1 Weyu tareisi lidan duusu hati, le hati le unbei hariñaga Adarü, ligía weyu le iridúbei lun lagunfulirun lererun urúei. Ligía giñe yebe weyu le hagurabubei háganiñu huríu lun habudaguniña; gama lumoun aba lagarabaagun katei, huríu abudagubaliña háganiñu. 2 Aba hóundaragun huríu lidan sun fulasu le ñein lubéi haganawa le lábugiñebei larúeihan urúei Asueru, lun hageindagun hama ha buga busenbaña wuribati houn úati ni aban agagibudaguti hama, ladüga beluha anufudei houn sun lílana fulasu. 3 Sun agumadihatiña ha fulasurugubaña, gumadimatiña lidan lirahüñü fulasu, hama sun ha íñubaña ubara lidan gumadi, hámagiñeñanu huríu, le hanufude luéi Marüdokéu, 4 ladüga ábanhali lan buga gürigia inebeti tidan luban urúei, ani aganbahóuaali luagu lidan sun fulasu, ani sagü weyu gabafutima lan. 5 Aba hagumuchun huríu hau háganiñu tau eféin; áfaragua hamutiña hilagubei, adüga haméi le habusenrun hau. 6 Réitirügü uburugu Susa, áfaratiña seingü-san wügüriña; 7 áfara hamuti giñe Parüsandáta, Dalüfón, Asüpáta, 8 Porata, Adalíasi Aridáta, 9 Parümásüta, Arisái, Aridái luma Waisata, 10 Sun ha, diisi lirahüñü Amán le meha hágani huríu; gama lumoun maguuruntiña luagu hámati.

11 Weyuméme ligía, dan le lasubudirunbalin urúei átiriñanu lan óunwegutiña uburugu Susa, 12 aba lariñagun tun urúei Esütérü:

—Áfaraaña huríu seingü-san wügüriña hama diisi lirahüñü Amán uburugu Susa. Ka funa san amu katei hadügübei lidan líbiri fulasu le lábugiñebei narúeihan? Ariñagabéi nun ka lan amu katei babusenrubei, níchugubei bun!

13 Tóunabeiti Esütérü:

—Anhein buidu lubéi larihín hun urúei, lun higirún huríu ha Súsabaña lun hadügüni lememe hadügübei kei lariñaguni lúrudu. Ábame ladibirawagüdün hágubu diisi lirahüñü Amán luagu átigiragülei.

14 Aba lariñagun urúei lun ladügǘn ítara. Aba lasubudirawagüdün lúrudu uburugu Susa, aba ladibirawagüdün hágubu diisi lirahüñü Amán.

15 Ábaya hóundaragun huríu ha aganóubaña Susa weyu katorusu lidan hati le gíribei Adarü, ábaya háfarun ǘrüwa-san wügüriña ñein; gama lumoun maguuruntiña luagu hamegen. 16,17 Aba hóundaragun huríu ha burí aganóubaña lidan amu fulasu weyu tareisi lídanmeme hati ligía lun hageindagun haweigiñegua hama háganiñu; aba háfarun ǘrüwa-wein-keinsi milu hádangiñe, gama lumoun maguuruntiña luagu hamegen. Aba hemeraagun weyu katorusu, aba hefeduhani lau adineruni luma ugundani.

18 Kei óundaragua hamá huríu ha Súsabaña weyu tareisi luma katorusu, aba hemeraagun weyu keinsi, aba giñe hefeduhani lau adineruni luma ugundani. 19 Ánhañati huríu ha aganóubaña lidan lirahüñü fulasu le mabarieirúnti efeduhatiña weyu katorusu lidan hati le gíribei Adarü lau ugundani luma híchaahan edewehani hámagua.

20 Aba labürüdüni Marüdokéu katei le, aba lóunahan gárada houn sun huríu ha aganóubaña lidan burí fulasu le lábugiñebei larúeihan urúei Asueru, dandu le burí yarafabei kei le dísebei, 21 rúina lúrudu houn lun hefeduhani weyu katorusu luma keinsi lidan hati le gíribei Adarü sagü irumu, 22 weyu burí le háfaragunbaliña huríu háganiñu, hati giñe le ídanbei lasansiragua íruni luma agúarahani lau igarigu lun ugundanime luma fedu. Lunti lefeduhóun dan ligía lau adineruni luma ugundani, edewegua hagíame idewesei hámagua, íderagua hamañame gudemetiña. 23 Aba hanügüni huríu katei le hagaburime, luma le labürühabei Marüdokéu houn. 24 Ladüga haritaguaali yebe Amán, le hágani sun huríu, lagumuchaguagüdüniña lau larifahani habagari lun láfaraguniña hilagubei luma lun lagünrinchaguniña; 25 gama lumoun dan le tídinbei Esütérü lumoun urúei, aba líchugun urúei dimurei bürüwañu, lun lábürühan sun wuribani le yebe laritagubei Amán ladügün hau huríu, lun luagun lan Amán lábürüha hama lirahüñü. Ítara liña ladibirawagüdün Amán hama lirahüñü luagu átigiragülei. 26 Ligía lébubei laguarún weyu burí ligía Purimü.

Ítara liña lubeiti, ítara kei tariñaguni ligaradan Marüdokéu, lumoun le harihubei luma le habagaridubei, 27 aba hanügüni katei le hagaburime. Hau sun hálawagu luma houn sun ha áyeihabaliña huríu: Lun hefeduhani weyu burí le sagü irumu lidan luéyuri keisi buga larufudahóun houn; 28 lun giñe laritawagún bián weyu le efeduhóubei hadan sun hadügawagun lidan kada külán, lidan kada liraüraü fulasu lidan kada uburugu lun meferidirunbei lan sun haritaguagüle huríu ni hálawagu. 29 Aba tabürühan urúei Esütérü, to liráü Abiaili, luma Marüdokéu le huríu aban tibiaman gárada luágutu fedu le Purimü lun tachoururuniwa to furumiñetu, 30 aba hóunahanu houn sun huríu ha lídanbaña san-wein-sedü fulasu le lábugiñebei larúeihan urúei Asueru, lau dimurei le lánina umadaguaü le giñe harumati, 31 le ñein lubéi híchiga lúrudu lun lefeduhóun fedu le Purimü lidan lidaani, ítara kei tariñaguni urúei Esütérü luma Marüdokéu houn guánarügü luma houn hálawagu. Bürüwayati giñe ámuya lúrudu lanwoun le luáguti ayunaruni luma igarigu, 32 aba lachoururagüdüni tilurudun Esütérü lúrudu le lunbei lasigirun lun lefeduhóun Purimü. Sun katei le, bürüwati tidan aban líburu.