1 «Anihán tila gárada to lóunahaboun profeta Heremíasi Herusaléngiñe houn wéiyaaña mutu ha erederubaña hádangiñe ha anügǘbaña, luma houn fádirigu hama profetagu hama sun gürigia ha lanügübaña Nabukodonosoru Herusaléngiñe lun Babilónioun: 2 Lárigiñe láfuridun urúei Hekoníasi tau lúguchu, hama ha tílana palasiu, hama ábutigu Hudá luma Herusalén luma houn sun gürigia. 3 Gárada tuguya luma Elasá le liráü Safán, Gemaríasi, le liráü Ilükíasi lóunahoun Sedekíasi le lurúeite Hudá lumoun lurúeite Babilónia Nabukodonosoru. Lariñahare tidan:

4 Lariñahare Aburemei Suntigabafu, le Lubungiute Ísüraeli, houn sun ha lasagaragüdübaña Herusaléngiñe lun Babilónioun: 5 "Hábunagua muna lun haganóun tidan; hábunagua nadü lun héigini tin. 6 Maríei humá, garahüñügua humá, maríeigua hagíame hirahüñü lun giñe garahüñügua hamá gíbegua humaamuga ñein. 7 Huádigimarida luagu lufulesein uburugu le ñeinhin lubéi nanügagüdaün, hamuriaha numa luagu, ladüga anhein buidu lidin lun, buídubei giñe lidin hun. 8 Nariñahare hun, au, le Aburemei Suntigabafu, le Lubungiute Ísüraeli: Mígira humá lun heyeedunün profetagu hama garíaahatiña ha haganaguabaña; madüga humá gasu lau burí hawenedü. 9 Iyeeni le hariñagubei hun lidan niri. Mama au óunahabaliña. Au, le Aburemei ariñagubalin".

10 «Lariñahare Aburemei: "Danme lagunfulirun ǘrüwa-wein-diisi irumu lun Babilónia, nuadigimariba luagu hufulesein, nagunfulirubei nererun lau nagiribudagüdünün lidoun fulasu le. 11 Subudi numuti naransehan hubá, aransehani lun buiti mama lun wuribati hun, lun gayaraabei lan níchuguni dan le lunbei liabin buin lau emenigini hun. Au, le Aburemei ariñagubalin. 12 Ábameti hagúahanina, afurieida huguyame nun ábame naganbunün. 13 Háluahabadina ani hadarirubadina ladüga háluahabadina tau sun hanigi. 14 Nígiruba lun hadarirunina, nadügüba lun lasansiragun hubunurun: Nasagarubadün lídangiñe sun fulasu le meha ñeinhin lubéi nachagaraguaün, ábame nóundarunün, ábame nadügün lun hagiribudun lidoun fulasu le. Au le Aburemei ariñagubalin".

15 «Hariñahare: "Rúhali Aburemei profetagu woun Babilónia". 16 Lariñahare Aburemei libügürü urúei le luágubei lálana larúeihan Dawidi luma habügürü lílana uburugu le, ha hiduheñu ha manügǘnbaña huma lídanbei hasagarúniwa hageiragiñe: 17 "Nariñahare au, le Aburemei Suntigabafu: Nóunahaba wuribu, ilamaü luma sandi huagun. Nadügüba lun herederun kei igu ñalaaru to siñabei teigín ladüga lueirin turiban. 18 Néibaahabadün lau wuribu, ilamaü luma sandi, nadügüba lun sun lan ha arihitün hiyereegudún houn, nadügübadün hénpulume lani íñarawaguni luma busiganu, hanufunebadün lidan sun fulasu le ñeinhin lubéi nachagaraguaün. 19 Ladüga madügün hamá gasu lau eweridihani le nadügübei hun hádangiñe nani profetagu, ha nóunahabaña saragu wéiyaasu ani maganbun humutiña. Au, le Aburemei ariñagubalin. 20 Aganba huméi lubeiti nererun, sun huguya le nasagaragüdübei Herusaléngiñe lun Babilónioun".

21 «Lariñahare Aburemei Suntigabafu, le Lubungiute Ísüraeli libügürü Aabü, le liráü Kolaíasi luma libügürü Sedekíasi, le liráü Maseíasi, ha adimurehabaña iyeeni hun lidan liri Aburemei: "Nadügüba lun hábürühan labun lubafu Nabukodonosoru le lurúeite Babilónia, ábame láfaraguniña higibugiñe. 22 Dánmeti habusenrun lílana Hudá ha Babilóniabaña híñaragun aban gürigia, ábame hariñagun: Adüga láamuga Aburemei bun kei ladüga lun Sedekíasi luma lun Aabü, ha lásürahabaña lurúeite Babilónia lidan watu gemeti. 23 Lasusereduba le houn ladüga hadügün burí katei wuribati Ísüraeli: Adaaguatiña agabarahani hama hámarigu wügüriña háledigu, ariñaga hagía burí iyeeni lidan niri le mama nariñagun houn lun hariñaguni. Subudi numuti ani gefentina luagu. Au, le Aburemei ariñagubalin" ».

24 Aba lariñagun Aburemei lun Heremíasi lun lariñagun lun Semaíasi, le Neelamüna:

25 —Lariñahare Aburemei Suntigabafu, le Lubungiute Ísüraeli: "Óunahatibu aban gárada luagu biri houn sun gürigia ha Herusalénbaña, luma houn sun híbiri fádirigu. Bariñahare lun Sofoníasi tidan gárada tuguya: 26 Ru laadibu Aburemei fádirime leweñegua Hoyadá lun buguyaba lan óunigiruti ténpulurugu le íñutimabei. Anhein ñübuin aban lülü tau adimureha keisi profeta, lunti badaürüni bagüragueime lau güringüri. 27 Kati uagu madeinhan bubéi lun Heremíasi le Anatótuna, le adimurehaalibei higibugiñe keisi profeta? 28 Darí lun óunaha lan aban gárada woun Babilónioun, le ñein lubéi lariñaga: Haduraruba gürigia ha asagarúbaña hageiragiñe saragu dan; bunagua humá muna lun haganóun ñein, bunagua huguyame nadü lun héigini tin".

29 Aliiha lumutu fádiri Sofoníasi gárada tuguya lun Heremíasi. 30 Ábati ladimurehan Aburemei lun profeta Heremíasi, lariñaga lun: 31 «Óunahaba ariñaga houn sun ha asagarúbaña hageiragiñe luagu nariñahare lan houn au le Aburemei: Kei adimurehaali lan Semaíasi le Neelamüna hun lidan niri móunahanganei, ani rúhali aban emenigini málati hun, 32 nariñahare au, le Aburemei luagu nabeichubei lan Semaíasi hama ladügawagun. Madügawagunbei hadan numutuniña, mafanran ligíame lidan ugundani le lunbei níchuguni houn numutuniña, ladüga garabaguagüda laaña nuagun lau lererun. Au, le Aburemei ariñagubalin».