1 Gundaalá fulasu mageirawati, múa mábeiti;

buinla lau ugundani, legeleweha.

2 Hüchala fuluri ñein kei liriu,

buinla lau ugundani.

Labuiduragüdübei Wabungiute kei Líwanu,

fulasume arandarati lun bunaguaü kei Karümélu luma Sarón.

Harihubei sun gürigia luéirigun Wabungiute.

3 Ru humá erei houn ha méreeñabaña,

ru humá gurasu houn ha buchaañabaña uagu,

4 ariñaga humá houn ha hanufudebaña:

«Ganigi humá, manufudeda humá!

Anihán Hubungiute lun lesefurunün,

labeichubaña háganiñu keisi hadüna!»

5 Ábameti haganbun ha maganbunbaña

ariha hagíame ha marihinbaña;

6 hachubahaba ha méibugunbaña kei usari,

hagúarahaba ha mariñagadibaña.

Láwiyuhaba saragu duna lidan fulasu mageirawati, fulasu mábeiti.

7 Ábanbei lagunu fulasu mageirawati,

labuinchuba múa mábeiti lau lísensen duna.

Le ñein lubéi haganóua ounli áraabuna guentó,

labouchuba maburu luma híduru dúnaruguna ñein.

8 Ñeinbei aban üma gíriti «émeri sagüráuti».

Siñabei hásügürün ha wíyebaña luéigiñe;

méibugun hagíame ha maganbadibaña luéigiñe.

9 Úabaña liñún ñein,

mayarafadun hagíame animaalu gáñitiña ñeinhin.

Luéigiñeba üma ligía hagiribuda ha esefurubaña,

10 ha agañeiha láañabaña Wabureme;

hebeluruba uburugun Sión eremuheina lau ugundani,

ani habagariduba gúndaañu súnwandan.

Hadariruba ugundani luma ubunuruni,

lagumuchaguba ayahuni luma igarigu.