1 Gama lumoun guentó, Ísüraeli, lumutuniña Hakobu,

lariñahare Bungiu le adügübalün hun:

«Manufudeda humá sefu naadün;

wátina hun lau hiri, nani huguya.

2 Danme básügürün dúnarugugiñe, búmabadina,

danme bánhiñuragun duna éibaaguati, mañaradagunbadibu;

danme básügürün lídangiñe watu gemeti; mágudunbadibu,

megemebei watu buagu.

3 Ladüga au Baburemebei, au Besefuragülebei,

Bungiu le Sándubei le Lubungiute Ísüraeli.

Agañeiha náadibu;

ru naali Ehiptu, Etiopía, luma Sabá

lebegime nagañeihanibu.

4 Ladüga bínsiñe nun,

wéiriti bebegi ani hínsiñetibu nun.

Deregetina wügüriña hama néchanigu

lun numa ban luma lun nesefuruni bibagari.

5 Manufudedabá, ladüga anahein buma.

«Nagúaruba houn bánigu lídangiñe oubaü le ñéingiñe lubéi laboucha weyu

luma le ñeinhin lubéi lálüda lun nóundaraguniña».

6 Nariñaguba lun nórute: "Águyugüdabaña",

ariñaga aume lun suru: "Merederabá hau.

Barübaña nisaanigu dísegiñe lígirugugiñe ubóu,

7 sun ha anügübalin niri,

ha nadügübaña lun híchugun uéiriguni nun".

8 «Ñǘbuingüda humaña numutuniña,

ha gágubaña gama lumoun marihintiña,

garigeirugu hagía gama lumoun maganbuntiña.

9 Óundaraguala sun ageiraü,

dungua hamá sun néchanigu.

Kagia hádangiñe ariñagubalin le lubaragiñe lasuseredun?

Kagia adimurehabei luagu le sügühalibei?

Barǘ hamá gefentiña, arufuda haméi luagu richá hamá,

aganbúa láamuga, ariñawagúa ligíame luagu inarüni lan».

10 Lariñahare Bungiu:

«Huguya nánibei gefentiña,

huguya eseriwidubaña nun, ha nanúadirubaña

lun hasubudirunina, afiñe huguyame nuagu,

gunfuranda humeime kátana lan.

Úagubeiñein ni aban bungiu nubaragiñe,

ani úabei giñe nárigiñe.

11 Áurügüñein Bungiu;

úati ni aban gayaraati lesefuhan, nuéidigia».

12 Lariñahare Bungiu:

«Au anügübalin uganu: au esefurubalün;

mama aban bungiu terencha adügübalin, gefentün luagu.

13 Bungiu au lúmagiñe súnwandan

úati gayaraati lesefuhan núhaburugugiñe

Siñati lagünrinchaguni ni aban le nadügübei».

14 Lariñahare Bungiu le Sándubei le Lubungiute Ísüraeli, le esefurubaliña:

«Lun nesefurunün, nóunahaba gürigia Babilónia,

ábame nánhunrenchagüdüni sun bena,

ábame lagarabaagun hagundan Kalüdéana lun igarigume.

15 Au Aburemeibei, le adügübalin Ísüraeli,

au Búngiubei le Sándubei le hurúeite».

16 Darati Aburemei aban üma baranahagiñe,

aban üma labadinaguagiñe lérouga;

17 aba ladügün lun háfuridun súdaragu tau burí hakarün

hama hagabayun lun lagünrinchaguniña.

Aba hábürühan siñá hásaarun,

aba hagumuchun kei téñeguchun mecha.

18 Guentoti, lariñahare Bungiu houn lánigu:

«Maritagua humá luagu wurinouga,

masaminara humá luagu le sügühalibei.

19 Nadüga aban katei iseri,

ani hariha luagu lasusereda lan reiti guentó.

Nadaara aban üma lidan fulasu mageirawati,

luma duna éibaaguati lidan múa marandarunti.

20 Híchuguba animaalugu áraabuna,

hama awesüturusu hama ounli áraabuna uéiriguni nun,

luagu nasaliraguagüdün duna lidan fulasu mageirawati,

luma duna éibaaguati lidan múa marandarunti,

lun hatun numutuniña ha nanúadirubaña,

21 gürigia ha nadügübaña lun heremuhan nuagu.

22 «Gama lumoun buguya, Ísüraeli, lumutuniña Hakobu

magúahantibu nun, bucharügüti buagu nubá.

23 Madagaragüdüntibu mudún nun,

míchutibu uéiriguni nun lau badagaragüdün.

Au mabuchadagüdüntina buagu amuriaha idewesei buma,

mamuriahan au kupali buma.

24 Magañeihantibu maburu hémeti lun banügüni nun keisi idewesei,

mamuriahan au buma lun banügün hagüle animaalugu adagarawagüdütiña nun.

Buchagüdarügütibu nuagu lau burí bifigoun;

gáñigüda bumutina lau burí bisalufurin.

25 «Gama lumoun au, ladüga Bubungiute nan bulíei numuti bumabuchahan,

ani maritagunbadina luagu bifigoun

26 Anhein anihein lubéi nadüga bun le mínsiñeti bun,

barǘ waméi ligibugiñoun aguseragüdüti.

Ariñagabéi le lunbei bariñaguni,

arihúa láamuga anhein madurun bubéi.

27 Afigouhati furumiñeti badügawagun,

garabaguatiña bumaisturungu nuagun;

28 wíyeda hamutu gumadimatiña nitenpulun;

ligía nígirunbei lun hagünrinchawagun Ísüraelina

ha lánigu Hakobu, anabúa hagía».