1 Dimurei libügürü fulasu wayati le lani uénedü:

Ka suserebei hawarirunbei súngubei tábulugun muna?

2 Uburugu buinti lau chagaguaü luma anarimeni,

uburugu lumada efeduhani,

mama táfaragun eféin bánigu,

mama wuriburugu hóunwegua;

3 éibaaguatiña bábutigu anuraheina,

lidan hanurahan tuéi gimara ligía hadaürüniña.

Buwügüriñanigu ha ganigitimabaña,

éibaaguatiña anuraheina dise,

gama lumoun dáüwatiña.

4 Ligía nariñagunbei:

«Dise humá nuéi, busentina nayahun lau igarigu;

máluaha humá hámalihanina luagu halamiserun nánigu».

5 Ladüga arufudaali Wabureme Suntigabafu

aban weyu le luéyuri anufudei,

günringuaü luma chagaguaü lidan fulasu wayati le lani uénedü.

Lábürühaña burí barieiru;

aganbúati agúarahani chülǘ luagun burí wübü.

6 Aranse hamaaru Elamüna hagimaran,

wariñuhaña tidan burí hakarün luma hawagu hagabayun;

sagá hamutu lílana Kirü hadaüdina lauti gürabu.

7 Buin liña burí lubuidun-agei fulasu wayati tau karü,

añahein ha hawagubaña gabayu luagu lubenari uburugu.

8 Úati buga kaba lan au lageindagua Hudá luougua.

Lidan weyu ligía, ariha humutu tagei áruma to tídanboun muna to dabíararuguboun, 9 ariha humuti burí gubaguati le luágubei luburugute Dawidi aba habuinchagüdüni lagei duna le ǘnabubei; 10 aba haríaahanu muna burí to Herusalénboun, aba hágurun fiu tídangiñe lun haransehani baríeiru. 11 Aba hachigin aban fusu labadinagua bián baríeiru lun lésehan duna le lídanbei binadu lagei duna. Gama lumoun metenitün lun le adügübalin sun le, le aranserubalin lúmagiñe binarü.

12 Weyu ligía, amisuraha lumutün Wabureme

Suntigabafu lun hayahun, lun hasakürihan lun hásaruni hádiburi,

luma lun hadaürün daüguaü súsutu liseinime igarigu.

13 Gama lumoun le hadügübei, hefeduhaña,

áfaraha bágasu hama mudún, eiga luma ata diwéin.

Hariñaga: «Weiga, wata, ladüga haruga wóunwegun».

14 Aba lasaliragun Wabureme Suntigabafu nun,

aba lariñagun narigeirugun:

«Úabei ferudunanani figóu le hun;

lubaragiñe lira, hóunweguba.

Wabureme Suntigabafu ariñagubalin».

15 Lariñahare Wabureme Suntigabafu nun:

—Beiba arihei Sebüná le ábuti lúbiñe urúei, bariñagame lun:

16 "Ka san bumegenbei ya, ka íchugubei irichaü bun

lun badügün aban umúahaü, ya lidan liñun-agei fulasu

luma lun bachigin aban bubara luagu dübü lun bemeraagun?

17 Lágurubadibu Wabureme diseun,

kei ladügüni aban wügüri héreti.

Lárügüdübadibu lau erei,

18 labalabaagüdübadibu kei aban bali,

ábame láhuchurunibu lidoun aban fulasu le wéiriti.

Bóunweba ñein tararamuba burí karü to meha bapantaagüle ñein,

buguyaba tibusigari luban biyubudiri.

19 Nagidarubadibu lídangiñe bubara,

nagidarubei bifisiute buéi.

20 Lídanme weyu ligía,

nagúaruba lun Eliakímü le liráü Ilükíasi;

21 nadaürüboun badaüragun luagu,

níchugubei bubelitin le lánina binebese luagu,

ábame níchuguni bubafu lun.

Ítara luba kei aban úguchili houn lílana

Herusalén luma houn lánigu Hudá.

22 Níchugubei tigelen luban Dawidi légewagu;

úabei ni aban gayaraati ladaaruni le ladourubei,

úame adouruti le ladaarubei.

23 Ítara luba kei aban lala urúei

le wéiriguti houn liduheñu lúguchi.

Nadügüba lun lárügüdün buidu lidan

lubara kei aban gürabu.

24 Gayaraabei ladahirún sun katei le gebegiti

le hámabei liduheñu lúguchi

hama sun ladügawagun luagu,

sun luwuyeri lirahüñü asiedu,

lúmagiñe kopu dagá lumoun fudu.

25 Lídanme weyu ligía,

lahulúba gürabu le buga derebugubei lidan lubara;

lahulúba ábame léiguadun,

ábame labouchagun sun burí katei le buga dibiñubei luagu".

Wabureme Suntigabafu ariñagubalin.