1 «Huduguati bungiu Beli,

heigua ligía bungiu Nebu múarugun.

Barüwarügütiña hanagawagu gabayu,

ani hǘrütiña houn animaalugu buchaaña uagu.

2 Segeguatiña búngiugu, ábürüha hagía múarugun

siñati hesefuragun houngua,

hagía guánarügü barüwatiña lidoun fulasu mageirawati.

3 «Aganba humana, ladügawagun Hakobu,

sun ha erederubaña hádangiñe lánigu Ísüraeli:

Abayayaha naadün núhaburugu lúmagiñe lubaragiñe hágurahoun;

4 Ani ítarameme nuba huma danme haweiyadun;

nágüdahamemebadün danme le garubaadün.

Au adügübalün ani nabayayahamémebadün,

nágüdahabadün ani nesefurubadün.

5 «Kaba uma gayara lan hóuchaguana?

Kagia nenegebei según huguya?

6 Añahein asagarutiña saragu golu tídangiñe hasagüte,

amisuraha hagía pülata lidan balansu;

lárigiñe aba hadügün daradu luma aban gadiñeti

lun ladügün aban bungiu houn lun háhuduragun lun.

7 Aba hiñurahani hégewagun aba houdin lau;

aba hadagaragüdüni luagu lebu aba lerederun ñein,

mánhingichunga lídangiñe lubara.

Lau sun hagúaragun amuriaha luma lun líderaguniña,

móunabun lumutiña siñá lasagaruniña lídangiñe le gádanbaliña.

8 «Haritagua huméi katei le, huguya gafigountiña,

samina humá buidu ani darangilu humá,

9 haritagua huméi le susereelibei lúmagiñe binadu dan.

Au Búngiubei, úati amu nuéi;

Bungiu au ani úati amu kei au.

10 Ariñaga numuti le lunbei lasuseredun lúmagiñe furumiñeti dan;

ariñaga numuti le anitebei saragu dan lubaragiñe. Ariñagatina:

Lasusereduba sun le naransehabei;

nadügübei sun le naritagubei nadügün.

11 Wáhadina lun aban wügüri luéigiñeti oubaü le ñéingiñe lubéi laboucha weyu,

le lunbei liabin dísegiñe kei dunuru géigaahati

ábame ladügüni naritagun.

Ariñaga naali ani ítara luba nadügüni,

adüga naali naransehan ani nagunfulirubei.

12 «Aganba humana huguya gürigia deré tanigi,

huguya le aritagubei luagu dise lan esefuruni huéi:

13 Adügatina lun layarafadun nesefuhan,

madarasahanbei nesefuhan, le madiseelibei.

Nesefurubei Sión,

níchugubei nuéirigun lun Ísüraeli».