1 Katei le burí larufudubei Wabungiute lun Isaíasi le liráü Amosu, libügürü Babilónia:

2 «Iñura huméi liseinin wuribu luagu aban wübü le hiyaali!

Ru huméi dimurei houn súdara lun hagumeseruni wuribu!

Iñura huméi húhabu lun hebelurun luéigiñe habenari lirahüñü urúei!

3 Wáhadina houn nánigu ha ganigibaña,

rúhadina dimurei houn nánigu wuriburuguna ha deregeguabaña houngua,

ha agundaarubaña lau nagañeirun,

lun hagía lan abeiha neweñegua».

4 Aganbúati agúarahani luagu wübü kamá hagúarahan saragu gürigia.

Aganbúati hadürürühan néchanigu,

hadürürühan lílana burí fulasu ha óundaragubaña.

Aranse lumutiña Wabureme Suntigabafu lisudaran lubá wuribu.

5 Añatén lídangiñe aban ageiraü díseti,

yagürounmeme luéi leben warihin.

Wabureme ñǘbuinbei lau ligañi,

liábiña agünrinchaguei sun ubóu.

6 Hagúaraha, lugundun yarafaali luéyuri Wabureme,

liabin kei aban buleseiti lúmagiñeti Suntigabafu.

7 Ábameti lábürühan harüna sun gürigia,

súngubei heferidirubei hanigi,

8 herederuba súngubei lau anufudei,

hasandiruba aban íruni luma óunwenbu igari

darime lun haguribidagun kei würi to luntu tágurahan.

Haríaguba hawouguoun lau tueirin anigi,

ábame lásüdün hagibu lau busiganu.

9 Lachülüra luéyuri Wabureme, weyu hanarimeti,

lau igañi süti, lasaliraguba ubóu fulasume mageirawati,

ábame lagumuchun hau gafigountiña ha lídanbaña.

10 Marugoungadunhañame waruguma ni burí katei le siélubei;

keime láfuridun weyu, ítara laburigadun, marunihalime hati.

11 Lariñahare Wabureme: «Nabeichaali ubóu luagu luriban,

nabeichaaña wuribatiña luagu háfarahan,

nagumucha lau hapantan barügua tungua,

nǘnabudagüdaaña ha wéirigubei hanaagun houngua.

12 Nadüga lun hekesidun wügüriña

sügǘ lau golu fínuti le Ofirüna.

13 Ábameti lánhingichun sielu,

diñú ligíame ubóu lídangiñe lubara

ladügame lanarime nigañi lidan weyu ligía.

14 «Ítara haba gürigia kei usari éibaahoutu,

o kei mudún dan le hachagaragun,

úati kaba lan óundaraña.

Hagiribuduba kada aban hageiroun,

hanurahaba hageiroun guánarügü.

15 Le ígiraguagüdüti lungua lun ladarirún, límirawaguba,

le arügüdǘti, lafarúba hilagubei.

16 Haburechawaguba hasaanigu ha ñǘbürigiña hagibugiñe;

tasagarahóuba haban águrawagua hagíame hámarigu.

17 «Nínchahaaña Médiana hawagun,

gürigia ha meberesegúnbaña lau pülata ni lau golu.

18 Háfaragubaña nibureintiña tau gimara,

magudemehábutiña houn irahüñü figigiña,

ni houn irahüñü ñǘbürigiña.

19 Babilónia ligía haweirigunbei néchanigu,

uburugu le wéndetimabei lidan sun arúeihani,

lerederuba kei Sodoma luma Gomora

dan meha nagünrinchagunbalin.

20 Lerederuba Babilónia málouga,

maganóundigiaañame gürigia ñein,

merederagun hañame Arawiana ñein.

Nírügü óunigirutiña mudún

memeraaguagüdün hamaañame halügüniña mudún ñein.

21 Mesu áraabuna hagíaba aganawa ñein,

habuinchuba garún tidan burí muna,

awesüturusuba aganawa ñein tidan,

háhureruba giñe harahüñü gábara ñein.

22 Hagúarahaba chakali lidan burí wáyelesi,

ñéinbaña ounli áraabuna tidan burí palasiu wéndegutu.

Yarafaali lóurate Babilónia, míbeeli weyu lubá».