1 Dimurei luagu Damasüku:

«Mámaalime uburugu Damasüku;

ábanhalime lárigirugu fulasu.

2 Lerederuba málouga lun sun dan,

lerederuba héigagüleme animaalugu sagadi;

gayaraabei heigin animaalugu ñein darangilu.

3 Éfürain, le lapantaagülebei Ísüraeli,

maburugutehalime le baríeiruati;

ítara giñe, Damasüku le erederubei lídangiñe Siria

úaalime arúeihani ñein.

Wabureme Suntigabafu ariñagubalin.

4 «Lídanme weyu ligía,

leferidirubei Samaria le lapantaagüle Hakobu lere,

lagumuchaguba lubuidun lidaani.

5 Ítara luba kei dan le lalubahani alubahati türigu

aba labudahani lilimun lau lúhabu,

o kei dan labudahóun limu lidan fulasu wayati le gíribei Refaímü,

6 le ñein lubéi ígiragutirügüñein lan abulieidúti eredera,

o kei lan dan le lewenihóun oliwu

aba terederun biámarügü o ǘrüwa aseitúna lígirugu aban limu

o tibe-agei lan erederutu gádürü o seingü luagu tídibu.

Wabureme le Lubungiute Ísüraeli ariñagubalin».

7 Lídanme weyu ligía,

larihuba gürigia luagun le adügübalin,

luagun Wabungiute le Sándubei,

le Lubungiute Ísüraeli.

8 Marihindigiaalime luagun latarü ni luagun

burí amu katei le hadüga wügüriña lau háhabu.

Meberesendigiaalime lau ugudinaü sagüráuti,

ni lau burí latarü le ñein lubéi

lágudahoua kupali houn búngiugu.

9 Lídanme weyu ligía,

ligirúba burí buburugute le íñubei lubarieirun málouga,

kei ligirún burí haburugute Eweuna hama Amoruna

ladüga lanufudewa hawéi Ísüraelina.

Lerederuba burí uburugu ligía málouga,

10 ladüga babulieiduni Wabungiute le esefurubalibu,

maritagun bumuti luagu ligía lan baramudaguagülebei le chóurubei.

Bunagua bumuti lubuidun burí fuluri-agei le,

bunaguatibu nadü lidan liri aban bungiu terenchati,

11 aranseha bumuti lidan weyu le bábunaguni,

adüga buguya lun láhüchün larugan.

Gama lumoun danme liabin sandi luma

wuribani le mareidaguaditi leferidiruba alubahóuni.

12 Aganba huméi lamuri hareinchun saragu gürigia

kamá hamuga lamuri barana!

Ítara liña haréin néchanigu kei lamuri léibaagun duna héreti.

13 Gama lumoun dan le ladeinhan Bungiu houn,

aba hanurahan diseun kei ifei le lanügübei garabali

o kei lan híduru le laduruuhan luriban dan.

14 Hanarimetiña rábounweyu,

gama lumoun lubaragiñe larugadun, hilagua.

Ítara liña heben ha asagarahabaliwa,

ítara liña hagumuchun ha agünrinchagubaliwa.