1 Anúadira lumuti Bungiu Siru keisi urúei,

barǘ lumuti luéigiñe lúhabu lun lagumadiruniña néchanigu

luma lun lagünrinchaguniña urúeigu.

Adügati Bungiu lun lánhunrenchun lubenari burí uburugu ligibugiñe Siru,

úouga kaba lan adourei luéi.

Lariñahareti lun guentó:

2 «Nídiba bubá bubá, násuragüdübei le segebei;

nabouchaguba bena burí le lauti buronse,

günringuaneime burí idaündaü lauti gürabu.

3 Níchugubei irisini le burí aramudúañubei bun,

irisini areidúañuti lidan fulasu aramudaguati;

lun basubudiruni luagu au lan Aburemeibei,

Lubungiute Ísüraeli, le agúarubei bun lau biri.

4 Ladüga nugudemehabu lun Hakobu le eseriwidubei nun,

luma houn Ísüraelina ha nanúadirubaña.

Wáhadina bun lau biri, ru au uéiriguni bun,

ibidiñounga au bun,

5 Au Aburemeibei, úati amu;

úati amu Bungiu nuéi.

Aranse náadibu lun wuribu

ibidiñounga au bun,

6 lun hasubudiruni sun ha luéigiñebaña oubaü

le ñéingiñe lubéi laboucha weyu,

hama ha luéigiñebaña oubaü le ñeinhin lubéi lálüda

luagu ua lan amu bóugudi nuéi.

Au Aburemeibei, úati amu.

7 Au adügübalin larugounga luma luburiga,

barütina lubuiduniga barǘ au lamiselu.

Au le Aburemei, adüga numuti sun le».

8 «Nóunahabei nagañeirun íñugiñe,

kei serenu siélugiñe,

kei huya dúerirugugiñe,

ábame leresibiruni múa;

líchuguba esefuruni kei in,

legelewehaba irichaü lóubagiñe».

9 Aban asiedu lauti múa,

le ítarati kei furumiñeguarügü asiedu,

masigenehanti luma le adügübalin.

Mariñagunti múa lun le nadagimeinbalin:

«Ka badügübei?»

Mariñagun ligía katei le ladügübei lun:

«Mawadigimaridatibu».

10 Siñati giñe ladeinhan aban isaani

houn lagübürigu luagu hagaraüdüni.

11 Lariñahare Aburemei, le Sándubei,

le Lubungiute Ísüraeli, le adügübalin:

«Hálügüdagubadina funagia hawagu nisaanigu,

o harufudahaba nun ida luba lan nadügüni le nadügübei?

12 Au adügübalin ubóu hau sun lílana,

au átulerubalin sielu lau núhabu,

aba nasaliraguagüdüniña sun waruguma.

13 Au achülaaguagüdübalin Siru lun lagañeirun,

ani nadügüba lun ménrengun lan sun üma lun;

lararamagüdayabei nuburugute,

lígiragüdübaña ha anügǘbaña hageiragiñe keisi adaürǘtiña maguburahangalaña».

Aburemei Suntigabafu adimurehabei.

14 Ítara liña lariñagun Bungiu lun Ísüraeli:

«Hederegeraguba Ehiptuna ha nadagimeinbaña áraabu houngua bun

hau sun alugurahatiña Etiopíana

hama gürigia Sabaana, ha gágububuribaña,

ábame herederun bidamunme;

hóudiba bárigi bárigi güragu lau güringüri,

háhuduraguba bigibugiñe ábame hayumuragun bun ariñaga:

"Inarüni luagu anihein lan Bungiu huma,

úati amu, úati amu bungiu" ».

15 Lau sun lira aban Bungiu marihínti buguya,

Bungiu le lesefuragüle Ísüraeli.

16 Sun ha adaagubaña guáriuagu,

habuinchuba lau busiganu.

17 Ánheinti Ísüraeli sefu lumuti Aburemei,

sefu lumuti lun sun dan,

ani manügündügübei busiganu.

18 Lariñahare Bungiu le adügübalin sielu,

Bungiu le Aburemeibei

le adügübalin múa, aranseléi,

le ederebudagüdübalin,

lun haganóun gürigia:

«Au Aburemeibei, úati amu nuéi.

19 Madimurehantina aramudaguarügü

ni lidan burí fulasu búrigati ubouagu.

Mariñaguntina houn ladügawagun Hakobu:

"Áluaha humana le ñein lumuti ua lan ni kata".

Au, le Aburemei, inarüni nadimurehabei,

irichaü nariñagubei.

20 «Óundaragua humá, higougu,

yarafa humá sun ha wínwangiñabaña ubouagu.

Ibidiouguati hau ha asariñagüdübaña

hau haguariuan ha láutiña wewe,

afurieida hagía lun aban bungiu le siñabei lesefuruniña.

21 Hadimureha, arufuda huméi hinarün,

anhein busén hubéi, álügüdagua humá húmagua:

Ka ariñagubalin burí katei le lúmagiñe furumiñeti dan?

Mama funagia au le Aburemei?

Úati Bungiu bóugudi nuéi,

úati Bungiu esefuhati nuéidigia.

22 «Higougu numoun sun lílana ubóu sefu humaamuga,

ladüga au Búngiubei, úati amu Bungiu nuéi.

23 Fiñú numuti lidan niri guánarügü,

adügatina aban füramasei lánina agañeiruni

ani lagunfuliruba füramasei ligía:

Luagu háhuduraguba lan sun gürigia nigibugiñe,

fiñú hagíame súngubei lidan niri,

24 hariñagame: "Lídanrügüñein Bungiu agañeiruni luma ubafu".

Wuribabei lidin houn sun ha iyereehabúbaña nun.

25 Lau nareini, hagañeiruba sun lánigu Ísüraeli

ani hapantahaba nau.