1 Luagu aban dan, aban lóunahan Sarügón le lurúeite Asiria aban úfisi íñuguti uburugun Asüdódu, aba lábürühan úfisi ligía luagun uburugu Asüdódu aba lagañeiruni.

2 Lidoun dan ligía, aba ladimurehan Wabureme lídangiñe Isaíasi, le liráü Amosu, lariñaga lun:

—Ragaboun daüguaü súsutu to buáguboun buáriua tuma sabadu to luáguboun Bugudi. Aba ladügüni Isaíasi le lariñagubei Wabungiute lun, aba lerederun mageidinga tau murusun gamisa luougua.

3 Ábati lariñagun Wabureme:

—Rédeihali Isaíasi masabadunga tau murusun gamisa luougua luagu ǘrüwa irumu, kei seini lun Ehiptu luma Etiopía. 4 Ítara luba giñe lanügüniña lurúeite Asiria Ehiptuna hama Etiopíana lidoun, amu fulasu, wéiyaaña ñǘbürigiña, masabadunga ani surusu, lau hede bóugudin, lun hanügün busiganu. 5 Habuinchuba gürigia lau anufudei, nibusigari hagíame lau Etiopía le meha hemenigira, luma lau Ehiptu le meha hapantagüle. 6 Lídanme dan ligía, hariñaguba sun ha aganóubaña lidan kosu ligía: "Ariha humá ka lan gádanbalin fulasu le meha wemenigira, le meha úmabei woudin amuriaha ídemuei, lun lesefuruniwa luéi lurúeite Asiria". Ida lubati wesefurun guentó?