1 Aganba humana huguya le busenbei habagaridun lidan ísuruni

huguya le áluahabalina, liña lariñagun Bungiu.

Ariha huméi dübü le uéigiñebei hátügürüwa,

huyu le ñéingiñe lubéi hasagarúa:

2 «Ariha huméi Abüraámü, le húguchi,

tuma Sara to agaraüdübalün.

Ábanrügüñein dan le nagúarunbei lun,

gama lumoun biní numuti

aba níchugun saragu ladügawagun.

3 Gudemehabubadina lun Sión,

uburugu le meha günringuaalibei.

Nadügübei múa mábeiti le lídanbei

fulasu mageirawati fuluri-ágeime,

kei fuluri-agei le lábunagubei Aburemei Edén.

Aniheinbei ugundani ñein luma eremuhani.

4 Nánigu, teni humá nun,

aganba humana, néchanigu:

Nasubudiragüdübei narufudahan,

larugoungadagüdüba nugumadin hau gürigia.

5 Yarafaali nagañeirun, aniteeli nesefuhan luagu üma,

Nagumadirubaña gürigia lau nubafu.

Hagurabahabadina ha aganóubaña luagu burí ubouhu,

híchugubei hemenigi nuagu».

6 Iñura huméi harihin sielun,

ariha humá ǘnabun, luagun múa;

lagumuchaguba sielu kei gumuleli,

lawesiruba múa kei aban dúnigu,

hóunweguba lílana ubóu kei minimini.

Ánheinti nesefuhan magumuchadibei,

laduraruba nagañeirun lun sun dan.

7 «Aganba humana huguya le subudihabúbei lun le richabei,

gürigia ha anügübalin narufudahan kei katei le mama huraraü.

Manufudeda humá luéi hanabagunün gürigia,

mírudagua humá lau hanabunün,

8 lugundun hagumuchaguba kei dúnigu to heigin hamutiri,

kei lana to hágürühan héweraü.

Ánheinti nagañeirun magumuchadibei,

laduraruba nesefuhan lun sun dan».

9 Agaguduabá, agaguduabá larüna Bungiu,

ragüba erei agaguduabá kei meha lidan binadu dan,

lidan dan le sügühalibei.

Günringua bumuti Raabü, mónsturu baranahana;

10 mábeigüda bumuti barana,

lidunari gudungu le hulilibei,

adüga bumuti lilulin barana lun ǘmame,

lun hásügürün ha esefurubaña.

11 Ítara luba giñe hagiribudun ha lesefurubaña Bungiu,

ábame hebelurun uburugun Sión agúaraheina lau ugundani;

hadariruba lubuiduniga, ábame lagumuchagun igarigu luma ayahuni.

12 «Au, au guánarügü rútina gurasu bun.

Ka uei banufudeda? Hawéi san wügüriña?

Hawéi san gürigia góunwedaditiña ha ítarabaña kei híduru?

13 Babulieidubei Aburemei le adügübalibu,

le átulerubalin sielu, le ederebudagüdübalin ubóu?

Badadagaruba sun oura ladüga hagañi ha íchugubaña lidere dan,

ha aranseñubaña lun hagünrinchagunibu?

Hageigia igañi ligía?

14 Le buga áfagubei lidere dan, lesefuruba furese,

móunwenbei furisunrugu,

memegeirun lubóun giñe leigan fein.

15 «Au Aburemeibei le Bubungiute,

Aburemei Suntigabafu níribei;

hingigua numuti barana aba lahuuhan lugudi,

16 Tulé numuti sielu, derebugugüdanei ubóu.

Ru numuti nererun biyumulugún aba nóunigirunibu núhaburugu.

Ariñagatina lun Sión: "Huguya numutuniñabei" ».

17 Agaguduabá, Herusalén, saraba,

súfuri bumuti ligañi Aburemei,

kei le átubei lídangiñe aban kopu darí lamaladun,

darí labacharuadun.

18 Hadan sun birahüñü, úati ni aban lun ladundehanibu;

hadan sun isaanigu ha bagüriarubaña,

úati ni aban lun lárühani búhabu.

19 Ábürühati bián lamiselu le buagun:

Günrinwaguati bageira asagarahóua ligía,

hilagua bumutuniña ladüga ilamaü luma wuribu,

kaba gudemehabu bun? Kaba ámalihabu?

20 Ítara haña birahüñü kei usari ábürühatiña tidoun sádara,

méreeña, roun haña burí luagu larigei furumiñeguarügü üma,

bulesei laaña ligañi Aburemei,

bulesei laaña labeihan Bungiu.

21 Ligía aganbabéi lubéi katei le uburugu mabunurunti,

buguya le bacharuabei gama lumoun mama tau diwéin;

22 Babureme le Bubungiute,

le ageindagubalin hakesin lánigu, lariñahare:

«Nagidarubei weru diwéin le aubei babacharuada búhaburugugiñe,

mátundigia báalime luerun nigañi.

23 Níchugubei houn ha añawarihabaña bun,

houn háñaha ariñagubaña bun:

"Rounba múarugu, wásügüra buéigiñe",

aba barounrun múarugu lun hadügüragunibu kei kaliki».