1 Aganbabéi katei le, tílana luban Hakobu,

buguya le anügübalin liri Ísüraeli,

ani ladügawagun Hudá buguya;

buguya le áfiñurubei lidan liri Wabureme,

buguya le agúahabalin Lubungiute Ísüraeli,

gama lumoun mama lau arumani ni lau úaraguni;

2 buguya le ariñagubei luagu lílana ban uburugu sánduti,

ani hemenigi ban luagu Lubungiute Ísüraeli,

le gíribei Aburemei Suntigabafu.

3 Ariñaga numuti le sügühalibei bun lúmagiñe binarü;

au guánarügü asubudiragüdübalin.

Sódini aba nadügüni naritagun, aba lasuseredun.

4 Keiti subudi nubalin deré tan banigi,

luagu ítara tiña lan kei gürabu,

mabaruchaguadi tuguya kei buronse,

5 aba nadimurehani bun lúmagiñe binarü,

ariñaga numuti bun lubaragiñe lasuseredun.

Luéi bariñagun: Nuguariuan adügübalin,

guáriua le nadügübei abusenrubei lun ítara luba lan.

6 «Aganba baali sun le; tenibá lun,

ábame bánharun luagu inarüni lan.

Guentó nadimureha bun luagu burí katei iseri,

katei le burí aramudaguati le ibidiñeñahati bun,

7 katei le burí adügüti guentó, mama lidan binadu dan,

le uágubei maganbunñahagidibu lan darí uguñe.

Mariñagun báamuga: "Subudiñaha naali".

8 Maganbunñahagidibu ladimurehoun luagu,

ibidiñe ligía burí bun,

lugundun darugu liñaha barigei súnwandan.

Subudi numuti luagu magunfulin ban,

luma luagu wa hamá bun mabuchahati lúmagiñe bágurahoun.

9 «Gama lumoun gaguraasuntina bubá luagu ninebengua nungua,

ligía nárügüdagunbei nungua luéi nagünrinchagunibu.

10 Harumagüda numutibu gama lumoun mama kei ladügǘn lun pülata,

hóuchaguarügü numutibu lidan régigi le lánina asufuriruni.

11 Luagu nineben nadügei lira,

lugundun siñati lawiyedúniwa niri.

Mígirunbadina lun lichugún nuéirigun lun amu».

12 «Aganbabána, Ísüraeli, lumutuniña Hakobu,

ha únbaña wáhadina lan:

Áurügüñein Bungiu,

au furumiñebei luma agumuhóuni.

13 Lau núhabu nederebudagüdei ubóu;

lau núhabu nátulerei sielu;

kei níriduni liri, aba burí lasaliragun.

14 Óundaragua humá sun huguya, aganba humá:

Ka hídangiñe ariñagubalin sun le,

le lunbei lasuseredun,

luagu wügüri lan le anúadira naalibei,

ladügübei lan le naritagubei nadügün lun Babilónia

luma houn harasan Kalüdéana?

15 Au ariñagubalin, au agúarubei lun,

aba nadügün lun liabin,

ani lagañeiruba le ñein lumuti lidin.

16 Yarafa humá nun, aganba huméi le:

Lúmagiñe furumiñeti dan, madimurehantina aramudaguarügü;

ani dan le lasuseredunbei sun katei le, ñéinñadina.

Guentoti ru naali nubafu lun, au le Aburemei,

ani óunaha naali».

17 Lariñahare Bungiu le besefuragüle,

Bungiu Sánduti le Lubungiute Ísüraeli:

«Au Aburemeibei le Bubungiute;

arufudaha numuti le buídubei bun,

adundeha numutibu luéigiñe üma le lunbei bafalaruni.

18 Adügaadibu hamuga gasu lau nererun!

Aganwoundeina liña hamuga lubuidun dan bun kei duna éibaaguati,

ítara liña hamuga bawanserun kei lugudi barana,

19 Saragu haña hamuga badügawagun

siñá hamuga habahüdün kei sagoun le lárubei beya;

magünrinchagun numutiña hamuga,

madireirun numutiña hamuga giñe luéi narihin».

20 Furí humá Babilóniagiñe, hanuraha hawéi Kalüdéana.

Agúaraha huméi uganu le lau ugundani,

subudigüda huméi chülǘ lumoun lígirugu ubóu.

Ariñaga humá: «Sefu laali Bungiu Hakobu le eseriwidubei lun!»

21 Lau sun sügügüda lániña lídangiñe burí fulasu mageirawati,

mamagürabuduntiña,

bougua lumuti dübü aba láfuridun saragu duna lídangiñe.

22 Ánheinti houn ha wuribabaña úati lubuidun dan.

Aburemei ariñagubalin.