1 Gürigia, higougu yarafa humá lun haganbun,

néchanigu ru humá arigei.

Aganbalá sun ubóu,

aganba hamá giñe sun ha aganóubaña lidan.

2 Lugundun gáñiti Wabureme hama sun néchanigu,

luma hama sun lisudaranigu,

ani siadiláña lun günringuaü luma lun óunweni.

3 Higirúba hilaguaaña chagagu,

ábame língidun hágubu

léibaaguba hitaü luéigiñe wübü kei duna.

4 Lagünrinchawaguba weyu, hati tuma burí waruguma,

labaruchaguba sielu kei aban gárada.

Tábürühaba sun waruguma

kei lábürühan aban tubana beibei o tubana tídibu igu

le átügürüti luéigiñe lídibu.

5 Tasaliraguba lefeinte Wabureme sielu

ábame tábürühan luagun Edomu,

fulasu le siádiwaalibei lun óunweni.

6 Tabuinchuba lefeinte Wabureme lau hitaü luma agülei,

kei dan le háfarun mudún hama gábara lidan adagaragüdüni.

Ladügüba Wabureme aban adagaragüdüni uburugu Bosurá,

aban óunwenbu áfarahani uburugu Edomu.

7 Hábürühaba kei bágasu wügüriña

ladüdürüba múa lau hitaü,

ábame labuinchun kaliki lau agülei.

8 Luéyuribei láguyugüdün Wabureme wuribani,

irumu lánina libihini Sión le leferidirubei lárigoun.

9 Lasaliraguba lirahüñü burí duna le

uburugubei Edomu lagüleme gudi,

saliguame kaliki súfurume;

legemechuba múa kei lagüle gudi.

10 Méñeguchunbei ni wéyuagu ni áriebu;

lamudeiruba lugumulelin súnwandan.

Lerederuba málouga gumugua dan.

Másügürünwadigiaalime ñéingiñe.

11 Ñeinba haganóua yalifu hama dunuru áriebuna,

hadügüba hádibu ñein.

Ladügübei Wabureme ageiraü ligía fulasume mageirawati.

12 Úadigiaalime aban urúei lun larúeihan ñein;

hagumuchaguba sun lábutigu.

13 Láhüchüba hiiyu tidan hani palasiu,

luma híduru luagu habarieirun.

Ábanbei fulasu le ñein lumuti haganóua ounli áraabuna,

le ñein lumuti hemeraagua dunuru.

14 Haganóuba mesu áraabuna ñein hama ounli áraabuna,

hagúahaba gábara hóuniwagua ñein.

Ñeinba laganóua pantu le anufudehabei áriebu,

ladariruba lubara ñein lun lemeraagun.

15 Tadügüba garún tídibu ñein,

temeilihaba ñein, ábame tasagaruniña tirahüñü,

ábame tóundaruniña lun tóunigiruniña.

Hóundaraguba giñe garún ñein

kada garún wügüri tau lúmari.

16 Ariha humoun liliburun Wabureme, aliiha humoun:

Memegeirúnbei ni aban hádangiñe animaalugu ha,

kada animaalu wügüri tau lúmari,

ladüga ítara liña laranseruni Wabureme guánarügü,

lóundarubaña lau láfurun.

17 Arufuda laali lubara kada aban lun,

arufuda laali lufulasun lun lau lúhabu,

ñéinbaña lun súnwandan;

haganóuba ñein gumugua dan.