1 Tabahüdaguñein garudia to le lariñagubei luma le ladügübei Heremíasi, le liráü Ilükíasi. Heremíasi, hádangiñeti meha haduheñu fádirigu ha aganóubaña Anatótu, hamúanrugu lani Benhamín türibu.

2 Aba ladimurehan Wabureme lun Heremíasi lidan litareisin lirumudiri larúeihan Hosíasi le liráü Amón Hudá. 3 Adimurehayati giñe lun, lidan lidaani larúeihan Hoakimü, le liráü Hosíasi, lárigiñe lira ayanuhayati luma Heremíasi luagu saragu wéiyaasu darí dan le hanügǘnbei Herusalénna bóugudin luéi hageira, lidan liseingün hati lidan liunsun lirumudiri larúeihan Sedekíasi le liráü Hosíasi lasusereda.

4 Aba ladimurehan Wabureme numa, lariñaga nun:

5 «Lubaragiñebei bágurahouniwa,

lídanbei turageirugugidibu búguchu, anúadira náadibu

ani direi numutibu lun profetabadibu lan houn néchanigu».

6 Ábati nóunabun:

«Nabureme, au ñǘraügidina ani mariñagaditina!»

7 Gama lumoun aba lóunabunina Wabureme lariñaga nun:

«Mariñagabá luagu ñǘraügidibu lan.

Bídiba le ñeinhin lumuti nóunahabu,

ani bariñagubei le nariñagun bun lun bariñaguni.

8 Manufudedabá ni ka uéi,

ladüga búmabadina lun nóunigirunibu.

Au le Aburemei ariñagubalin».

9 Ábati látuleruni Aburemei lúhabu, aba laguuruni niyumaaru, lariñaga nun:

10 «Ru numuti nererun biyumulugún.

Níchuguña ubafu bun uguñe luagu arúeihani luma hawagu néchanigu,

lun báhulahan luma lun bagünrinchagun

lun bagadeihan luma lun baguludagun,

luma giñe lun bábunagun muna ítara kei nadü».

11 Aba ladimurehan Aburemei nun, lariñaga nun:

«Ka barihubei Heremíasi?»

«Aban tilimun alüméndüra» —niña lun.

12 «Binarün» —ligía Aburemei nun—.

«Aranseñu niña lun lagunfulirun nererun».

13 Ábaya ladimurehan Aburemei nun luagu libiaman wéiyaasu:

«Ka barihubei?» —liña lálügüdünina.

«Arihatina aban sóudieru áhuraha luéigiñe nórute,

ani lúnrügaali láwiyurun» —liña nóunabuni.

14 Ábati lariñagun Wabureme nun:

«Luéigiñeba nórute liabin wuribani hawagun

sun lílana fulasu le.

15 Au le Aburemei, chóurutina hun luagu nagúaruba lan houn sun arúeihatiña nóruterugugiñe.

Hayabinba harúeitegu,

ábame híchuguni lálana harúeihan lubenari Herusalén,

ligibugiñe sun baríeiru le geyegubei lau,

luma ligibugiñe sun burí luburugute Hudá.

16 Ligía abeichúni le lunbei nóunahani hawagun gafigountiña,

ha ígirubalina, ha águdahabaña kupali,

hudugua hagía houn búngiugu ha guánarügü hadüga.

17 Buguyati, ragüba anigi, beiba,

bariñageime sun le nariñagubei bun houn.

Manufudedabá hawéi, lugundun ánhabu anufudeda,

nadadagaragüdübadibu hagibugiñe.

18 Ru numutibu uguñe keisi uburugu derebuguti,

keisi wagabu lauti gürabu,

kei baríeiru lauti buronse,

lun bagagibudagun luma sun Hudá:

Hama lurúeitegu, lábutigu,

lufadirinigu, hau sun lílana.

19 Hawuribuhaba buma, gama lumoun magañeirun habadibu

lugundun búmabadina lun nóunigirunibu.

Au, le Aburemei ru numuti nererun».