1 Aba lariñagun Aburemei nun:

—Ni anhein ñübuin Moisesi luma Samueli arufudagua houngua nigibugiñe, magudemedunbaña gürigia ha nun. Ariñagabá houn lun háfuridun niñúarürugugiñe, lun houdin, 2 ánhabu hálügüda haliñounba lan houdin, bariñagame houn nóunahaña lan ariñaga:

"Ha siádiwaañabaña lun hóunwegun lau sandi,

lauba sandi hóunwegua;

ha lúnbaña hóunwegun wuriburugu,

lídanba awuribuhani hóunwegua;

ha lúnbaña hóunwegun lau ilamaü, lau ilamaü,

ha lúnbaña hasagarún hageiragiñe,

hasagarúba hageiragiñe".

3 Au, le Aburemei, nariñahare:

—Nóunaha gádürü ámuñegueina luwuyeri abeichúni hawagun: Háfarawaguba wuriburugu, haduruuhabaña ounli, héigibaña dunuru ha géigaditiña úi, héigibaña animaalu gáñitiña. 4 Nadügüba lun hanufudedun gürigia lau le lunbei nadügüni hau, ladüga le ladügübei Manasési, le liráü Esekíasi, le lurúeite Hudá Herusalén.

5 «Kaba gudemehabu bun Herusalén?

Kaba ahirudagua buagu?

Kaba eberesera luagu ida biña lan?

6 Ígira bumutina, ru bumuti banagan nuagun.

Au, le Aburemei ariñagubalin.

Ligía labuchadunbei nuagu bubá,

aba niñuruni núhabu lun nabeichunibu, aba nagünrinchagunibu.

7 Aba nachagaraguniña bumutuniña kei ifei

lau nasagaruniña fulasurugugiñe.

Ígira numutiña marahüñüga, aba nagünrinchaguniña,

ladüga hamahan hígiruni luriban habagari.

8 Ígiratina saragu würiña hilaguaaña úmarigu haganagua

sügǘ lau sagoun le lárubei beya.

Meni amidirugu nígiragüdei óunweni hawagun úguchurugu hau hasaanigu;

sódini nóunaha íruni luma anufudei hawagun.

9 Óunweeguatiña úguchurugu ha gibe tirahüñü,

aba herederun magarabalinga;

buin lau busiganu, aba lagarabaagun larugounga weyu houn lun luburigame.

Ánhaña eredera hádangiñe lau ibagari nóunahabaña háganiñu áfaraguaña.

Au le Aburemei ariñagubalin».

10 Fugiabu au, núguchu,

au le bagaraüdübei lúnrügü nasigenehan

luma lun nageindagun hama sun mutu!

Mafuredeirúngidina seinsu ni ka un, mafuredeirúniwa ligía nun.

Gama lumoun, sun gürigia íñaragua hamutina.

11 Dagala híñaragun nuagu, Nabureme,

anhein meseriwidun nubéi bun buidu,

anhein mayumuragun nubéi bun luagu hafulesein náganiñu,

dan le lídanñanu lan lamiselu.

12 «Gayaraabei funa san láhalachaguni aban wügüri ligürabun luma luburonsen Nórute?

13 Ítara liña giñe lásiñaruniwa lidere ligaburi ageiraü le áhalachawagua.

Luagu lubeiti liibe bifigoun, Ísüraeli,

nederegeraali birisin luma sun le bareidahabei,

sun le búmabei bumúanrugu houn báganiñu lun hanügüni.

14 Nígiraadibu lun hadamunme báganiñu lidan fulasu le ibidiñeti bun,

lugundun durunguaali nigañi kei aban watu gemeti

le lunbei lagumuchaguagüdünibu».

15 Aburemei, subuditi sun katei bun,

haritaguabá nuagun, higabu bíderaguana!

Bageindagua nuéigiñe hama ha éibaahabalina!

Mígirabana lun nounwen ladügarügü lueirin buguraasun houn;

arihabéi awanda nan anabúni buéigiñe.

16 Dan meha badimurehan nun, aganba numuti bererun;

ligía meha tugundan nanigi,

lugundun bani au, Nabureme Suntigabafu.

17 Móundaraguntina hama ha luágurügübei fedu haritagua;

lúmagiñe banügünina bánime, nábuguañadina,

ladüga gáñigüda lumutina figóu le hadaagubei.

18 Ka uagu magumuchadi lubéi nigarigu?

Ka uagu mareidaguadi lubéi biti le nuágubei?

Ítarahadibu nun kei aban duna chururunti,

húyarugu hanarimeti lidunari,

irumurugu aba lamabeidun kei abun.

19 Ábati lariñagun Aburemei nun:

«Ánhabu agiribuda nun, neresibirayabadibu,

ani gayaraabei beseriwidun nun.

Anhein bígira bayanuhan luágurügü bayanuhan,

bayanuharügüme yanu le gálati,

buguyaba adimureha náugiñe.

Hagía lúnbaña hagiribudun bun,

mama buguya lun bagiribudun houn.

20 Nadüga lun ítara ban houn gürigia ha,

kei aban baríeiru le lauti buronse le hénrenguti lun lagurúniwa.

Hawuribuhaba buma, gama lumoun magañeirun habadibu,

ladüga anahein buma lun nasalbarunibu luma lun nesefurunibu.

Au, le Aburemei ariñagubalin.

21 Nesefurubadibu lábugiñegiñe habafu salufuritiña,

nasalbarubadibu lábugiñegiñe habafu hanarimetiña!»