1 Lariñahare Aburemei:

«Sielu lálanabei narúeihan,

ubóu lébubei nugudi.

Halíaba gayara lan hábunagun aban muna nun?

Halíaba gayara lan hadügün aban ubaraü nun lun nemeraagun?

2 Au guánarügü adügübalin sun burí katei le,

ítara liña ladügǘn súngubei!

Au, le Aburemei ariñagubalin.

Luagun gürigia le gudemeti ani nidiheri ligía nariha,

le inebehabubei lun nererun.

3 Gama lumoun añahein adagaragüdütiña aban bágasu wügüri,

áfara hagía aban gürigia;

bi hamuti ligiina aban mudún,

tigitiña giñe aban ounli;

adagaragüdatiña ilaü, adagaragüda hagía lita buíruhu;

águdahatiña kupali, huduguatiña giñe lun aban guáriua.

Ha anúadirubalin lagübüri igaburi iyereehabúti le,

hínsiñeti houn lun hadügüni katei burí le.

4 Nanúadirubei giñe asufuriruni houn,

nanügübei le ueibei hanufudeda houn.

Lugundun agúahatina, úati óunabutina,

adimurehatina, úati aganbutina;

adüga hamuti le unbei namahara,

anúadira hamuti le mínsiñebei nun».

5 Huguya le inebehabubei lun lererun Aburemei,

aganba huméi lererun:

«Hariñahare hupaisanun ha iyereehabúbaña hun,

ha éibaahabalün ladüga hagúahani niri:

Arufudaléi Aburemei luéirigun;

busentiwa warihinün gúndaañu

gama lumoun hagía, hanügüba busiganu.

6 Umalali le, le ñǘbuinbei uburugugiñe,

areinchuni le aganbúbei ténpulurugugiñe,

ligía areinchuni le ladügübei Aburemei

dan le líchuguni le hadünabei láganiñu houn.

7 «Águrahatu Sión lidan murusun oura,

lubaragiñe tagaridun.

8 Ka aganbaalibei katei ítaraburiti?

Ka arihaalibei líbeina katei le?

Saliguatiña lílana aban néchani lidan ábanrügü weyu?

Saliguati aban ageiraü lidan murusun oura?

9 Ida luba hamugagia nararamuni águrahani,

ani au águrahagüdübei?»

Aburemei le Bubungiute ariñagubalin.

10 «Gunda humá tuma Herusalén,

buin humá lau ugundani huguya le hínsiñehabubei tun;

gunda humá úara tuma sun huguya le ayahuahaalibei tuagu;

11 tuguya kei aban úguchuru tanurihabadün

lau dǘgüdaguaü darí hakimuledun.

12 Lugundun nariñahare au, le Aburemei:

Nadügüba lun liabin darangilaü tuagun

kei aban duna éibaaguati,

luma lirisin burí néchani kei aban duna afuluduhati.

Tátagüdübadün Herusalén keisi aban úguchuru,

tanügübadün tarünarugu,

ábame tasalagadunün lau saragu ínsiñeni.

13 Kei támalihani aban úguchuru tiráü,

ítara luba námalihanün,

ábame hadariruni dǘgüdaguaü Herusalén».

14 Danme harihini katei le, tagundaaruba hanigi;

láhüchaguba húgubu kei híduru.

Lasubudirágüdübei Bungiu lubafu hadan lánigu,

luma ligañi hadan láganiñu.

15 Lugundun liábinba Aburemei labadinagua watu gemeti;

ítara tiña likarün kei hiriri

larariraguagüdübei lanarime ligañi

luma watu gemeti le lánina labeihan.

16 Lauba watu gemeti ladügei Aburemei guséi,

laguseragüdübei sun ubóu tau lefeinte

ani saragubaña láfaragun hilagubei.

17,18 Lariñahare Aburemei:

Ha ederegeragubaña houngua lun hadügün kultu wíyeti lidan burí fuluri-agei,

afalareina aban le hamidanguabei,

ha éigibaña buíruhu, garadun o furumiñeguarügü animaalugu wíyetiña, hagumuchawaguagüdüba,

lugundun subudi numuti hóuserun luma hasaminan.

«Ábameti niabin óundaraguaña sun gürigia,

ábame hayabin, ábame harihini nuéirigun.

19 Níchuguba aban seini houn:

Nígiruba lun houdin fiu hádangiñe

ábame nóunahaniña lidoun burí néchani le:

Tárüsisi, Liwia, Lidia,

fulasu le ñein habéi gahandilihatiña gimara,

Tubali, Güresia, luma burí luagun ubouhu díseti

le ñein lubéi maganbúngili lan nuagu, marihín nuéirigun;

ábame hadimurehan houn néchanigu luagu nuéirigun.

20 Hanügübaña sun hupaisanun hádangiñe sun néchanigu,

hawagu gabayu, tidan karü, tidan hagei,

hawagu mile hama kameyu.

Ábanbei idewesei nun, uburugu Herusalén nuwübüri le sándubei,

kei burí edewehani le hanügübei Ísüraelina lidan weru harumati nitenpulunrugun.

Au, le Aburemei ariñagubalin.

21 Nanúadiruba hádangiñe lun fádirigume

luma lun Lewitagume.

Au, le Aburemei ariñagubalin».

22 Ariñagati giñe Aburemei:

«Ítara kei laduraruba lan iseri sielu luma iseri múa

le lunbei nadügüni lun sun dan,

ítara luba giñe hadurarun badügawagun luma biri.

23 Ságüme hati, lidan luéyuri iseri hati,

luma sagü luéyuri emeraaguni,

hayabinba sun gürigia áhuduragua nigibugiñe.

Au, le Aburemei ariñagubalin.

24 Hayabinba, ábame harihini hágubu hilaguaaña ha meha iñuragubaña houngua nuagun.

Móunwegunbaña héweraü ha éigibaliña,

méñeguchun ligíame watu gemeti le águdubaliña.

Ábanbaña katei le iyereehabúti houn sun gürigia!»