esütérü.