1 Dan laganbunbalin urúei Esekíasi katei le, aba laheiridagunu ladaüragun luougua, aba ladaürün daüguaü súsutu arufudei ligarigu, aba lidin litenpulunrúgun Bungiu. 2 Aba lóunahani Eliakímü le hábuti nadagimeintiña tidan palasiu, Sebüná, le abürühabei, hama fádirigu ha íñugutimabaña tau daüguaü súsutu arufudei hagarigu lumoun profeta Isaíasi, le liráü Amosu, 3 lun hariñagun lun luéigiñe lóubadina urúei: «Láuñadiwa íruni uguñe, abeichúni luma anabawaguni, kei hamuga terederun aban würi méreuga lidan lóurate tágurahan. 4 Aganbadügü láamugei Bubungiute le Babureme dimurei burí le lóunahabei lurúeite Asiria ariñaga lun, anabaguei Bungiu le wínwanbei, beigua láamugaña Bubungiute le Aburemei luagu burí katei le laganbubei. Adügabá lubeiti aban afurieidúni hawagu ha erederubaña».

5 Resibi lumuti Isaíasi uganu lúmagiñeti urúei Esekíasi 6 ábati lóunahani óunabagülei le: «Lariñahare Wabureme: "Manufudedabá luéi dimurei le aubei hanabaguana eseriwidutiña lun urúei Asiriana. 7 Aganbabá, nadügüba lun lachülürün aban uganu lun, le lunbei lagiribudagüdüni lageiroun, ábameti nadügün lun lounwen afarúarügü ñein" ».

8 Aba laganbun úfisi Asiriana luagu ñǘdünha lan buga urúei Asiriana uburugugiñe Lákisi. Ábati lidin Herusaléngiñe, aba ladariruni urúei Asiriana ageindagua luma Libüná. 9 Ñein laganba urúei Asiriana luagu añate lan buga súdaragu Ehiptuna lábugiñe lagumadihan urúei Tirüháka awuribuha luma. Ábayati lóunahan urúei Asiriana ariñaga lun Esekíasi le lurúeite Hudá: 10 «Bubungiute, le uágubei bafiñera, chouru lumuti bun luagu mábürühanbei lan Herusalén labun nubafu; gama lumoun mígiraguagüdaba bungua lun leyeedunibu. 11 Aganba baali le hadügübei lurúeitegu Asiria lau sun burí ageiraü le hagünrinchagubei. Buguyadigiameti esefura? 12 Sefu hamuti funagia búngiugu líbiri fulasu le hagünrinchagubei nagüchagu: Gosán, Arán, Résefü, hama gürigia lílana Betü-edén ha meha aganóubaña Telasárü? 13 Hagañagia lurúeitegu Amatü, Arüpádü, Sefarüwaímü Ená hama lurúeitegu Iwá?»

14 Aba lárügüdünu Esekíasi gárada to hederegeruboun óunagüleigu lun, aba laliihanu. Lárigiñe aba lidin ténpulurugu, aba látuleragunu gárada tuguya ligibugiñe Bungiu, 15 aba lafurieidun, ítara:

16 —Wabureme Suntigabafu, Lubungiute Ísüraeli, buguya le gámabalin lálana barúeihan hawagu kátaña garünatiña, buguyarügüñein Bungiu le Lubungiute sun arúeihani ubouagu buguya adügübalin sielu luma ubóu. 17 Ruba arigei Wabureme, aganbabá. Fegebei bagu Bungiu, arihabá. Aganbabéi dimurei le lóunahabei Senakeríbü ariñaga nun, dimurei burí le anabagutibu, buguya le Bungiu wínwanti. 18 Inarüni luagu günringua hamaña lan lurúeitegu Asiria gürigia lau sun hageira, 19 ani gudá hamaña lan habungiutegu, ladüga lidan linarün katei, mama búngiugu hagía, kátaña burí láutiña wewe o dübü ha ladüga wügüri. Ligía hagünrinchagunbaliña. 20 Guentó lubeiti Wabungiute, sefubáwa luéi habafu, subudi hamaamugei sun gürigia ubouagu luagu buguyarügüñein lan Bungiu.

21 Ábati lóunahan Isaíasi ariñaga lun Esekíasi: «Lariñahare Bungiu le Lubungiute Ísüraeli: Aganba naali afurieiduni le badügübei nun libügürü Senakeríbü le lurúeite Asiria».

22 Anihán burí dimurei le lariñagubei Bungiu libügürü lurúeite Asiria:

«Senakeríbü, éherahati uburugu Sión bau

kei téherahan aban nibureingiru,

ánhinha lumuti Herusalén lichügü adaagua bula bau

dan le badisedun.

23 Kagia bóuseragubei, kagia banabubei?

Ka un biñurei bumala luma barihin lau anaaguni unguaü?

Lun Bungiu le sándubei le Lubungiute Ísüraeli!

24 Anaba bumuti Bungiu hayumulugugiñe bani úfisigu.

Aba bariñagun:

"Múdeitina tau nikarün to gíbeboun

to lánina wuribu lábulugun wübü,

luagu liñun-agei Líwanu.

Áchuaha numuti limiginagun-agei lani hibúari,

luma gudi le burí buídutimabei ñein.

Chülütina luagun liñun-agei

luma luagun burí dabíara le lenegebei fuluri-agei.

25 Chigatina burí fusu lidan fulasu terencha,

aba natun duna lídangiñe, mábeigüda numuti

sun lidunari Ehiptu lau lábugiñe nugudi".

26 Gama lumoun ibidiñeti yebe bun luagu au lan le Aburemei

aranserubei lun ítara luba lan sun katei le?

Lúmagiñe binarü naranseha lun

ítara luba lan, guentó suseregüdaná;

ligía bagünrinchagunbei burí uburugu derebuguti,

aba bagumuchaguagüdüni.

27 Ha burí lílana, mabafutiña,

buin lau anufudei luma busiganu,

ítara haña kei híduru áraabu,

kei sagadi ñǘgili,

kei híduru le áhüchüti tábulugu muna

aba láguduni garabali le suedi.

28 Subudi numuti sun bánhingichun;

subudi numuti luagu iyereegu nan bun.

29 Ani kei subudi nubalin biyereehabu luma banaagun bungua,

níchiga aban bángüli luagu bígiri,

luma aban furenu luagu biyuma,

ábame nagiribudagüdünibu luéigiñe üma le ñéingiñe lubéi biabin».

30 Ábati lariñagun Isaíasi lun Esekíasi:

«Anihánba liseinin le lunbei lasuseredun:

Irumu le, luma leweñegua irumu

héigibei türigu le áhüchübei lungua,

gama lumoun lídanme lǘrüwan irumu,

gayaraabei hábunagun alubaha huguyame,

gayaraabei hábunagun beibei lun heigin tídangiñe tin.

31 Ítara haba ha erederubaña hádangiñe lílana Hudá kei nadü;

háhüchaguba ábame hagindun;

32 Ladüga ñéinbaña erederutiña Herusalén;

ñéinbaña móunweguntiña luagu wübü Sión.

Lanarimeba línsiñehabu Bungiu Suntigabafu adügei le.

33 Lariñahare Bungiu libügürü lurúeite Asiria:

"Mebelubei uburugun Herusalén,

machüübei ni aban gimara luagun uburugu,

mageindagunbei luma lau idaüdinaü lauti gürabu,

móundarun ligíame múa geyegua lau baríeiru lauti dübü,

lun lawarirun agünrinchaguei uburugu.

34 Luéigiñememe üma le ñéingiñe lubéi liabin,

ñéingiñeba lagiribuda;

mebelubei lidoun uburugu le.

Aburemei ariñagubalin.

35 Nóunigirubei uburugu le, ani nesefurubei,

luagu nínsiñehabu lun nubúein Dawidi

luma nínsiñehabu núniwagua" ».

36 Aba lidin lani Bungiu ánheli, aba láfaragun san gádürü wein seingü milu wügüriña tídangiñe hakianpun-agei Asiriana. Laruganbei yebe hilaguaaña súngubei. 37 Ábati labudunu Senakeríbü le lurúeite Asiria kianpu-agei, aba lagiribudun uburugun Níniwe. 38 Luagu aban weyu dan le láhuduraguña lubéi tidan litenpulun Nisüróku le lubungiute, aba hayabin Adüramélekü luma Sareserü ha lirahüñü aba háfaruni, aba hanurahan lóubawagun Ararátü. Aba larúeihan Esaradón le liráü leweñegua.