1 Lidoun dan ligía, aba laganbun Merodákü-baladán le liráü Baladán, le lurúeite Babilónia luagu sándiñahañein lan Esekíasi gama lumoun areidaguaali lan, aba lóunahan lóunagülegu tau gárada luma aban idewesei lun. 2 Aba lagundaarun Esekíasi lau hachülürün óunagüleigu, aba larufuduni lirisin houn, pülata luma golu, ibiñein, agülei fínuti luma le ñein tubéi burí lárumate luma sun le lúbiñebei. Úati ni kata tidan lani palasiu luma lidan sun larúeihan lun marufudun lani houn. 3 Ábati lidin profeta Isaíasi arihei urúei Esekíasi, aba lálügüdüni:

—Halíagiñe hayabin wügüriña ha, ka hariñagubei bun?

Lariñaga Esekíasi lun:

—Lídangiñe aban fulasu díseti hayabin; Babilóniagiñe.

4 Lariñaga Isaíasi lun:

—Kagia harihubei tidan bani palasiu?

Lariñaga Esekíasi lun:

—Ariha hamuti sun le ñeinbei, úati ni kata lídangiñe le areidañu nubéi lun marufudun nani houn.

5 Ábati lariñagun Isaíasi lun Esekíasi: Aganbabéi uganu le, lúmagiñeti Bungiu Suntigabafu:

6 —Lachülürüba dan lun lanügǘn sun le tídanbei bani palasiu luma sun le hóundarubei bagüchagu chülǘ lumoun weyu le uguñebei Babilónioun. Meredebei ni kata ya. 7 Ñéinbaña giñe hádangiñe badügawagun anügǘtiña Babilónioun, hasafunrúba, ábame herederun kei musu tidan lani urúei palasiu.

8 Laritaguati Esekíasi luagu lidan lan lidaani libagari, ñeinbei lan darangilaü, aba lariñagun lun Isaíasi:

—Fuleseihabúti uganu le banügübei nun luéigiñe lóubadina Bungiu.