1 Katei san le, le ñǘbuinbei Bosurágiñe,

le luburugute Edomu,

tau ladaüragun féindiwañu lau funati,

le wéndebei asansiragun,

éibugeina lau lanarime erei?

«Au, au le adimurehabei luagu agañeiruni,

ani gabafutina lun nesefuhan».

2 «Kagia uagu funa tubéi bidunigun,

kamá hamuga chuínguaadibu beibei lau bugudi?»

3 «Ítara liña, nachuinraguañahaña beibei nábugua,

úati ni aban íderagutina;

aba nabuinchun lau igañi,

aba nachuinraguniña náganiñu,

aba naburechaguniña lau nigañi,

aba labahichagun hata tuagun nidunigun,

aba ladaseirunu nadaüragun.

4 Aranse numuti luagu lachülürüba lan weyu lun nadügün irichaü;

chülühali buga dan lun nesefuruniña numutuniña.

5 Aba narihin, úati kaba lan íderaguana;

wéiritu nanigi lau ua lan ni aban númagiñe.

Narüna agañeiragüdübalina,

nigañi ágüdahana.

6 Aba nabuinchun lau igañi,

aba naburechaguniña néchanigu,

günringua numutiña lau nigañi,

aba náwiyuragüdüni hata múarugu».

7 Busentina nadimurehan luagu línsiñehabu Aburemei,

busentina neremuhan lun

luagu sun le adüga láalibei luagu wafulesein,

luagu lareini hama tílana luban Hakobu

luagu sun le adüga láalibei lidan lueirin lareini

luma lidan lueirin línsiñehabu.

8 Ariñagati: «Numutuniña hagía,

isaanigu ha lúnbaña magarabaagun hamá nun».

Aba lesefuruniña

9 lídangiñe sun hadiheri.

Mama óunaharügüti esefuraña;

Aburemei guánarügü esefurubaliña.

Ligía esefurubaliña lau línsiñehabu luma lugudemehabu,

aba liñuruniña, aba lanügüniña larünarugu.

Ítara liña ladügüni súnwandan.

10 Gama lumoun aba hiñuragun houngua luagun Aburemei

aba hanabaguni lani sífiri le sándubei;

ligía lagaganirunbaliña,

aba lawuribuhan hama.

11 Aba haritagun luagun binadu dan,

luagun Moisesi le asagarubaliña lumutuniña,

aba hálügüdagun houngua:

«Hagéi san Bungiu le esefurubalin Moisesi

le hóuniri lilügüniña mudún lídangiñe Nilu?

Hagéi le íchugubalin lani sífiri le sándubei lidoun Moisesi,

12 le adügübei lun lúmabei lan Moisesi luéirigun lubafu,

le afanreinragubalin barana lun hásügürün lumutuniña,

lun buga laganbahóuba lan hawagu súnwandan,

13 le ásügüragüdübaliña lamidanguagiñe barana miriraagunga hagía,

kei gabayu lidan fulasu mageirawati,

14 kei bágasu dan le hararirun luéigiñe wübü?

Adundeha lumutiña bugaha lani Bungiu sífiri».

Ítara liña labuguruniña lumutuniña,

aba habihin uéiriguni, aganbahóua ligía hawagu.

15 Arihabá siélugiñe Aburemei,

lídangiñe fulasu sánduti ani wéiriguti le ñein lubéi baganawa.

Hagéi san bubafu luma bóunigiruniwa?

Magidarabéi bínsiñehabu luma bugudemehabu wawéi.

16 Buguya wáguchibei!

Íbini lamaharun Abüráamü luagu lirahüñü wamá,

maritagun ligía Ísüraeli wawagun,

buguya, Aburemei, wáguchibei

buguyagubeiñein Wesefuragüle súnwandan.

17 Ka uagu badüga lun wadireirun luéi bémeri, Aburemei,

ani deregüdaboun wanigi lun mineben ban woun?

Sánsiguala bigaburi luagu bínsiñehabu houn bubueingu,

luma houn bani türibu.

18 Luágurügüñein murusun dan laburiña lan fulasu bumutuniña!

Dügügua hamaaru wáganiñu bitenpulun.

19 Ítara waña kamá hamuga magumadirúnñaha bágidiwa,

kamá hamuga mámañahagidiwa bumutuniña.