1 Aganba humana, lílana burí ubouhu,

teni humá nun néchanigu dísetiña:

Lúmagiñe lubaragiñe nágurahoun lagúara Bungiu nun;

írida lumuti niri lúmagiñe turageirugugidina núguchu.

2 Adüga lumutu niñeñe efeinme to hamanatu,

aramuda lumutina lúhaburugu,

adüga lumutina ábanme gimara gágiritu

aba lareidunina tidan tagei ligimaran.

3 Lariñaga nun: «Ísüraeli, nubúein buguya,

narufudubei nuéirigun buagu».

4 Ariñagaadina yebe núnguarügü:

«Nadagimeinhaadina luagu ni kata, yusu naali nere mébuga».

Lidan linarün katei,

lúhaburuguñein Bungiu nikesin,

lúmañein Bungiu nafayeiruaha.

5 Ibihaadina uéiriguni ligibugiñe Wabureme le Nubungiute,

ladüga ligía nérebei.

Bungiu adügübalina lúmagiñe turageirugugiñe núguchu

lun neseriwidun lun.

Lun nadügün lun lagiribudun Ísüraeli lun,

lun hóundarun lumutuniña Hakobu luma,

6 lariñahare: «Lóuguati lun beseriwidun nun

lúnrügü bóundaraguniña lani Hakobu türibu

luma lun bagiribudagüdüniña ha erederubaña wínwanñu hádangiñe Ísüraelina;

nadügüba lun leiti ban houn néchanigu

lun banügüni nesefuhan chülǘ lumoun lidise-agei ubóu».

7 Lariñahare Bungiu, le Esefuragülei,

Bungiu Sánduti le Lubungiute Ísüraeli houn gürigia ha meberesenwabei hau

ha iyereegubaña houn híbiri gürigia,

ha rédeihañabaña idamunime houn gürigia wuriba tigaburi:

«Danme harihinibu urúeigu hama hasaanigu,

hásaaruba, ábame habuluchagun bigibugiñe,

ladüga au, le Aburemei Sánduti le Lubungiute Ísüraeli,

anúadira náadibu, ani gúnfuli numuti nererun».

8 Lariñahare Bungiu:

«Chülüti dan lun narufuduni nareini bun, aba nóunabunibu;

chülüti luéyuri esefuruni, aba níderagunibu.

Areida numutibu lun nadügüni nidaradun hama lílana fulasu bídangiñe,

lun lararamawagüdünya fulasu,

lun hibihini múa le buga igirúaalibei,

9 lun lasagaruniña adaürǘtiña,

lun lafuranguagüdüniña ha lídanbaña luburiga.

Hadariruba sagadi laru sun üma,

hadariruba éigini houn habiñanigu lidan furumiñeguarügü fulasu mageirawati.

10 Malamabaña, mamagürabu;

mañawarihan lubaña weyu ni lárouga,

lugundun hínsiñetiña nun, ani adundeha numutiña,

ani nanügübaña lidoun lísensen duna.

11 Nadaaruba aban üma labadinaguagiñe wübü,

nachagahabei burí émeri».

12 Ariha humá! Añatén dísegiñe:

Híbiri luéigiñe nórute,

híbiri luéigiñe oubaü le ñeinhin lubéi lálüda weyu,

híbiri lóubawagugiñe Asuán.

13 Sielu, bagúaraha lau ugundani!

Ubóu, buinba lau ugundani!

Wübü, bagúaraha lau ugundani!

Lugundun ámaliha laaña Bungiu lánigu,

gudemehabuhaali houn lidan hadiheri.

14 Lariñahare meha Sión:

«Ígira láadina Aburemei,

bulíei láadina Nubungiute».

15 Gama lumoun Rédeiti funagia tínsiñehabu aban

úguchuru houn tirahüñü odi bulíei tumutiña?

Íbini hamuga tabulieiduniña,

au, mabulieidun nubadibu.

16 Bürüwañubiña núhaburugu,

súnwandan naritagun luagun bubarieirun.

17 Furesetimatiña ha araramayagüdübadibu

sügǘ hau ha agünrinchagubadibu;

ñǘdünha ha ábürügüdübalibu.

18 Iñurabéi barihin, arihabá geyegua bau,

arihabá lun hóundaragun súngubei aba hagiribudun bun.

«Au le Aburemei, fiñutina luagu nibagari

luagu ítara haba lan sun hagía kei uéndeni le lunbei badaürüni,

keisi tuéndegun aban adari.

19 Günringuaali bugaha bageira,

gama lumoun guentó ñǘraübei bumúan

houn ha lúnbaña haganóun ñein.

Añahein ha agünrinchagubalibu dise.

20 Birahüñü ha meha féridihañabaña hariñaguba barigeirugun:

"Ñǘraüyati ageiraü le woun;

álugaba fulasu woun lun waganóun ñein".

21 Ábame bariñagun bídangua:

"Ka íchugun isaanigu ha nun?

Masaanigutina meha, ani siñati meha gasaanigu nan;

Babilóniañadina meha keisi adaürǘtiña,

ka agüriahabaliña?

Ígira hamaadina meha nábugua,

halíagiñe hayabin?" »

22 Lariñahare Bungiu:

«Níchiga dimurei houn néchanigu;

níchiga aban seini houn gürigia

lun hanügüniña bisaanigu ha wügüriña háhaburugu,

hanügañame ha würiña hégewagu.

23 Urúeigu, hagíaba bagübürigu ha agüriahatibu,

lirahüñü urúei, hagíaba búyawa.

Habuluchaguba chülǘ múarugun bigibugiñe,

ábame héheluhani kaliki luéigiñe bugudi.

Ábame hasubudiruni luagu au lan Aburemeibei,

ani ha hemenigibaña nuagu, meyeedúnbaña».

24 Gayaraati san labayurún katei le lagañeirubei

aban wügüri héreti wuriburugu luéi?

Odi gayaraati lanurun aban adaürǘti

luéi aban wügüri le dereti lagumadihan?

25 Lariñahare Bungiu luagu gayara lan:

«Labayurúba le lagañeirubei wügüri héreti luéi,

gidawame lagañeirun deré tagumadihan luéi.

Nagagibudaguba hama ha áluahatiña wuribu buma;

au guánarügüba esefuraña bisaanigu.

26 Nafosurubaña ha íchugubaña lidere dan bun

lun héigini hágürügü guánarügü

luma lun habacharuadun lau hata kamá hamuga binu.

Ítara luba hasubudiruni sun gürigia,

luagu au lan le Aburemei Basalbaragülebei,

luagu au lan le Lubungiute Hakobu Besefuragülebei».