1 Fugiabu ageiraü le ñein lubéi hahunha íñenaü,

ageiraü le yagürounmémebei luéi lidunari Etiopía,

2 le óunahabaliña lóunagülegu luéigiñe Nilu,

áfayaheina dúnarugu tidan ugunei lautu maburu!

Heiba furese óunagüleigu,

houn gürigia gágubutiña ha mirí tura

houn néchanigu ha hanufudewati hawéi lidan sun fulasu,

gürigia héretiña, barügua houngua ha aganóubaña lidan aban fulasu

le ñein lumuti saragu duna éibaaguati.

3 Sun huguya le lílana ubóu,

harihubei seini luagu wübü,

aganba humeime danme línwinrun fidu.

4 Lariñahare Wabureme nun:

«Arihatina darangilu le ñéingiñe nubéi kei

larugounga lidan aban weyu irumurugu,

kei serenu lidan lárouga lidan lidaani alubahani.

5 Danme lásügürün tegelewehan beibei,

lun táfunadun tin,

lubaragiñe lidaani alubahani,

latirimuhóuba limu tau gusiñu,

láchuahouba ábame lagidarún ñéingiñe.

6 Lerederuba súngubei áraabu mebereserúnga lau

houn dunuru áraabuna hama animaalugu áraabuna.

Ñeinba hásügürei dunuru lidaani lubachouga,

herederuba sun animaalugu áraabuna ñein lidan luribouga».

7 Lídanme dan ligía,

lanügüba idewesei lun Wabureme Suntigabafu

luéigiñe hóubadina lílana fulasu ha gágububaña, mirí ligía hara,

néchanigu ha uéibaña hanufudewa lan lidan sun fulasu,

gürigia héretiña, íñuguti hanaagun houngua,

ha aganóubaña lidan fulasu le ñein lumuti saragu duna éibaaguati.

Hanügübei idewesei ligía luagun wübü Sión

le ñein lubéi laguahóua liri Wabureme Suntigabafu.