1 Aba lidin urúei luma Amán lidoun adineruni, 2 lidan giñe libiaman weyu ligía, ariñagati giñe urúei tun Esütérü lidan adineruni:

—Amuriahabéi le babusenrun numa, níchugubei bun, íbini anhein bamuriaha lamidan le númati.

3 Ábati tóunabuni Esütérü:

—Anhein hínsiñe nubéi hun urúei, ani anhein buidu lubéi larihín hun, lérügüñein namuriahabei lun hesefuruni nibagari luma habagari nupaisanun; 4 ladüga dandu nuguya kei nupaisanungu, siadi láadiwa aban eyeri lun wáfarawaguniwa darí wagumuchagun, lun hamuga walugurún kei idamuni mariñagunbádina yebe ni kata, ladüga ítara madügünti hamuga ágani saragu wuribati luagu le húmati urúei.

5 Ábati lálügüdahan Asueru:

—Katei ani hagéi le aritagubei ladügün óunwenbu wuribani?

6 —Ágani, ani le kóntürabei anihán ya, lagübüri Amán! —liña tóunabun Esütérü.

Dan laganbunbalin Amán le tariñagubei Esütérü, aba lerederun deregüdagu lau anufudei ligibugiñe urúei Asueru tuma urúei Esütérü. 7 Aba lásaarun Asueru buin lau igañi, aba láfuridun tídangiñe rumu to ñein lubéi adineruni, aba lidin lidoun tufulurin-agei palasiu. Ánheinti Amán, líchugunbei fe luagu lasiadiraali lan urúei lun lounwen, aba lerederun múnada lun layumuragun tun urúei Esütérü lun tesefuruni libagari. 8,9 Dan le lagiribudunbei urúei fuluri-ágeirugugiñe, aba lebelurun lidoun rumu le ñein lubéi adineruni, aba larihini Amán hudugu lubadu haláü le ídanbei tabalacha Esütérü, aba lagúaragun:

—Busentibu giñe beferidiragüdüni tinebese urúei Esütérü nigibugiñe ya núbiñe guánarügü? Kei lásurun lariñaguni urúei dimurei le, aba hayabin fiu úfisigu hádangiñe ha óunigirubalin urúei, aba hadouragun lau ligibu Amán. Aba lariñagun aban hádangiñe le gíribei Arüboná: Anihein aban átigiragülei aranseli lúbiñe Amán, kei burí wein-bián méturu luagu liñun, ladügagüdün lubá yebe Marüdokéu, wügüri le esefurubalin libagari urúei.

Aba líchugun urúei lúrudu:

—Tigí huméi Amán luagu!

10 Ítara liña látigirun Amán luaguméme átigiragülei le yebe laranserubei lubá Marüdokéu. Lau lira, aba lagalumadun ligañi urúei.