1 Lariñahare Bungiu: «Adüga humá irichaü,

adüga huméi le úaraguabei,

lugundun málühadina ánhana ñübuin esefuraün,

narufudubei nubafu le lánina nasalbahan.

2 Fuleseiwatiña gürigia ha afalarubalin gumadi le,

gúnfuli haméi lau úarani,

ha inebehabubaña lun luéyuri emeraaguni

ani mawiyedun hamuti,

ha góunigibaña lun madügün hamá ni kata wuribati».

3 Anhein ederegeragua aban terencha lungua lun Aburemei,

moun lumuti lariñagun:

«Lígirubadina Bungiu dise hawéi lumutuniña».

Moun lumuti giñe lariñagun wügüri le sáfunwaali:

«Aban tídibu wewe mábeihali au».

4 Lugundun lariñahare Bungiu:

«Anhein inebe luéyuri emeraaguni houn wügüriña safun,

anhein hagunfulira nugundan,

deregüdagua hagíame lidan nidaradun,

5 níchuguba katei buítimati houn sügǘ hau isaanigu;

nadügüba lun lerederun hiri bürüwañu lun sun dan

tidan nitenpulun lurageirugu nubarieirun;

níchuguba aban iri magumuchaditi houn,

le lunbei maguludúnwadügübei lan.

6 Terencha ha ederegeragutiña houngua nun lun heseriwidun nun,

luma lun nínsiñedun houn lun nubúeingu hamá,

anhein inebe luéyuri emeraaguni houn,

ani madügün hagía katei le moun lumuti ladügǘn lidan weyu ligía,

ani deregüdagua hagía lidan nidaradun,

7 nanügübaña luagun nuwübüri le sándubei,

ábame nagundaaragüdüniña tidan nuban to lánina afurieiduni.

Neresibirubei hadagaragüdün le gudawarügüti luagu nani latarü,

lugundun lúbaana afurieiduni ligíaba tiri nuban houn sun gürigia.

8 Nadügüba lun hayabin luma lun hóundaragun

ha añaheinguabaña lidan amu ageiraü keisi adaürǘtiña».

Liña lariñagun Aburemei le adügübei lunya hóundaragun Ísüraelina ha meha chagagubaña.

9 Higougu animaalugu gáñitiña;

higougu animaalugu áraabuna,

higougu héigaña mudún;

10 lugundun marihinhaña hóuniri numutuniña,

mefentiña luagu ni kata.

Ounli mariñagaditiña sun hagía siñati háwouhan;

róundügühaña sun weyu, ewenedüha,

hínsiñeti houn harumugun.

11 Ounli lamatiña hagía, ha makimuledaditiña,

hóuniri mudún ha úati gunfuranda hamá ni kata;

falá lumuti kada aban lémeri le labusenrubei,

lérügüñein buídubei houn háluaha.

12 Ariñagatiña: «Keimoun wáluaha diwéin

luma uniñein héreti lun wabacharuadun.

Haruga ábayame wadügün kei uguñe o sügǘ lan lau».