1 Lagünrinchagubei Wabureme ubóu,

lamaladagüdübei, chagaguagüdaláñame lílana.

2 Ábanmemebei lun fádiri kei houn lílana fulasu,

lun iyubudiri kei lun idamuni,

tun iyubudiri kei tun idamuni,

lun le agañeihabei kei lun le alugurahabei,

lun le íchugubei furedeiti kei lun le ibihubei furedeiti

lun le adúeihabei kei lun le adueirúabei.

3 Lagünrinchawaguba ubóu sunsuinagubei,

lasagarahóuba sunsuinagubei.

Lugundun ligía lariñagubei Wabureme.

4 Mábeiti múa aba lásaürün,

mábeiti sun ubóu aba lásaürün,

aba lírudagun sielu luma múa.

5 Rúhaña lílana fulasu minebeni lun hageira,

lugundun máhaaña hagunfulirun lau lúrudu,

rúhaña mebereseni lau gumadi,

magunfulirun hagía lau nidaradun.

6 Ligía lagumuchunbei aban íñarawaguni lau fulasu,

ábati hasufuriruni lílana abeichúni ligía.

Ligía míbeeña lubéi, ani fiúrügaaña gürigia erederutiña.

7 Késiharu diwéin, sándiharu beibei-agei,

ha meha gúndaabaña buin haña lau íruni.

8 Gumugua ugundani lau garanwoun tuma árüpa,

maniha ha meha efeduhabaña eremuha hagía.

9 Matunwaarume diwéin lidan leremuhóun uremu;

lagifiduba uniñein houn gátaatiña.

10 Gumugua uburugu le meha lagei chagaguaü,

siñá lebelurún tidoun ni aban muna.

11 Ayahuahatiña gürigia ǘmada luagu tikesin diwéin;

gumugua sun ugundani úaali ugundani ubouagu.

12 Günringua uburugu, áhalaha lubenari.

13 Ítara luba lidan sun néchani le ubouagubei:

Kei dan le tátühoun aseituna lau wewe

o dan lan le táluahoun beibei lárigi alubahani.

14 Hame esefurutiña luéi óunweni,

hagúaraguba buin lau ugundani,

hiñurubei hamala luéigiñe oubaü le ñeinhin lubéi lálüda weyu

danme harihini luéirigun Wabureme.

15 Híchuguba ha aganóubaña luéigiñe oubaü

le ñéingiñe lubéi laboucha weyu uéiriguni lun.

Híchuguba ha aganóubaña kósurugu

uéiriguni lun Wabureme le Lubungiute Ísüraeli.

16 Aganba wamaali heremuhan lúmagiñe lébeha ubóu,

hariñaga lidan heremuhan: «Uéiriguni lun le richabei!»

Gama lumoun aba nariñagun: Fugiabu au, lanarime nilamiserun!

Ha gagarabaaguadibaña, adügatiña aban lanarime agarabaaguni!

17 Ítara haba lílana ubóu kei animaalugu ha éibaahoutiña

o kei lan animaalugu ha lídantiña denchaü

lun hábürühan húyurugun o tidoun lan sádara.

18 Ha esefurutiña hawéi éibaahatiña, héiguaduba húyurugun,

ha áfuridutiña húyurugugiñe hábürühaba tidoun sádara.

Lábürühaba aban guran huya siélugiñe,

ábame ladadagarun lebu ubóu.

19 Ladadagaruba múa lau anarimeni,

lánhingichuba, lañaünrüdaguba.

20 Latuituihóuba kei aban bacharuati,

lánhingichuba kei aban tagübüri muna to mederebuguntu.

Lábürühaba ladüga lihürü lifigoun, másaarunhalime.

21 Lídanme weyu ligía,

labeichubaña Wabureme ubafu burí ha siélubaña,

hama urúeigu ha ubouagubaña;

22 lóundarubaña ábame ládaraguniña tidoun aban furisun,

ábame lígiruniña ñein adaürǘwa,

saragu dan lárigiñe ábame labeichuniña.

23 Danme luadigimaridun Wabureme Suntigabafu keisi urúei,

luagu wübü Sión, luma Herusalén, láfuriduba weyu luma hati,

ábame harihini lábutigu fulasu luéirigun Wabureme.