1 Anihán le asuseredubei lidan meha lidaani larúeihan Asueru; san-wein-sédüñein meha fulasu lábugiñe larúeihan, lúmagiñe Índiagiñe dagá Etiopía, 2 lidan uburugu le gíribei Susa larúeiha.

3 Lidan lǘrüwan irumu lau larúeihan urúei Asueru, aba ladügagüdün aban óunwenbu fedu houn sun ha lánigubaña hama ha ídehabaña lidan larúeihan, hábutigu milidaru Pérüsiana luma Médiana, luma houn gumadimatiña hama burí lábutigu fulasu, 4 lun larufuduni lirisin luma luéirigun larúeihan houn luma lueirin lubafu. Lamidanñein irumu ladurarun fedu ligía, 5 lárigiñe fedu ligía, ábaya ladügagüdün urúei ábaya fedu lidan tibürürün luban, sédüñein weyu ladurarun. Sun ha aganóubaña uburugu Susa dandu ha íñugutimabaña kei ha gudemebaña, agunbirahóuatiña. 6 Lau dübü wéndeti ladügǘwa bürürü, anuhein korutína harutu tuma díngutu, dahiñuburitiña luagu aban gúrudu linu funafunaguti, le ínchawaguati labadinaguagiñe fiu bángüli lauti pülata, aba tagürǘniwa luagu burí wagabu le adügǘti lau márümolu. Ñeinñein giñe burí haláü lauti golu luma pülata, liabin turageirugu muna múarugu, wéndegüdawati lau burí dübü fínuti, nákarü luma márümolu haruti luma wuriti. 7 Lidan burí weru lauti golu le ámuñegueinarügüti lesetirun luáriuagua leseriwihóua uniñein, ñéinñeinti saragu uniñein keisi lúbiñe aban urúei. 8 Lau sun lira, rúhali buga urúei dimurei houn hábutigu eseriwihatiña lun mafosurúniwa lan ni aban lun latun, lun kada lan agunbirahóuti lun látuni le labusenrun. 9 Rutu giñe urúei Básüti aban adineruni houn hámarigu amisurahóutiña tidan luban urúei Asueru.

10 Luagu lisedün weyu lau fedu, wéiriti lugundan urúei tadüga diwéin to látuboun, aba lóunahani Meumán, Bisütá, Arüboná, Bigütá, Abagütá, Setarü luma Karükási, sedü wügüriña ha uágutiña lemenigida, 11 lun hanügünu urúei Básüti ligibugiñoun lau tiridin le liridina tarúeihan, lun gayara lan haríaguni lílana fulasu hama gürigia wéirigutiña tumagadiñen, ladüga magadiñetu le tímatimaati. 12 Gama lumoun máhatu urúei Básüti tagunfulirun lau le lubeibei urúei, le uágubei lóunahaña luwügüriñanigu ha uágubaña lemenigida. Ábati lagañidun urúei saragu. Laganagua ligañi, 13 aba lálügüdüniña subudihabútiña lun lúrudu, kei ligía lubéi igaburibei, lun katei burí le lani urúei, lun gürigia lan ha subudihabútiña lun lúrudu luma irichaü ariha lau. 14 Hátima yarafabaña lun urúei hádangiñe: Karüsená, Setarü, Adümáta, Tárüsisi, Meresi, Marüsená luma Memukán, sedü wügüriña íñugutiña haganagua Pérüsiana hama Médiana ha hádanbaña eweridihatiña urúei, ani íñuti habara gumadimatiña hagía fulasurugu. 15 Aba lálügüdüniña urúei:

—Según lúrudu, ka lunbei ladügǘn tau urúei Básüti luéigiñe magunfulirun tan lau le nóunahabei ariñaga tun hama nóunagüle?

16 Ábati lóunabun Memukán hagibugiñe eweridihatiña urúeigu:

—Mámarügüñein urúei tanabaguagüda urúei Básüti, anabagua taaña sun agumadihatiña hama sun lílana fulasu le ñein lubéi larúeiha urúei Asueru. 17 Katei le, le tadügübei urúei, hasubudirubei sun würiña, ladügameti lira, ábame heferidiruni henebese hámarigu houn, hariñagame: "Óunahati urúei Asueru ougoun urúei Básüti, máhatu tidin lun". 18 Ha hámarigu wügüriña íñugutiña Pérüsia luma Media, lau hasubudiruni katei le tadügübei, hayanuhaba libügürü uguñe hama hámarigu, ani lanügüba katei le magundani luma iyereehabúni. 19 Anhein lubeiti buidu lubéi larihín lun urúei, rualá dimurei lúmagiñeti urúei, bürüwa ligíame kei lúrudu houn Pérüsiana hama Médiana, lun mabulieidúniwa lan: "Siñaalime tarufudagun urúei Básüti tungua ligibugiñe urúei". Lun giñe lichugúniwa tubara keisi urúei tun amu würi to gadüna tumuti. 20 Lunti lasubudiragüdüniwa katei le lidan sun fulasu le lábugiñebei laríaahan urúei, ítara luba inebe hamá hámarigu sun würiña houn, meberesenga kátañanu lan, anhein wügüriña lubéi íñugutiña odi ǘnabugu hamá.

21 Gúndaati urúei hábuina ha eweridihabaña lau le lisaminanbei Memukán, ábati ladügüni urúei le lubeibei. 22 Aba lóunahan gárada lidoun sun fulasu le lábugiñebei larúeihan, bürüwatu gárada tuguya lidan hererun luma ligaburi habürühan kada aban hádangiñe lílana fulasu le lábugiñebei larúeihan, lariñaga tidan lun híchuguni wügüriña hagumadin hábiñe luma lun hadimurehan kei le auti habusenra.