1 Lariñahare Bungiu:

«Ha buga mamuriahangiñabaña ni kata numa,

hagía ñǘbuinbaña numoun;

ha buga máluahanbalina, hagía adarirubalina,

houn gürigia ha máluahanbalina nariñaga: "Anahán ya".

2 Tulé numuti núhabu sun weyu

lun yebe nachawahaniña gürigia mabuchahatiña

ha ñǘdünbaña luéigiñe lagübüri hémeri,

afalarei lagübüri hasaminan súnwandan;

3 gürigia ha anabagubalina nigibuagun súnwandan;

ha adagaragüdübaña houn búngiugu lidan fuluri-agei,

águdaha hagía kupali luagu burí latarü le lauti ladiríyu;

4 ha añuurubaña lidan burí umúahaü,

sügǘ haméi burí áriebu lidan fulasu aramudaguati;

ha éigibaña buíruhu,

buíngüda haméi burí hasoudierun lau iraü wíyeti.

5 Ha ariñagubaña: "Ñeinbá lidan bubara, maguurabá nuagu;

sánduyatina, lun baguurun nuagu".

Ítara haña gürigia hagía kei watu le durungu liña sun weyu;

beresetiña nun kei gumuleli lidan ígirugu.

6 Gama lumoun bürüwañu liña sun le nigibugiñe,

meredebadina deregüdagu;

níchigaali le hadünabei houn,

7 dandu luagu huriban, kei luagu hariban hagübürigu.

Águdahatiña meha kupali ligibuagu wübü,

anabagua hamana lidan fulasu íñuti.

Nabahüdaali sun le hadügübei furumiñe lubá níchuguni le hadünabei houn».

Aburemei ariñagubalin.

8 Lariñahare Bungiu:

«Dan le gara lan beibei saragu,

meferidirun hamuti gürigia,

ladüga gayaraati hasagarun saragu diwéin lídangiñe,

ítara luba giñe nadüga luagu nínsiñehabu houn nubúeingu:

Magünrinchagun nubaña súngubei.

9 Nadügüba lun gadügawagun lan Hakobu,

luma lun ñein hamá gürigia Hudá lun haganóun lidan náraabute.

Hárügüdübei ha nanúadirubaña múa,

ñeinba haganóua nubúeingu.

10 Labuinchuba Sarón hau mudún,

buin ligíame fulasu wayati le Akoru hau bágasu

ha halügüniña gürigia ha áluahatina.

11 Ánheinti huguya le adisedubei luéi Aburemei,

bulíeigua huguya luéi nuwübüri sánduti,

huguya le adagaragüdübei éigini tuma diwéin lun Gadü luma Mení,

ha lubungiutegu ubunuruni luma isinuni,

12 mabunuruniba hibiha:

Nadügüba lun háfarawagun tau eféin.

Ladüga agúahatina hun, móunabuntün;

adimurehatina hun, maganbun humutina;

adüga humuti le unbei namahara,

anúadira humuti le aubei magundan nan».

13 Ligía lariñagubei Bungiu:

«Géiginbaña nubúeingu,

anhein huguya, hasufuriruba ilamaü;

hagía ganiñebaña, huguya háfaguba mágürabu;

hagía hagundaaruba, huguya hanügüba busiganu;

14 hagía heremuhaba

ladüga ugundani le tídanbei hanigi,

anhein huguya hagúarahaba ayahuaha

ladüga íruni luma idiheri.

15 Hayusurubei nánigu hiri

lun híñaragun luma lun hayumahan wuribani houn amu,

ánhañati nubúeingu, nasansirubei hiri.

16 Furumiñeguarügüme le amuriahati abiniruni fulasurugu,

lúmaba Bungiu gúnfuliti lamuriahei;

furumiñeguarügüme le áfiñuruti fulasurugu,

lídanba liri Bungiu gúnfuliti láfiñura.

Bulieiná binadu burí hidiheri,

gumugua ligibugiñegiñe nagu.

17 «Nadügüba aban iseri sielu luma aban iseri ubóu.

Labulieidúaba sun le sügühalibei,

úaalime aritaguti luagun.

18 Buin humá lau ugundani lun sun dan luagu le lunbei nadügüni,

lugundun nadügüba aban Herusalén gúndaati,

hama gürigia gúndaatiña lun haganóun ñein.

19 Au guánarügü, nagundaaruba luagu Herusalén

nasandiruba ugundani hawagu numutuniña.

Maganbúndigiaalime ayahuni ñein,

ni agúaraguni lánina idiheri.

20 Úabaña irahüñü figigiña óunwegutiña ñein,

ni wéiyaaña mutu lun magunfulirun hamani hadaani.

Leme óunweti luagu san irumu lau, nibureingili lounwen,

le machülüti san irumu, íñarawaguati.

21 Hábunaguba gürigia haban ábame haganóun tidan,

hábunaguba beibei ábame héiginu tin.

22 Mábunagunbei gürigia muna laganóuame amu tidan,

mábunagun ligíame mutu nadü, léigounme amu tin.

Migifebei habagari numutuniña kei libagari tídibu wewe;

harihubei numutuniña le hawadigimaribei lau háhabu.

23 Mawadigimaridunbaña luagu ni kata,

móunwegun hagíame hasaanigu lubaragiñe hadaani,

lugundun hadügawagun ha biní laañabaña Aburemei hagía,

ani ítara haba giñe hadügawagun.

24 Nóunabubaña lubaragiñe hagúarun nun;

naganbubaña lubaragiñe lagumuchun hadimurehan.

25 Léigiba géigusi luma mudún lidan aban,

léigiba liñún sagadi kei bágasu, téigame hewe múa.

Úabei ni kata adügüti damichi lidan sun nuwübüri le sándubei».

Aburemei ariñagubalin.