1 Fugiabu Samaria le lapantaagüle luma liridin Éfürain,

gürigia bacharuatiña; wendei lauti fuluri sáühali

uburugu le arihúbei lóugiñe fulasu buíduburiti,

haburugute gürigia ha tagumadirun diwéin!

2 Areidañu liña Wabureme aban wügüri héreti,

gabafuti kei lábürühan lúbara huya dereguati,

kei garabali héreti le gagünrinchaguaditi,

kei huya gárati, kei labuinchun fulasu.

Lachagahaba múarugun lau lúhabu,

3 buregualéime hapantagüle luma haridin

lílana Éfürain ha gátadibaña.

4 Wendei wéiriguti le lauti fuluri sáühali le,

le arihubei lóugiñe fulasu wayati le hilumati,

ítara luba kei furumiñetu igu lidan tidaani,

dan le larihinu gürigia, aba lárügüdünu lun léiginu.

5 Ábanbei ridi wéiriguti Wabureme Suntigabafu lidan weyu ligía,

aban wendei magadiñeti houn ha erederutiña hádangiñe lánigu,

6 ani líchuguba irichaü houn aguseragüdütiña tidan luban aguseruni,

luma anigi houn ha óunigirubalin uburugu.

7 Añahein giñe amu atuituihatiña lárigiñe hatun diwéin,

tuitui hagía lárigiñe hatun uniñein héreti:

Ítara kei fádirigu hama profetagu atuituihaaña lárigiñe hatun saragu diwéin.

Huchú lumutiña diwéin múarugun, ibidiñeguagüdalaña houngua.

Marihingüdaláña buidu, gibe ligía hasaminan dan hasiadihan.

8 Buin liña sun dábula lau lihahürüha ewerehani,

úati ni murusun fulasu harumati ñein.

9 Adimurehatiña nuagu, hariñaga:

«Liabin íchiga arufudahani woun,

arufudahei le lasubudirágüdübei Wabungiute woun!

Kamá hamuga irahüñü ñǘbürigiña wagía

10 ha agumeserutiña afurendeira aliihani: ba be bi bo bu!»

11 Ánhaña madügün gasu,

lauba dimurei le úati gunfuranda humá,

lau dimurei terenchati ladimureha Wabungiute houn gürigia ha.

12 Ariñagaali meha houn lubaramegiua:

«Anihán gálumaü, anihán emeraaguni;

emeraagualá le buchabei uagu».

Gama lumoun máhatiña hadügün gasu lau.

13 Ligía ladimurehaba lubéi Bungiu houn

kamá hamuga irahüñü ñǘbürigiña hagía ha afurendeirutiña aliihani.

Lun danme lan héibugun ábame héiguadun hanagangiñoun,

ábame habuleseirun, hábürühaba tidoun sádara ábame tárügüdüniña.

14 Aganba huméi lubeiti lererun Wabureme,

huguya gürigia wuribatiña ha agumadihabaña Herusalén.

15 Huguya hariñahare:

«Adügaadiwa aban daradu luma óunweni,

lun danme lan liabin lanarime lamiselu, lun madaga lan wawagun;

áluahaadiwa aramudaguni lidan iyeeni luma ounigirúni lidan eyeeraguni».

16 Ligía lariñagunbei Wabureme:

«Níchiga aban dübü Sión,

aban dübü anuadahóuti le gebegiti,

ligíaba dübü wéirigutimati, ani ligíaba ebu.

Le hemenigiti, gayaraabei darangilu lan.

17 Lidan bunaguaü ligía, irichaüba nayusura kei balu,

ísuruni kei amisuraagülei».

Aramudaguagülei le buga hálugubei lidan iyeeni,

lagünrinchagubei lúbara huya dereguati,

barüléime duna fulasu le ñein lubéi haramudagua.

18 Mebegibei daradu le buga hadügübei luma óunweni.

Lagadeiruba hidaradun hama hilaguaaña.

Liábinba lanarime lamiselu ábame laburechagunün

19 Ságüme liabin, laduruhanün.

Liábinba sagü binaafin, wéyuagu luma áriebu,

hadadagaruba láurügü haganbun luagu.

20 Ítara luba kei larounrúniwa tidan aban gabana bürüraütu

luma ladourawagun tau aban sidi ñǘraütu.

21 Luadigimariduba Wabureme kei luagu wübü Perasímü,

lagañiduba kei luagu fulasu wayati le Gabaón,

lun ladügüni luadigimari le aramudaguabei.

22 Gumugualá lubeiti libidiounigan aau le gádanbalün,

murutimaliñein higüringürin;

lugundun aganbaadina luagu aranseli lan Wabureme Suntigabafu lun lagünrinchaguni ageiraü.

23 Aganba huméi le nariñagubei,

aganba huméi nererun buidu:

24 Dan le lábunagua lan aban ábunaguti nadü,

meredeti awouhei múa súnwandan.

25 Ma lárigiñe lúaradaguagüdüni múa,

aba lafuruhani ilaü, lárigiñe aba lábunagun türigu,

bunagua ligía sewada luma burí amu ilaü laru laru?

26 Arufuda lumuti Wabureme lun, ida luba lan ladügüni.

27 Ladüga méferehounti enelidu,

mabalabahoun tuguya kareta ligibuagu kominu;

afuruhóuarügüti enelidu luma kominu lau aban liraüraü wewe.

28 Afarahóuati türigu gama lumoun lau dan ladügǘwa;

adügǘwati giñe lau lásügürawagüdün tubalaba kareta luéigiñe,

aba lasuesihouniwa ilaü machuinrunga ligía.

29 Ítara liña giñe ladügüni Wabureme Suntigabafu laranseha.

Garíawaseti burí laransehan, ladügübei lau óunwenbu lichú aau.