1 Saraba, Herusalén, hóuburagu lidan larugounga,

lugundun chülühali bilanpun,

ani harugoungati luéirigun Bungiu buagu.

2 Daruguati luburiga lau ubóu,

hóuburagua lumutiña luburiga néchanigu,

gama lumoun larugoungadagüdüba Bungiu bau,

ábame lasaliragun luéirigun buagu.

3 Hayabinba néchanigu luagun bilanpun,

héibuguba urúeigu lábugiñe larugounga barugadun.

4 Iñurabéi barihin, arihabá geyegua bau:

Óundaraguatiña súngubei, aba hayabin bumoun.

Hayabinba birahüñü dísegiñe,

hanügǘba óuyuahouarügü.

5 Danme barihiniña, babuinchuba lau ugundani,

tagundaruba banigi;

lanügǘba lirisin burí ubouhu bun.

Lederegeruba harisin néchanigu bun.

6 Ñéinbaña saragu kameyu buma,

ha ñǘbuintiña Madiangiñe luma Efaagiñe;

hayabinba sun Sabaana lau golu luma kupali,

ábame hadimurehan luagu luéirigun Aburemei.

7 Sun ibiñanigu ha Kedarübaña bilügüniñabaña;

heseriwiduba gábara ha Nebaiotubaña bun,

lun badagaragüdüniña lun Bungiu luagu lani latarü

keisi idewesei le aubei lagundaara,

ábame labuiduragüdünutima litenpulun.

8 Kátaña san ha, ha áhamahabaña kei dúeri,

ha ñǘdünbaña kei unhun lidoun hádibu?

9 Waporu burí to ñǘbuinboun úara tuma

burí ugunei Tárüsisina tubá tubá,

barüina birahüñü dísegiñe lau hagolun luma hani pülata,

lidan liri Babureme le Bungiu Sánduti le Lubungiute Ísüraeli,

le íchugubei uéiriguni bun.

10 Hararamagüdayabei gürigia terencha bubarieirun,

seriwi hagíame harúeitegu bun;

lugundun lau sun bei lánibu Bungiu lidan ligañi,

guentó gudemehabuhaali bun lidan lareini.

11 Hunren luba bubenari súnwandan;

madourúnbei ni áriebu ni wéyuagu,

lun gayara lan lanügüni harisin néchanigu bun,

luma lun hebelurun urúeigu hau hánigu.

12 Lagumuchaguba ageiraü le meseriwidunti bun;

lagünrinchawaguba burí néchanigu dayarüti.

13 Ítara liña lariñagun Aburemei lun Herusalén:

«Liábinguaba lirisin Líwanu bun:

Gudi, abetu luma sipürési lun tewendedun nitenpulun,

lun líchugun uéiriguni lun fulasu le ñein lubéi níchigei nugudi.

14 Hayabinba hasaanigu ha buga asufuriragüdübalibu abuluchagua bigibugiñe,

sun buga ha íchugubaña mebereseni bau,

háhuduraguba bigibugiñe,

hariñagame bun: "Luburugute Bungiu",

"Sión le lani Bungiu Sánduti le Lubungiute Ísüraeli".

15 «Merededigiaadibu lidan bulíeiguaü, iyereeguñu, bábugua,

nadügüba lun wéirigu ban gumugua dan,

lun lébuna ban ugundani súnwandan.

16 Híchugubei néchanigu lubuidun-agei heigin bun,

hanügübei urúeigu harisin bun;

ábame basubudiruni luagu au lan le Bungiu Basalbaragülebei,

luagu au lan le gabafubei Besefuragülebei.

17 «Níchuguba golu bun leweñegua buronse,

pülata leweñegua gürabu,

buronse leweñegua wewe,

gürabu leweñegua dübü.

Nadügüba lun labugurunibu darangilaü,

luma lun ladundehanibu úaraguni.

18 Maganbúnhalime lumalali anarimeni bageira,

úadigiaalime günringuaü bumúanrugu,

bariñaguba lun bubarieirun "Esefuruni"

lun bubenari "Alawahani".

19 «Memegeirúnhadibume larugounga weyu wéyuagu,

ni laruni hati áriebu;

lugundun au, le Aburemei auba bilanpun gumugua dan;

au le Aburemei, auba larugounga bau.

20 Málüdünhalime weyu bun,

mabulubudun ligíame hati,

ladüga au le Aburemei, auba bilanpun gumugua dan;

báguruba ludu.

21 Gürigiabaña harumatiña sun lílana bageira,

laburiñabaña hageira lun sun dan,

láhüchagun aban nadü le nábunubei,

wadagimanu le nadügübei lau núhabu lun narufuduni nuéirigun.

22 Ha míbebañaha, hóustaruba milu;

bianraü gürigia ha, ábanbaña óunwenbu néchani.

Au Aburemeibei, nadügüba lun lasuseredun furese,

danme lachülürün dan ligía».