1 Aba ladimurehan Aburemei numa, lariñaga nun:

2 —Mamarieidabá, marahüñü buguyame lidan fulasu le. 3 Lugundun au, le Aburemei, nariñagaali bun kaba lan asusereda houn irahüñü ha agaraüdǘtiña lidan fulasu le luma houn hagübürigu. 4 Láfaragubaña lanarime burí sandi, úabei ayahuti hárigi, mábunahoun hagíame: Herederuba riwagu múarugu kei hádiga animaalugu, lagumuchaguagüdübaña wuribu luma ilamaü héigibei dunuru hama animaalugu gáñitiña hágubu le hilaali.

5 Ariñagati giñe Aburemei nun:

—Mebelurabá tidoun aban muna le ñein hamuti amuiserutiña lárigi hilaali; mayahuabá, marufudunbeime bigarigu luagu hilaali ligía, lugundun gidá naali darangilaü, nínsiñehabu luma nugudemehabu hawéi gürigia ha. 6 Wéinamuhaña, ñǘbürigiña, hóunweguba lidan fulasu le; úabaña ábunutiña, úame ayahutiña hárigi, ni arufudutiña igarigu hawagu, ni íbaagutiña ungua ni ásaruti hádiburi. 7 Úabei adügüti beluria, lun líchugun gurasu houn haduheñu, ni íbini anhein háguchi lubéi o háguchu lan óunweboun.

8 —Mebelurabá giñe eiga hama tidan aban muna le ñein lumuti adineruni. 9 Ladüga nariñahare au, le Aburemei Suntigabafu le Lubungiute Ísüraeli: Nadügüba lun lagumuchun eremuhani le lánina fedu lídangiñe fulasu le, luma eremuhani la lánina maríei. Lídanba huéyuri lasusereda, harihubei.

10 —Danme le bariñaguni uganu le houn gürigia, hariñaguba bun: "Ka uagu lóunahei Aburemei óunwenbu wuribani le wawagun? Ka wuribati wadügübei? Ka wafigounbei ligibugiñe Aburemei le Wabungiute?» 11 Bariñagame houn: «Lariñahare Aburemei: Ladüga hígirunina hagüchagu, aba houdin hárigi amu búngiugu lun heseriwidun houn, ígira hamutina, ani magunfulirun hamuti arufudahani le níchugubei houn. 12 Ani huguya wuribatimatün sügǘ hau hagüchagu lugundun falá humaali lagübüri hisaminan, maganbun humutina. 13 Ligía nasagarubadün lubéi lídangiñe fulasu le, lun lidoun aban ageiraü le ibidiñebei hun, ni houn hagüchagu, ábame heseriwidun ñein áriebu wéyuagu houn amu búngiugu, magudemehabubadina hun".

14 —Gama lumoun anitebei aban dan —au le Aburemei ariñagubalin—, lunme máfiñurunhaña lan ariñaga: "Luagu libagari Aburemei le asagarubaliña Ísüraelina Ehiptugiñe", 15 ariñagarügaañame: "Luagu libagari Aburemei le asagarubaliña Ísüraelina lídangiñe ageiraü le nóruterugubei luma lídangiñe líbiri burí ageiraü le meha ñeinhin lubéi lachagaraguaña". Nadügüba lun hagiribudun hageiroun, lidoun fulasu le buga níchugubei houn hagüchagu.

16 —Niábingüdüba saragu góuchahaditiña —au le Aburemei ariñagubalin—, lun hadiahaniña Ísüraelina. Lárigiñeme ábame nadügün lun hayabin éibaahatiña lun hagaliruhaniña sagá hamañame lídangiñe sun áraabu, wübü luma lídangiñe burí luhuyun dübü. 17 Lugundun aríaguniña lun sun le hadügübei, maramudagunti ni aban lídangiñe hafigoun luéi narihin. 18 Furumiñe, nafayeiragüdübaña dóbuli luagu hafigoun, ladüga hawiyeduni numúan hau hagübüri haguariuangu, ani lidan sun múa le níchugubei houn keisi halagante, adügatiña burí katei le iyereeguti nun.

19 Aburemei, buguya le nérebei,

le ágüdahabalina, naramudaguagüle lidan lidere dan;

hayabinba gürigia bumoun lúmagiñe lídangiñe lébeha ubóu,

hariñagame bun: «Búngiugurügüñanu móunitiña ha mabafutiña heresibira wagübürigu keisi alagan.

20 Gayaraati san ladügüniña wügüri guánarügü lubungiutegu?

Mama lubéi tímatimaatiña búngiugu hagía!»

21 «Ligía narufudaali lubéi nubafu hun,

subudi humaamugei luagu Aburemei lan níribei.