1 Lídanmeme weyu ligía, aba ledewehanu urúei Asueru luban Amán le hágani huríu tun urúei Esütérü. Aba larufudúniwa Marüdokéu lun urúei ladüga ariñagaaru lan buga Esütérü lun urúei Asueru luagu tiduhe lan Marüdokéu, aba liabin lumoun urúei. 2 Ábati ladügüni urúei Asueru Marüdokéu ábanme úfisi íñuguti, aba líchuguni bagü le buga lóuserubei Amán lun. Aba tíchuguni Esütérü lun ligía lan ahandilihei sun meha irisini le lánibei Amán. 3 Ábayati tadimurehan Esütérü luma urúei, aba tañuurun lugudina buin águiraü tágurugu, aba tayumuragun lun, lun madügǘn lan katei le yebe eledegua láalibei Amán lun ladügün houn huríu. 4 Aba línchuni urúei lubadun lánina agumadihani le láutibei golu tuagun aba tásaarun Esütérü. Aba tararamun ligibugiñe. 5 Tariñaga lun:

—Anhein buidu lubéi larihín lun urúei, ani afiñe ligía luagu richá lan le namuriahabei, ani anhein hínsiñe nubéi lun urúei le tímatimaati, óunaha humá urúei aban lúrudu mebegigüdoun gárada to lóunahaboun Amán lau dimurei lun hagumuchawaguagüdün huríu ha lídanbaña fulasu le lábugiñebei harúeihan. 6 Ladüga ida luba nawanduni lamiselu le madiseelibei lun lábürühan hawagun nupaisanun, luma lun hagumuchawaguagüdün niduheñu?

7 Ábati lóunabunu urúei Asueru Esütérü luma Marüdokéu le huríu:

—Ru naaru luban Amán tun Esütérü, ligía, tigiwa ladüga labusenrun láfaraguniña huríu. 8 Guentó, níchuguñein ubafu hun, lun habürühan lau niri, le habusenrun luagu hafulesein huríu, ábame haseinirunu gárada lau liseyun urúei!

(Aban gárada to laseinirun urúei, tánpüwa tuguya lau lubagün, siñabei mebegigüdawa tan.)

9 Abati haguarúniwa abürühatiña ha lani urúei lau lufuresen. Weyu ligía, wein-ǘrüwa lidan ǘrüwa hati, lememe gíribei Siwán, sun le lariñagubei Marüdokéu, bürüwati ounahóua houn huríu, houn gumadimatiña, dandu ha lídanbaña lirahüñü fulasu keisi houn ha lídanbaña fulasu wéinamuti ha lídanbaña san-wein-sedü fulasu le lúmagiñebei India darí Etiopía, lidan ligaburi habürühan luma luwuyeri hererun lílana kada fulasu. Abürühóuati giñe houn huríu lidan ligaburi habürühan luma hererun. 10 Aba taseinirun gárada burí lidan liri urúei Asueru, lárigiñe tánpüwa tugía lau liseyun urúei, aba tounahóun hama íchaahatiña gárada hagibuagu gabayu ha furesetiña hádangiñe lilügüniña urúei. 11 Lariñahare tidan gárada burí tuguya luagu ru lan urúei lúrudu houn huríu furumiñeguarügü fulasu le ñein lumuti haganawa, lun hóundaragun lun hageindagun luagu habagari, lun háfarahan, hagünrinchagun, hagumuchaguagüdün, luma lun herederun lau hámati furumiñeguarügü ha ageindagutiña hama, minebenga ni würiña ni irahüñü houn. 12 Sunti buga katei le, lunti ladügǘn lidan ábanmeme weyu lidan sun fulasu le lábugiñebei lagumadihan urúei Asueru; weyu ligía le ídanba lubéi lasusereda sun katei ligía, tareisi lidan duusu hati lememe gíribei Adarü. 13 Aban kopia tídangiñe gárada tugía mosu buga taburuchagun lidan sun fulasu keisi lúrudu. Lun gayara lan aranseñu hamá huríu weyu ligía lau háguyugüdüni le habusenrun háganiñu hadügün houn. 14 Lau lilurudun urúei, aba háfuridun anaahatiña ñunsu lau lufuresen hau gabayu ha hádangiñe lilügüniña, subudigüdawati giñe ñunsu le uburugu Susa.

15 Aba láfuridun Marüdokéu lúbiñegiñe urúei tau aban daüguaü to arufuduti keisi agumadihati lidan arúeihani, díngutu luma haruti, aban óunwenbu ridi golu tuma aban belu lautu linu luma funafunaguti. Sun lílana uburugu Susa, aba hagúarahan lau ugundani, 16 Sun katei, larugounga, ugundani luma inebesei houn huríu. 17 Aba habuinchun huríu lau ugundani lidan sun fulasu le ñein lubéi lachülüra ñunsu ligía, aba hadaagun fedu. Ñéinñanu giñe saragu lílana fulasu ha mámabaña huríu, aba hariñagun luagu huríu hamá ladüga hanufudedun hawéi huríu.