1 Lídanme weyu ligía,

labeichubei Wabureme Lewiatán le mónsturu baranahana,

hewe le adugulehabei ani gougua ligía,

láfarubei Wabureme düragón le aganóubei baranaha

tau lefeinte to hanarimeboun, to wéiriboun to gabafuboun.

2 Lariñaguba Wabureme lidan weyu ligía:

«Heremuha tun beibei-agei to semeeboun.

3 Au le Aburemei, au óunigirubarun, súnwandan náturagunu.

Góunigi numutu áriebu wéyuagu lun masuseredun lan ni kata tun.

4 Magañiduntina tuma, lun hamuga anihein lan hiiyu luma híduru tuagu,

náhulahañein hamuga aba hamuga náguduni sunsuinagubei.

5 Anhein busén tubéi nóunigirunu, arandaratá numa, anha, arandaratá numa».

6 Anitebei dan lun láhüchagun lílagüle Hakobu,

láhüchaguba Ísüraeli ábame legelewehan,

ábame labuinchagüdüni ubóu lau lin.

7 Mabeichun lumutiña Wabungiute Ísüraelina

kei labeichuniña ha íchugubaña lidere dan houn,

máfarunlaña hilagubei kei láfaraguniña ha áfarubaliña.

8 Bei lumutiña Wabureme lánigu lau lasagaragüdüniña

hageiragiñe lun lidoun amu fulasu,

bugá lumutiña lau lanarime láfurun

kei dan le láfurun garabali luéigiñe oubaü le ñéingiñe lubéi laboucha weyu.

9 Gama lumoun feruduna lubéi lifigoun Hakobu

anhein lagünrinchagua Ísüraeli sun burí lani latarü le wíyeti hama burí lisandun

luma burí latarü le ñein lubéi lágudaha kupali houn lubungiutegu.

10 Günringua uburugu derebuguti,

rédeiha kei muna igirúaaru,

kei fulasu le ñein lumuti ua hamá gürigia.

Ábanhali fulasu le ñein lumuti heredera bágasu

le ñein lumuti heiga aba harounrun emeraagua.

11 Halaguati lilimun tídibu wewe dan le lásaürün;

ábati habudahani würiña hálememe.

Gürigia hürü tichügü hagía.

Ligía magudemehabubei lubéi Wabureme le adügübaliña houn.

12 Lídanme weyu ligía,

luadigimariduba Wabureme lúmagiñe Éufüratesigiñe darí duna Ehiptu

kei léferehoun lin nadü; ánheinti huguya Ísüraelina, habudahóuba aban aban.

13 Lídanme weyu ligía,

tínwinruba fidu to wéiriboun,

hámeti féridiñubaña Asiria

hama ha buga anügǘbaña Ehiptun,

hayabinba áhuduragua lun Wabureme Herusalén luagu wübü le sándubei.