1 Lariñahare Bungiu nun:

«Wáguaba here manufudeuga,

iñurabéi bumala kei aban fidu;

badeinha houn numutuniña luagu hadurun,

houn lánigu Hakobu luagu hafigoun.

2 Áluaha hamutina sagü weyu

ani gúndaatiña lau hasubudiruni némeri,

kamá hamuga gürigia ha adügübalin le buídubei hagía,

ha mígirunbalin nilurudun;

amuriahatiña lúrudu richati numa

ani arufuda haméi hagundan lau hayarafadun nun,

3 gama lumoun ariñagatiña:

"Kaba uagu wayunara, marihingalawa Bungiu?

Kaba uagu wáfaagua, mefentiga luagu?"

Barǘ hamuti luéyuri ayunaruni lun hagañeihan luma lun halugurahan,

luma lun hasufuriragüdüniña nadagimeintiña houn.

4 Sügǘ hamuti luéyuri ayunaruni asigeneha, ageindagua,

luma agayuaha tau agufudein.

Luéyuri ayunaruni ítarati

siñabei ladügün lun naganbuni hafurieidun.

5 Haritaguatün san luagu ayunaruni lan le aubei nagundaara

lunti lan hadiheridun, habuluchagun kei aban góunwenre,

luma lun harounrun tau daüguaü súsutu ligibuagu baligi?

Anihán le unbei hagúara "ayunaruni",

luma "weyu auti lagundaara Bungiu"?

6 Mama liña.

Anihán ayunaruni le aubei nagundaara:

Lun hátumuraguni ligüringürin marichaü,

luma lun hafaragaduni lagu gürati le ámurudubalin yugu;

lun hígiragüdüniña ha asufurirubaña,

gumuguagüda humeime amudirawaguni;

7 lun bafanreinragunu beigan fein luma le lamabei,

resibibéime le gudemebei búbiñe;

lun bíchugun daüguaü lun le madaüragunbei

mígirun buguyame bíderaguniña gürigia bíledigu.

8 Ábameti larugoungadun bilanpun kei larugadun,

ábame lareidagun bibugún furese.

Lídiba biricha bubá bubá,

lídinme nuéirigun bárigi, bárigi.

9 Ánhabumeti agúara nun, nóunabubadibu;

ánhabu agúaragua amuriaha íderawaguni,

nariñaguba bun: "Anahán ya".

«Anhein bagumuchaguagüda sun asufuriruni,

ánhabu manabun gürigia,

ánhabu madimurehan biyeeni hawagu amu íchiga hadurun,

10 ánhabu íchaagua bungua lun beseriwidun lun le lamabei,

anhein bíderagua le nidiheribei lau le lemegeirubei,

laduranguba bilanpun lidan luburiga,

lasaliraguba bamuñadina larugounganme le lánina amidi.

11 Nadundehabadibu súnwandan,

níchuguba saragu éigini bun lidan fulasu mageirawati,

níchuguba erei lun búgubu,

ítara buba kei aban fuluri-agei le túaguati buidu,

kei aban lísensen duna le mamabeidaditi.

12 Hábunaguayabei bumutuniña lárigirugu binadu fulasu,

ábame hachoururuni luagaburi le meha ábunawagubei

saragu sígulu lubaragiñe guentó.

Lariñawagúba houn bánigu "aransehatiña baríeiru héiguaali",

"araramagüdütiña muna günringuaaru".

13 «Inebelá luéyuri emeraaguni bun;

madaaguabá marasun lidan nuéyuri le sándubei.

Barübei weyu ligía kei luéyuri ugundani,

kei luéyuri Bungiu le sándubei, le lunti inebewa lan;

ruba inebesei lun lau míchaagun ban bungua lun katei le bani,

máluahanbeime burí katei le búnguarügüti,

madaagun buguyame marasun.

14 Anhein badüga ítara, badarirubei bugundan nidan,

ábame nanügünibu luagun liñun ageiraü,

ábame bayusuruni lalagante Hakobu le búguchi».

Aburemei guánarügü ariñagubalin.