1 Átiri dan lárigiñe, dan le gálumaali urúei Asueru, aba laritagun tuagu Básüti, luagu katei le buga tadügübei luma lúrudu le áfuridubei tuagu. 2 Ábati hariñagun lánigu urúei lun:

—Lunti háluahoun würiña nibureintiña ha mámarigiña ha magadiñetiña lun urúei. 3 Rula urúei wügüriña lidan sun fulasu le lábugiñebei larúeihan lun hanügǘn würiña hagía tidoun hani würiña palasiu to uburuguboun Susa, ábame hichugún lábugiñoun laríaahan Egái, wügüri le lemenigira urúei, le hóuniri würiña, ábame laransehaniña Egái lun wende hamá, 4 tómeti hínsiñetimatu lun urúei hádangiñe, ábame tuguya lan urúei teweñegua Básüti:

Gúndaati urúei lau saminaü le, aba ladügǘn ítara.

5 Ñeinñein aban huríu aganóuti ñein Susa gíriti Marüdokéu, liráü Hairü, ladügawagun Simí luma Kisü, lídangiñe lani Benhamín türibu. 6 Ligía aban hádangiñe saragu ha meha lasagarubaña Nabukodonosoru urúei Babilóniana Herusaléngiñe úara luma Hekoníasi le lurúeite Hudá. 7 Ñeinñoun aban lisaani liyaurite Marüdokéu méteñuharu, aba lanügünu kei liráü dan le hóunwegunbei tagübürigu. Adasá tíribei o Esütérü, magadiñetu. 8 Lídanbei taburuchaguagüdüniwa ligaradan urúei gíbetiña würiña irahüñü óundaraguañu tidan luban urúei Susa ha ichugúbaña lábugiñe laríaahan Egái, ñeinñoun Esütérü hadan. 9 Buíduti léiguadun tumene Esütérü lun Egái aba tagañeiruni lubuidun lóuserunu. Ábati laransehanu Egái lúntima wende tan, aba líchuguni lubuidun-agei éigini tun: Aba líchugun sedü hádangiñe habuidun-agei würiña ha eseriwidubaña palasiurugu lun hetenirun tun, aba lásügüragüdüniña tuma tidoun tubuidun-agei rumu tidan hani würiña palasiu.

10 Mariñaguntu Esütérü ni kata libügürü tirasan ni tiduheñu, ladüga ariñagaali buga Marüdokéu tun lun madügün tani. 11 Ábatiha léibugun Marüdokéu sagü weyu ñein lidan tibürürün hani würiña palasiu, lun lasubudiruni anhein magadiñe tubéi Esütérü luma ida liña lan hóuserunu.

12 Dúusuñein hati hau sun würiña irahüñü hagía, aransehóua lun magadiñe hamá. Furumiñeti sisi hati, aba háhurudagun houngua lau lagüle mira, le aban sisi hati, lau ibiñein luma kürema le hayusurubei würiña. Lárigiñe, kada aban hádangiñe, ábaha tanügǘniwa lun urúei Asueru, sagü lachülürün tidaani, 13 ani rúatiha üma houn lun hóunahan áluga furumiñeguarügü katei le habusenrun tídangiñe hani würiña palasiu lun tidoun lani urúei palasiu. 14 Ábatiha houdin tidoun lani urúei palasiu guñoun, larugan binaafin aba hásügürün tidoun amu rumu tidan hani würiña palasiu to lábugiñeboun laríaahan Saasügási, wügüri lemenigira urúei, le giñe hóuniri lubúaligu urúei. Lárigiñe lira, miábinhañaha ligibugiñe urúei, ánheingubeirügü adarira autu lagundaara hádangiñe, ligíaha lóunahan anügoun.

15 Dan le latokarunbei tun Esütérü, to liráü Abiaili le liyaurite Marüdokéu lun tiabin lumoun urúei, lérügüñein lariñagubei Egái wügüri lemenigira urúei le hóuniri würiña tun lun tanügüni, ligíarügüñein tanüga. Lúmounbeiti dan le, gañei taali Esütérü lubuidun haritagun sun ha yarafabaña tun. 16 Aba tanügǘn Esütérü ligibugiñoun urúei lidan lidiisin hati, le giñe gíribei Téwetü, lidan lisedün lirumudiri larúeihan. 17 Aba tínsiñedun Esütérü lun Asueru lidan aban igaburi le masuseredunñahagili lun tuagu ni aban würi, aba tagañeiruni línsiñehabu, aba fuleseilanu sügǘ hau híbiri würiña irahüñü ha rédeihañabaña luma, aba líchuguni tiridin urúei tábulugu, aba líchugunu urúeime teweñegua Básüti. 18 Lárigiñe aba líchugun aban óunwenbu adineruni lidan tiri Esütérü, aba lagunbirahaniña sun lánigu, hama ha ídehabaña lidan larúeihan, aba lǘnabudagüdüni seinsu le hafayeihabei lílana fulasu lun, aba lafanreinhan saragu edewehani, keisi lareini aban urúei.

19 Lidan burí weyu le hanaahóuniwa würiña tidoun amu burí rumu tidan hani würiña palasiu, ábanhali buga hádangiñe lani urúei úfisigu Marüdokéu. 20 Keiti le aubei lariñagei Marüdokéu tun Esütérü, mariñaguntu ni ka un luagu huríu tan, mariñagun tuguya ni kata hawagu tiduheñu, lubaragiñe lira aba tasigirun agunfulirei arufudahani le líchugubei Marüdokéu tun kei danbei ligíagili óunigiroun. 21 Sun aniha lan Marüdokéu ñurulu tubenari lani urúei palasiu, aba laganbuni hadimurehan Bigütán luma Teresi bián úfisigu óunigirutiña tubenari lani urúei palasiu. Biángubei hagía, lau igañi, heledegua lun háfaruni urúei hilagubei. 22 Dan lasubudirunbalin Marüdokéu luáguti katei le, aba labahüdaguni tun urúei Esütérü, aba tariñagun Esütérü lun urúei Asueru anihán lan buga lóunahan Marüdokéu ariñaga lun. 23 Aba lachiahóun libügürü katei le. Dan ladarirún luagu inarüni lan, aba hatigirúniwa bián úfisigu hagía, aba labürüdün katei le ligibugiñe urúei tidan líburu to ñein lubéi labürühóua sun asusereduti lidan fulasu.