1 Lidan liri numada létima numada,

nagúaraali uremu le, tuáguti linadürigu beibei.

Ñeinñein bugaha aban ichari tau beibei luma numada

lidan aban múa le arandarati.

2 Aba laranseruni múa, gidalei burí dübü lídangiñe

aba lábunaguni lau lubuidun-agei beibei.

Aba ladügün aban wáyelesi lamidangua bunaguaü,

aranse ligía aban fulasu le ñeinba lubéi tadügǘwa diwéin,

agurabati yebe numada lalubahan beibei to bímetu

gama lumoun beibei garühütu ñǘbuinboun lun.

3 Guentoti lariñaga numada:

«Lílana Herusalén, gürigia Hudaana,

ariñaga huméi ka lan gadurunbei,

anhein nichari lubéi odi au lan.

4 Anihein san amu katei lun nadügüni lun nichari?

Anihein san katei madügün numuti lun?

Agurabatina yebe líchugun beibei bímetu,

Kati uagu líchugunbei beibei garühütu?

5 «Nariñagaali hun katei lan naritagubei nadügün lun nichari:

Nagidaraali lubarieirun luéi, günrinwagua láamuga;

nadaagua huyu luagu lubarieirun lun ladügürawagun;

6 nígiraali lungua.

Matirimuhóunbei burí tídibu beibei le ñeinbei,

magidahóun ligíame híduru luéi,

ábame labuinchun lau hiiyu luma híduru wuribati.

Nariñaga lun dúeri lun máhuyun lan huya luagun».

7 Ísüraeli ligía linadürigubei Suntigabafu le hínsiñetimabei lun

lílana Hudá ligía fuluri-agei le aubei lagundaara.

Agurabati yebe Wabureme lun yebe inebebei lan lilurudun houn,

ladarirarüga áfarahani,

agurabati yebe irichaü

ladarirarüga agúarahani lánina igarigu.

8 Fugiabugu huguya ha agañeihabaña saragu muna,

huguya le ibihubei saragu ichari,

darí lun mígirun humá ubaraü lun ni aban,

aranseraguatün hungua kamá huguyarügüñein fulasurugu!

9 Fiñuhali Wabureme Suntigabafu ariñaga nun:

«Tagünrinchawaguba saragu muna;

ani lau sun tuéinamun ani buidu burí tuguya,

úabaña aganóutiña tidan.

10 Darandi milu méturu ábunawaguti tau beibei,

ábanrügübei liraüraü barín diwéin líchugun.

Diisi sagü ilaü, ábanrügüboun sagü türigu líchugun».

11 Fugiabugu huguya,

ha saragiabaña lun houdin abacharuada, darí laguñeedun!

12 Lidan hufedun, afarúatu sun tuwuyeri árüpa, garanwoun tuma fidu,

luma saragu diwéin lun hátagun;

gama lumoun metenitün lun le ladügübei Wabureme,

mebereseguntün lau luadigimari.

13 Ladüga lubeiti hamahan numutuniña gunfuranda hamá,

hasagaruba hageiragiñe lidoun amu fulasu.

Sun lílana fulasu hau sun hábutigu,

láfaragubaña ilamaü luma mágürabu.

14 Wagaguati umúahaü kei animaalu gáñiti,

lun láhuluchuniña lílana fulasu hau sun hábutigu,

gürigia ha aganóubaña lidan hagundan.

15 Herederuba gürigia lau ǘnabugubuni le gumuti,

habuluchaguba ha pántabaña.

16 Larufudubei Wabureme Suntigabafu luéirigun lidan guséi;

Larufudubei Wabungiute le Sándubei luagu sandu lan,

lau laguseragüdün lau irichaü.

17 Lagünrinchawaguba burí uburugu,

ábame heigin mudún hama gábara sagadi lidan lárigirugu.

18 Fugiabugu huguya, huguya le aduruuhabalin wuribani lau hiyeeni;

huguya le aduruuhabalin figóu kei tachawahóun aban karü!

19 Huguya le ariñagubei:

«Adügaléi Wabungiute le lunbei ladügüni furese, ariha wamaamugei;

gúnfulilei Lubungiute Ísüraeli le sándubei laransehan, subudi wamaamugei».

20 Fugiabugu huguya le agúarubei lun le buídubei wuribati,

hagúara lun le wuribabei buiti;

huguya le aburigadagüdübalin larugounga,

harugoungadagüda luburiga;

huguya le agifidagüdübalin le bímebei,

bímegüda huméi le gífibei!

21 Fugiabugu huguya le anaagubei hungua kei chu tau,

haritagun, luagu huali lan hichügü!

22 Fugiabugu huguya le anügübalin furumiñeti fulasu

lidan latuniwa diwéin,

ani úati ni aban agañeirutün lidan tachouhóun diwéin!

23 Huguya le agidarubalin lidurun le gadurunbei luagu seinsu,

ani michu humuti liricha le madurunbei lun.

24 Ligía ítara lubéi kei láguduni watu gemeti sagadi sáühali,

ítara kei lagumuchaguagüdüni watu gemeti ubanaü sáühali

ítara luba giñe hagumuchagun,

kei nadü to añaladuti tílagüle,

aba lagumuchagun tufulurin kei kaliki.

Ladüga híchugun mebereseni lun larufudahan

luma lererun Wabureme Suntigabafu, le Lubungiute Ísüraeli le Sándubei.

25 Ligía lagañidunbei Wabureme hama lumutuniña,

aba liñuruni lúhabu lun labeichuniña.

Hingiburiti wübü,

rédeiti burí hágubu hilaaña ǘmadarugu chagagu kei ifei múarugu.

Gama lumoun lau sun lira, magalumarúngili ligañi Wabureme,

anihamémegua ayawadagua.

26 Iñurati Wabureme aban fanidira,

aba línwinrun agúara lun aban néchani dísegiñeti;

lídangiñe lidise-agei ubóu liábingüdei.

Aba liabin furese, chülüti óufuda.

27 Úati débiliti ni bucharuaali hadan,

agagudúañu haña sun hagía buidu,

gürañu habelitin buidu,

úati ni aban lau tagürüga ligeidin hüchüguaali hadan.

28 Gágiritu hagimaran buidu, deregüda tebu buidu.

Ítara liña lúbara hagudi halügüniña gabayu kei dübü dereti,

ítara liña tubalaba hakarün kei aban hiriri;

29 Ítara liña hadürürühan kei ladürürühan aban liñún,

le áünhabei aban lárügüdüni líliru,

aba lidin lau úouga kaba lan agidarei luéi.

30 Néchani ligía, danme lachülürün weyu,

lahuuhaba kei barana luagun Ísüraeli;

ani anhein ñein arihiti ubóu,

larihubei hóuburagu lidan luburiga

búrime larihini larugounga ladüga liduru huánriñu.