1 Anihán uganu luáguti Hudá luma Herusalén le líchugubei Wabureme lun Isaíasi le liráü Amosu lidan lidaani larúeihan Osiasi, Hotamü, Aasi luma Esekíasi uburugu Hudá.

2 Sielu luma múa,

aganba huméi le lariñagubei Wabureme:

«Agüriahatina irahüñü darí haweinamudun,

gama lumoun aba hagarabaagun nuagun.

3 Subudi lumuti bágasu labureme,

subudiléi burigü halía lan líchiga labureme éigini lun;

ánhañati numutuniña ibidiñeti ni kata houn,

úati gunfuranda hamá Ísüraelina».

4 Gürigia gafigountiña!

Gürigia buin umutiña lau wuribani,

hadügawagun wuribatiña,

Isaanigu salufuritiña!

Díreihadün luéi Wabureme,

diñuhadün luéi Lubungiute Ísüraeli le Sándubei, ígira humá.

5 Rúguatün hungua lun mabuchahaü,

úaali halíaba lan habeichúa luagu húgubu.

Anihein biti luagu sun hichügü,

féridi humaali here sunsuinagubei.

6 Lúmagiñe lábugiñe hugudi darí lumoun hichügü,

úati ni kata buiti huagu;

luéidigia biti, buleseiti luma guméi ñalaali,

magaranihóungili lun, magürawagún ligía,

máhurudawagun ligía garaba luagu lun lagalumadun ligari.

7 Rédeiha hageira kei fulasu mageirawati,

ani gudala watu uburugu.

Hou hamuti háganiñu le hábunagubei higibugiñe guánarügü.

Günringua hamá terencha humúan.

8 Siónrügüñein eredera rara,

lábugua kei dibasein lamidangua beibei-agei,

ítara liña giñe kei tagübüri muna,

lamidangua fulasu le ñein lubéi tábunawagua melón,

ítara kei aban uburugu le geyeguti ágani lau.

9 Lun hamuga mígirun lan Wabureme Suntigabafu fiu wádangiñe,

ítara waña hamuga guentó kei Sodoma luma Gomora.

10 Ábutigu Herusalénna, aganba huméi lererun Wabureme;

huguya le hanarimebei huriban kei Sodomana hama Gomorana.

11 Lariñahare Wabureme:

«Ka uagu hanüga saragu idewesei nun?

Buchá nuagu lubá hadagaragüdün le gudawarügüti

ha mudún luma hagüle bágasu ñǘbürigiña;

mínsiñeti hata bágasu wügüriña nun,

ni hata mudún ni hata gábara ñǘbürigiña.

12 Ñǘbuintün arufudagua hungua nigibugiñe;

gama lumoun, kagia ariñagubei hun lun hadügüraguni tibürürün nitenpulun?

13 Hebé hanügün idewesei málati nun,

magundantina lau lugumulelin.

Watün houn lílana fulasu

lun hefeduhani iseri hati luma luéyuri emeraaguni,

gama lumoun magundantina lau hefeduhan gürigia ha adaagubaña wuribani.

14 Iyereeguti hufedun le lánina iseri hati

luma burí hadamuridagun nun;

gáñigüda lumutina saragu, darí lun mawandun naali lan!

15 «Dan le hiñuruni húhabu lun hafurieidun,

digí numuti narihin huéi;

ani íbini hafurieidun saragu,

maganbun numutün.

Dáseihali húhabu lau hitaü.

16 Chibagua humá hungua, haruma humá!

Direi huméi huriban luéi narihin!

Hebé hadügün wuribani!

17 Furendei huméi ladügǘn buiti,

áfaagua humá lun hadügüni le richabei,

íderagua huméi le asufurirubei,

ru huméi haricha méteñuhaña houn

íderagua humaña würiña hilaguaaña úmarigu!»

18 Lariñahare Wabureme:

«Higougu, wadimureha libügürü katei le.

Íbini anhein funá lubéi hifigoun kei lagumuhóun ífunani,

náharudagüdübei kei niewe;

íbini ítara lan kei gamisa féindiwatu lau funafunaguti,

náharudagüdübei kei mouru.

19 Anhaün ǘnabudaguagüda hungua ani gaganbadi huguyame nun,

héigiba lídangiñe lubuidun-agei alubahani le líchugubei múa;

20 Gama lumoun anhaün ítarameme lau humaganbadin,

hóunweguba wuriburugu».

Wabureme guánarügü ariñagubalin.

21 Uburugu gúnfuliti,

ñǘbuinhadibu lun ítarabadibu lan kei aban horu!

Sun meha gürigia ha aganóubaña bidan,

úarati ani richaguati meha hóuserun,

winwan hagía meha lidan lubudubu,

ánheinti guentó buin haña gáfarahatiña bidan.

22 Pülata meha buguya, ánheinti guentó, saliguaadibu lun ífeime;

diwéin meha buiti buguya, guentó, dúnaadibu.

23 Ha agumadihabaña bidan, mabuchahatiña,

hamadagu gürigia wuribatiña ha híwerutiña.

Sun hagía aluguraguatiña houngua luagu seinsu,

áluaha hagía lichugún idewesei houn,

michu hamuti liricha méteñuhali lun,

meberesegúntiña lau tiricha würi to hilaali túmari.

24 Ligía lariñagunbei Wabureme Suntigabafu le Lubungiute Ísüraeli;

Buídurügaali! Nageindaguba hama náganiñu,

nafayeiragüdübaña luagu hadüga.

25 Niñurayabei núhabu buagun,

ábame náguduni bíñebu sunsuinagubei;

narumadagüdübadibu lídangiñe sun biwiye.

26 Nadügüba lunya ñein hamá aguseragüdütiña bidan kei meha furumiñe

hama eweridihatiña kei meha ha furumiñetiña.

Lárigiñeme nadügüni lira, ábayame laguarún bun

«Uburugu lánina irichaü», «uburugu gúnfuliti».

27 Lau liricha nagumadihan luma nesefuhan,

nesefurubaña lílana Sión lun hagiribudun nun;

28 Gama lumoun nagünrinchagubaña maganbaditiña hama gafigountiña,

ha ígirutina hóunweguba.

29 Huguya hanügüba busiganu lau burí tídibu wewe

luma fuluri-agei le wéiribei línsiñe hun,

le ñein lubéi hadüga kultu houn guáriua.

30 Ítara huba kei tubana wewe le hilaali,

luma kei aban fuluri-agei le madunariti.

31 Liábinba wügüri le hérebei lun ítara lan kei ubanaü sáühali,

liábinme burí katei le ladügübei kei life leñegura watu;

biángubei hagía háguduba lidan aban, ani úabaña kaba lan éñeguchaña.