1 Átiri dan lárigiñe, aba liñuruni urúei Asueru lubara Amán, le liráü Amedáta, ladügawagun Agagü, aba líchuguni lábutime gumadi lidan ubóu ligía. 2 Sun ha eseriwidubaña lun urúei palasiurugu, ábaha háhuduragun aba hélemuchun dan le lásügürün Amán o dan le ligibugiñe hamá, ladüga ítara liña lan lariñaguni urúei lun ladügǘn; gama lumoun máhati Marüdokéu lagunfulirun luma gumadi le.

3 Ábati hálügüdüni lánigu urúei Marüdokéu ka lan uagu magunfulirun lubéi lau lilurudun urúei. 4 Sagü weyu hálügüdüni luaguméme katei le, gama lumoun madügünti gasu hau. Ábati houdin abahüdaguei lun Amán, lun harihin anhein lágüdahabei lubéi Marüdokéu lererun, ladüga ariñagaali buga houn luagu huríu lan ligía. 5 Dan le larihinbei Amán luagu máhuduragun lan Marüdokéu, mélemuchun ligía dan le lásügürün, aba lagañidun; 6 gama lumoun kei ariñawagúaali lan buga lun ka lan lirasanbei Marüdokéu, memeniti lun, lun Marüdokéurügü lan labeicha, aba lagumeserun asaminara lun lagumuchaguagüdüniña sun huríu ha lábugiñebaña larúeihan Asueru.

7 Furumiñeti hati lidan irumu, lememe gíribei lihatiri Nisán, lidan liduusun lirumudiri larúeihan Asueru, aba harifahan ligibugiñe Amán lun liridún weyu luma hati le ñeinba lubéi ladügei Amán le haritagua láalibei, aba liridún tareisi lidan duusu hati, ligiaméme hati le unbei hariñaga Adarü. 8 Ábati lariñagun Amán lun urúei Asueru:

—Laganagua sun fulasu le lábugiñebei harúeihan urúei, anihein aban lídangiñe lúnguañein; amu lúrudu ñeinbei luéi líbiri burí fulasu, ani magunfulirun hamuti hilurudun. Mabuidunti hun urúei lun lasigirun néchani ligía lábugiñe harúeihan. 9 Anhein lubeiti buidu lubéi larihín hun urúei, adügüwalá aban lúrudu lun hagumuchaguagüdüniwa gürigia hagía, au luagu nufanran nederegeruba sedü-san-wein-sisi-milu líburu pülata houn arihitiña lau liseinsuna arúeihani.

10 Ábati laragachuni urúei lubagün, aba líchuguni lun Amán, le hágani huríu, 11 lariñaga lun: Adügabéi le babusenrun hau gürigia hagía.

—Berederame lau harisin.

12 Weyu tareisi lidan furumiñeti hati lidan irumu, aba lagúarun hawagu wügüriña ha abürühabaña lun urúei, aba habürühani lilurudun Amán houn lúrudugu ha lídanbaña kada fulasu luma houn gumadimatiña lidan kada néchani. Bürüwati burí lúrudu ligía lidan ligaburi habürühan luma hererun kada néchani, séiniwa lau liri urúei Asueru, tánpüwa tuguya lau lubagün urúei, 13 aba tounahóun lidoun sun fulasu le lábugiñebei larúeihan Asueru. Rúati lúrudu tidan gárada tuguya, lun háfarawaguniwa sun huríu lidan aban weyu, wéinamuhaña ñǘbürigiña, würiña wügüriña, ábame lanügǘn sun hamegen. Wéyubati tareisi lidan duusu hati lememe unbei hariñaga Adarü lasusereda katei le. 14 Aba lasubudiragüdüniwa abürüdǘti ligía keisi aban lúrudu lidan sun fulasu, lun aranseñu hamá lubá weyu ligía. 15 Aba háfuridun anaahatiña gárada lau lufuresen lau lilurudun urúei, aba tasubudiragüdüniwa gárada tugía lidan sun uburugu Susa. Sunti aniha lan urúei luma Amán ñurulu ata diwéin, aniha saragu idiheri hawagu lílana uburugu Susa.