1 Kábagia afiñera luagu le ariñaga wamaalibei?

Ka un larufudei Aburemei lubafu?

2 Adügati Aburemei lun laweiridun lubúein

kei nadü ñǘraügili le ábunubalin lílagüle lidoun múa mábeiti,

mamagadiñeti, úati ni kata le garíawaseti luagu, mínsiñegu ligia;

3 meberesenwati lau, barǘ haméi gürigia kei ni kata.

Aban bugaha wügüri le buin umuti lau igarigu ligía,

le héchuti luagu asufuriruni.

Mabahüdün wamuti, barǘ wamuti kei gürigia le madünamati laríawagun,

barǘ wamuti kei ni kata.

4 Lau sun lira, barǘ lumuti wasandi luouguoun,

súfurilei wagarigu.

Barǘ wamuti kei béiwaali, kei buleseiwaali

ani kei nidiherigüda laali Bungiu.

5 Gama lumoun luéigiñe wamabuchahan lasufurira,

muliliwati luagu wafigoun;

barüti abeichúni le lasufurirubei darangilaü woun;

luéigiñe burí biti le libihubei wareidagua sungua luagu.

6 Chararatiwa sun wagía kei mudún,

ragǘ lumuti kada aban lémeri,

gama lumoun barǘ lumuti Bungiu sun wariban íchiga luagun.

7 Ouserúati wuriba, gama lumoun ígiraguagüdati lungua lau ǘnabuguni,

máwagachungubeiti ariñaga ni kata;

barǘ hamuti kei mudún ñǘraügili lun lafarún,

aba lerederun maniñu, mariñagunti ni kata,

kei aban mudún dan le lasarún.

8 Dáüwati, siádiwa ani barüwa ligía lun lafarún,

ani úati ariñaguti dimurei luéigiñe lufulesein;

úati ni aban ebereseruti kaba lan asusereda lun.

Hulá hamuti lidan giñe múa le,

aba háfaruni hilagubei luagu hafigoun numutuniña.

9 Bunawati hóubagiñe gürigia salufuritiña,

bunawati keisi rísitiña,

lau sun máfarahan lan ni aban wéiyaasu,

ua ligía iyeeni liyumulugu.

10 Ánhati Aburemei lasufuriragüdüni.

Ani kei deregegua lubéi lungua kei adagaragüdüni luagu figóu,

migifebei libagari, larihubaña ladügawagun;

lawanseragüdübei laransehan Aburemei.

11 Larihubei larugounga lárigiñe saragu idiheri,

ani ábame lagundaarun lau;

saragubaña lesefurun lubúein Aburemei,

ladüga lanügübei hariban luouguoun.

12 Ligía líchuguba lubéi Bungiu aban ubaraü lun hadan wéirigutiña,

gafanranbei lidan agañeiruni hama gabafutiña,

ladüga deregeguati lungua lun lounwen,

abahüdǘwa ligía hadan wuribatiña,

lau sun barǘ lani hafigoun saragu luougua

amuriaha ligía hawagu gafigountiña.