1 «Sun ha mágürabubaña, ñübuin hamá ata duna;

ha maseinsunbaña, ñübuin hamá,

ibiha humá türigu mafayeihanga lun heigin,

ibiha humá diwéin luma míligi mafayeihanga ni kata.

2 Ka uagu hewesirei hiseinsun luagu le mámabei fein?

Ka uagu hewesirei lebegi huádigimari luagu katei le makimuledagüdünti?

Aganba humana buidu,

ábame heigin éigini buiti, éigini semeeti.

3 Higougu numoun teni humá nun,

aganba humana ábame habagaridun.

Nadügüba aban daradu magumuchaditi huma,

lun nagunfuliruni füramasei le meha nadügübei lun Dawidi ladüga nínsiñehabu.

4 Ru numuti kei gefenti houn gürigia,

kei ábuti luma arufudahati houn néchanigu.

5 Bagúaruba houn gürigia ha ibidiñetiña bun;

gürigia ha buga ibidiñetibu houn,

hóudiba éibaagueina bumoun,

ladüga au, le Babureme le Bungiu Sánduti

le Lubungiute Ísüraeli, rúhadina uéiriguni bun.

6 Áluaha huméi Aburemei lau gayaraagili lan hadariruni,

háwaha lun luagu yarafagili lan.

7 Ígiralei wügüri le wuribabei lagübüri lémeri,

ígiraleime salufuriti luriban lisaminan;

giribu humá lun Aburemei ábame gudemehabu lan hun;

giribu humá lun Wabungiute, le mánginbei lun feruduna lanün.

8,9 Lugundun mítaranti nisaminan kei hisaminan,

mítaran nóuserun kei huguya.

Ítara kei lóugiñeñein lan múa sielu,

ítara giñe lóugiñeñein lan hisaminan luma hóuserun

nisaminan luma nóuserun».

Liña lariñagun Bungiu.

10 «Ítara kei lararirun huya luma niewe siélugiñe,

magiribudúnhali ñeinhin,

lubaragiñe lira aba ladüdüragüdüni múa,

arandaragüdalei, ru ligía ilaü lun ábunaguti,

ru ligía fein lun teigín,

11 ítara liña giñe dimurei le áfuridubei niyumulugugiñe,

magiribudúnti nun madügüngalei le nabusenrubei,

lubaragiñe lira adüga lumuti le nabusenrubei,

gúnfuli lumuti le nariñagubei.

12 «Háfuriduba ñéingiñe lau ugundani,

hagiribuduba hageiroun lau darangilaü,

Danme larihinün burí wübü, leremuhaba lau ugundani,

lapouhabei sun lídibu wewe le áraabubei lúhabu.

13 Láhüchüba lídibu gudi leweñegua hiiyu,

leweñegua híduru péisiniti labouchuba lídibu fuluri

laweiridagüdübei lira liri Aburemei,

ábanbei seini magumuchaditi le magünrinchaguaditi».