1 Ítara haña liduheñu Dawidi kei aban tugudina wewe,

láfuriduba aban iseri urúei lídangiñe kei láhüchagun fuluri.

2 Ñeinbei lani Bungiu Sífiri luma súnwandan,

líchuguba lichú aau lun, lualin ichügü,

gabaroun lubéi katei, líchuguba giñe erei lun,

subudi luma inebenehabu lun Wabureme.

3 Maguseragüdünbei luagu larihín aban katei,

masiadihan ligíame luagu katei le machourunti.

4 Laguseragüdüba lau irichaü houn ha débilibaña,

ageindagualeime haricha lílana fulasu ha gudemebaña.

Ítara luba lererun kei aban wewe lun labeichuniña ha hanarimebaña,

lau láfurun liyumulugugiñe láfarubaña ha wuribabaña.

5 Súnwandan ladaüraguba lan lau irichaü luma inarüni.

6 Laganóubati ounli áraabuna luma mudún lidan darangilaü hámawagua,

lemeraaguba géigusi luma gábara lidan aban,

haweinamuduba bágasu luma liñún aban lóubagiñe aban,

hígiraguagüdüba houngua lun ladundehaniña aban irahü ñǘraügili.

7 Gamadaguabóun bágasu tuma osu,

hemeraaguba harahüñü lidan aban.

Léigiba liñún sagadi kei bágasu.

8 Gayaraabei ladibirihan irahü lidan huyu le ñein lubéi taganawa hewe,

gayaraabei ládaruni lúhabu túbiñoun ani mágürün tubéi.

9 Úabei adügüti wuribati luagu nuwübüri le sándubei,

ladüga ítara kei labuinchagüdüni duna barana,

ítara luba labuinchun sun fulasu lau lasubudirúniwa luéirigun Wabureme.

10 Lídanme dan ligía, liñuraguba ladügawagun Dawidi le liráü Hesé lungua

kei aban seini houn lílana burí fulasu;

hóudiba néchanigu áluahei, ani wéirigubei fulasu le ñein lumuti.

11 Larufudayabei Wabureme lubafu lídanme dan ligía,

lau lagiribudagüdüniña lumutuniña ha meha Asiriabaña,

Ehiptu, Paturósu, Etiopía, Elamü, Sinarü,

Amatü luma burí ubouhu.

12 Liñuruba aban seini houn néchanigu,

ábame lóundaruniña Ísüraelina ha bóugudibaña luéi hageira;

lóundarubaña sun lánigu Hudá ha chagagubaña

lídangiñe gádürü larigei ubóu.

13 Lagumuchuba ligimugan Éfürain,

lagalumaduba luriban laritagun Hudá;

magimuganhaalime Éfürain lun Hudá,

úame luriban aritaguni lidan Hudá lubá Éfürain,

14 hóudiba biángubei hagía ageindagua hama Filistéana,

hábürühaba hawagun hanagangiñe;

hagidarubei harisin türibu ha erederubaña luéigiñe oubaü

le ñéingiñe lubéi láfuacha weyu.

Lachülürüba habafu chülǘ Edomu luma Moabü,

hagumadihaba giñe hawagu Amonna.

15 Ladaaruba Wabureme aban üma houn lídangiñe Barana Funati,

liñurubei larüna lóugiñe duna Éufüratesi,

láfuragüdüba aban lanarime garabali

ábame ladüraaguni lidan sedü arünaü,

ábame gayara lan hánhiñuraguni magidarunga hamóun hageidin.

16 Danme hagiribudun híbiri lumutuniña

Wabureme hagía Asiriagiñe,

hadariruba aban üma tuleti kei meha Ísüraeli

dan le láfuridunbei Ehiptugiñe.