1 «Anihán nubúein le nágüdahabei,

le nanúadirubei le aubei nagundaara.

Ru naali nani sífiri lidoun lun lanügün irichaü lun sun néchani.

2 Magúaragunbei, miñurun lubéi lumala,

maganbagüdün lubéi lumalali ǘmadarugu,

3 Máhalachagun lubéi maburu le halamémeelibei,

méñeguchunleime lanpu le ñegumémeelibei.

Lanügübei irichaü le tímatimaati.

4 Memeraagunbei meferidirunme luguraasun,

darime deregüda laali irichaü ubouagu.

Aranseñu haba lílana burí ubouhu lun haganbuni larufudahan».

5 Lariñaga Bungiu, le adügübalin sielu ani tulegualei,

le adügübalin múa luma sun le áhüchübei lidan,

le íchugubei ibagari houn ha nibagaribaña

lariñahare lun lubúein:

6 «Au, le Aburemei agúarubei bun,

aba nárügüdüni búhabu,

aba nadügünibu lun lébunabadibu lan esefuruni;

au adügübalibu, lugundun busentina lun

buguyaba lan liseinin nidaradun hama nánigu,

lanpu houn néchanigu.

7 Busentina lun barihagüdün marihintiña,

lun basagaruniña adaürǘtiña furisunrugúgiñe,

le ñein lubéi haganóua lidan luburiga.

8 Au Aburemeibei, ligía níribei,

ani mígirunbadina lun lichugún nuéirigun lun amu,

ni lun híchugun inebesei houn guáriuagu, luéidigia nun.

9 Ariha humá lagunfulirun le meha uágubei nariñaga furumiñe,

guentó nariñaga iseri burí katei.

Nasubudiragüdüñein hun lubaragiñe lasuseredun».

10 Heremuha aban uremu iseri lun Aburemei;

heremuha lun lídangiñe lidise-agei ubóu

sun ha áfayahabaña baranaha

hama animaalugu ha aganóubaña baranaha,

hama ha burí aganóubaña lidan burí ubouhu.

11 Gundaagualá fulasu mageirawati luma burí luburugute

tuma burí hakianpun lani Kedarü türibu.

Heremuha lílana Selá lau ugundani;

iñura haméi hamala lábulugugiñe burí wübü.

12 Ru hamá uéiriguni lun Bungiu

eremuha hagíame lun lidan burí ageiraü le luágubei ubouhu.

13 Láfuriduba Bungiu kei aban ganigiti

ábame lageindagun lau igañi keisi aban wuriburuguna;

liñurubei lumala ábame lagúaragun lun lageindawagun,

ábame láfaraguniña láganiñu.

14 Lariñahare Bungiu:

«Rédeihadina maniñu luagu saragu dan,

manitina, ragüguatina nungua;

gama lumoun guentó, nagúaragua kei würi águrahatu

áünheina, awaragueina.

15 Nagünrinchaguaali sun áraabu luma sun wübü

násaüragüdaali sun nadü le lídanbei.

Namabeidagüdaali sun duna éibaaguati luma sun lagunu.

16 Nanügübaña marihintiña lídangiñe üma le ibidiñeñahati houn.

Nasaliraguagüdübei luburiga larugounganme hagibugiñe

úaraguagüdaneime burí fulasu múaragunti.

Chóuruti luagu nadügübei lan burí katei le.

17 Ha afiñebaña hawagu guáriuagu,

ha ariñagubaña houn guáriuagu:

"huguya wabungiutegubaña",

hadiseduba lau busiganu.

18 «Aganba humá, huguya le maganbunbei;

ariha humá, huguya le marihinbei.

19 Úati marihinti, maganbun ligía kei nubúein le nóunagüle,

ua ligía marihinti, maganbun ligía kei nóunagüle, le lubúein Bungiu.

20 Arihaali saragu katei gama lumoun meteniti lun;

gayaraati laganbun gama lumoun maganbunti ni kata».

21 Aburemei, ladüga aban lan Bungiu le esefuhati,

hóuchati yebe lun wéirigu lan larufudahan;

22 Gama lumoun íweruhouatiña gürigia ha, asagarahóua hagía,

ábürügüda hamaña sun hagía furisunrugun,

dáwaaña tidoun furisun tótima asufuriragülei;

barüwaguaaña, ani úati kaba lan esefuraña;

íweruhouatiña, ani úati kaba lan asagaraña.

23 Gama lumoun ka hídangiñe adügübei gasu lau le?

Ka aranseñubei lun laganbuni le lunbei lasuseredun?

24 Kagia ígirubei lun hagañeirun

luma lun híweruhoun lánigu Hakobu?

Ma Bungiu?

Afigouhatiña ligibugiñe,

máhatiña héibugun lidan üma le larufudubei houn,

maganbadi hagía lun larufudahan.

25 Ligía lagañidunbei hama aba labeichaguniña,

lau aban wuribu le aduranguagüdübaliña lidan ligemeri watu gemeti;

gama lumoun ni ítara máhatiña gunfuranda hamá.