1 Lariñahare Bungiu:

«Maritagua humatia luagu ígiragua nan tuma Ísüraeli, to húguchu,

kei lígiragun aban wügüri tuma lúmari,

o luagu alugura naadün lan keisi idamuni

ladüga hamuga gadúeihan nan!

Ladüga hafigouhan halugurúnbei;

ladüga humabuchahan tigirúnbei Ísüraeli to húguchu.

2 Kagia uagu, madarirun nubéi ni aban dan le niábinbei?

Kagia uagu móunabun lubéi ni aban dan le nagúahanbei?

Haritaguatün yebe funagia luagu siñá nubadün lan esefura?

Buídurügüti nariñagun dimurei lun lamabeidun barana

luma lun lerederun duna éibaaguati kei fulasu mageirawati;

lun hóunwegun úduraü hamagürabu,

ñalagua hagíame ladüga lúan duna.

3 Dáüguagüda numuti sielu tau ludu,

daruguatina lau tau daüguaü to lánina íruni».

4 Arufudahaali Bungiu nun

lun níchugun dǘgüdaguaü houn ha buchaañabaña uagu.

Adügati lun deregüdagu nan sagü binaafin

lun naganbuni le larufudahabei kei lubudubu.

5 Rúhali Aburemei gunfurandaü nun,

ani aganba numuti, michu numuti nanagan luagun.

6 Ru numuti nanagan lun labeichún,

ígiratina lun lahulún nídiuma.

Madireirun numuti nigibu hawéi ha anabubalina suegua hamana:

7 Aburemei íderagubalina:

Ligía madügün lubéi anabúni ni kata nun;

ligía deregüdagu nubéi kei aban dübü,

subudi numuti luagu manügünbadina lan busiganu.

8 Anihein le ágüdahabalina nóubagiñe:

Anihein san somu gürigia le mama númagiñeti?

Keimoun ligibugiñoun aguseragüdüti!

Anihein san gürigia le sandiguati lungua garicha lan lun líchugun nidurun?

Ñǘbuinla ariñagei nun!

9 Aburemei íderagubalina;

kaba san gayara lasiadirunina?

Hagumuchaguba sun náganiñu kei gamisa to heigin hamutiri.

10 Huguya le íchugubei inebesei lun Bungiu,

ani aganba huméi lererun lubúein:

Anhaün éibuga lidan luburiga,

úouga ni murusun larugounga hau,

ru huméi hemenigin luagu Bungiu, balá humá luagun.

11 Ánhañati sun ha áfuragubaña watu

aranseha hagía gimara gemetu,

hábürühaba lidoun guánarügü watu gemeti le háfuragubei,

tau gimara to guánarügü hébeduboun.

Lóunahabei Bungiu abeichúni le hawagun

ábame herederun riwagu labadinagua asufuriruni.