1 Anihán ñunsu lúmagiñe Aburemei libügürü Amón:

«Hagaña san lirahüñü Ísüraeli?

Hagaña ha lúnbaña heresibiruni halagante?

Ka uagu bungiu lubéi Milükómu laburemebei Gadü guentó?

Ka uagu haganawa Amonna lidan burí luburugute?

2 «Nariñahareti au, le Aburemei:

Lachülürüba weyu lun naganbagüdüni agúarahani lánina wuribu

lun uburugu Amón le lani Rabá;

lerederuba kei paili hime,

láguduba burí sun fulasu geyegua lau.

Ábayameti lárügüdüni Ísüraeli luburugute lárigoun.

Au, le Aburemei ariñagubalin.

3 «Bamumeha Esübón, ladüga gulúagua uburugu Ai!

Hayahuaha, würiña lílana Rabá!

Daügua humá ludu,

áfaraha huméi haniguagu!

Éibaagua humá kei lülü tau, bigua humá hungua!

Ladüga lanügǘwa bungiu Milükómu lidoun fulasu le mama hageira,

hau lufadirinigu hama gürigia wéirigutiña.

4 Ka uagu banaagua bungua luagu bere?

Lagumuchuña bere mabuchahati buguya le,

buguya le hemenigibei luagu irisini le bóundarubei, ariñaga buguya:

"Kaba ñübuin nuagun?"

5 Nóunahaba anufudei buagun lídangiñe sun fulasu.

Au, le Aburemei Suntigabafu ariñagubalin.

Héibaaguba sun huguya,

kada aban luagu lémeri,

ani úabei kaba lan óundaraguaün hárigoun.

6 Gama lumoun lárigiñeme, nasansirubei habunurun Amonna.

Au, le Aburemei ariñagubalin».

7 Anihán ñunsu lúmagiñeti Aburemei Suntigabafu libügürü Edomu:

«Úaali san lichú aau Temán?

Ibidiñeeli san houn huali tichügü kaba lan hadüga?

Féridiha san lichú hau?

8 Lílana Dedán, furí humá éibaagueina,

heiba aramudagua!

Ladüga nagünrinchaguaali Esaú,

chülüha dan lun nabeichuni.

9 Lidan le talubahóuniwa beibei,

súnwandan ligirúniwa fiu liresimun;

dan le hayabin íweruhatiña áriebu,

lérügüñein hemegeirubei hanüga.

10 Gama lumoun ígira naali lageira Esaú málouga,

darina burí laramudaguagüle, siñá laramudagun.

Günrinwagua lirahüñü, liduheñu hama lubesinanigu,

meredeeli ni aban lun lariñagun:

11 "Ígirabaña méteñuhaña nun, nóunigirubaña.

Hemenigi hamá würiña hilaguaaña úmari nuagu" ».

12 Lariñahare Aburemei:

—Guraaña ligía ha yebe madünabei hatun lídangiñe likopun abeichúni, meredebadibu mabeichúnga, gasu giñe batun lídangiñe. 13 Au, le Aburemei fiñú numuti nuougua: Lerederuba uburugu Bosurá kei fulasu mageirawati, günrinwaguañu keisi hénpulu lánina íñarawaguni, lerederuba giñe líbiri uburugu günrinwaguañu lun sun dan.

14 Chülühali aban uganu nun lúmagiñe Aburemei;

anihein aban apurichihati hadan néchanigu lariñaga:

«Óundaragua humá, heiba ábürüha luagun Edomu!

Aranse humá lubá wuribu!

15 Nadügüba lun buguyatima lan ñüraü hadan néchanigu

létima iyereegubei haganagua wügüriña.

16 Ígiraguagüdaadibu bungua lun leyeedunibu banaagun bungua,

ladüga hanufuneñahatibu.

Lidan lilulun dübü baganawa,

ragüñu babua luéigiñe lábulugu wübü.

Gama lumoun íbini ánhabu adüga bumasa ítara iñun kei ágila,

narariragüdübadibu ñéingiñe.

Au, le Aburemei ariñagubalin».

17 —Hanarimebei lueirin lagünrinchagun Edomu, darime lun líchugun anufudei. Sunme ha ásügürütiña ñéingiñe hanufudedaguba lau labeichún, 18 lerederuba kei Sodoma luma Gomora luma burí líbiri uburugu le lubadubei, dan le meha lagünrinchawagunbei. Maganóundigiaali ni aban ñein, másügürünwame ñéingiñe. Au, le Aburemei ariñagubalin. 19 Niábinba sódini kei aban liñún le áfuriduti lídangiñe búbugati le lani Hordán, lidoun fulasu le ñein lumuti sagadi hilumati súnwandan, ábame nanuragüdüniña lílana Edomu ñéingiñe, ábame nagumadihagüdüni le nasuesihan ñein. Ladüga, kábagia ítara kei au? Kábagia óuchagua lungua numa? Ka hóuniri mudún gayaraabei lagagibudagun numa? 20 Aganba huméi le naransehabei, au le Aburemei kóntüra Edomu hama lílana Temán: Íbini mudún ha ñǘbüritimabaña, hanügǘba, lagünrinchawaguba giñe burí fulasu wǘbüguati. 21 Hanarimebei liréin lábürühan Edomu, darime lun lánhingichun múa. Hagúarahaba amuriaha ídemuei, ábame laganbún hagúarahan chülǘ Barana funati. 22 Lábürühaba ágani luagun Bosurá kei aban ágila lau tarüna tuleñu luagun tíliru, wéyume ligía, hadadagaruba wuriburuguna Edomuna kei würi agaridutu.

23 Anihán ñunsu libügürü Damasüku:

«Lauñein busiganu uburugu Amatü luma Arüpádü,

ladüga chülüha uganu wuribati lun.

Buin liña lau anufudei, siñati darangilu lan.

24 Méreeli Damasüku, laransehagubei lun lanurahan.

Gamanihariha anufudei luma íruni lau,

kei aban würi to agaridutu.

25 Uburugu le meha aganbahóuabei luagu,

uburugu le meha gúndaabei, igirúa.

26 Lídanme weyu ligía, herederuba lirahüñü,

ha nibureinhañabaña riwagu múarugu ǘmadarugu,

ani hóunweguba sun wuriburuguna ha lílana.

Au, le Aburemei Suntigabafu ariñagubalin.

27 Nágudubei lubarieirun burí Damasüku,

lagünrinchagubon giñe watu gemeti ligía

lani burí Ben-adadü palasiu».

28 Anihán ñunsu lúmagiñe Aburemei habügürü lani Kedarü türibu hama ábutigu Asoruna, ha lagañeirubaña Nabukodonosoru le lurúeite Babilónia:

«Sará humá, hageindagua luma Kedarü!

Günringua humaña türibu ha luéigiñebaña labouchagüle weyu.

29 Barǘ humaña halügüniña kameyu hawéi,

ariñaga humá houn:

"Anihein lanarime anufudei lidan sun fulasu!"

30 Furí humá éibaagueina lílana Asoru!

Heiba aramudagua!

Au, le Aburemei ariñagubalin.

Ladüga aransehali Nabukodonosoru

le lurúeite Babilónia kóntüra huguya.

31 Au, le Aburemei, nariñaguña hun:

Sará humá, hageindagua hama gürigia ha,

ha abagaridubaña hemenigiñu,

ani darangilañu, mebenariga ani hábugua!

32 Íweruha humaña halügüniña kameyu hawéi

hama sun habiñanigu!

Nabarachaguagüdaaña gürigia ha ásaragubalin hachügü,

nanügüba katei wuribati hawagun luéigiñe sun oubaü.

Au le Aburemei ariñagubalin.

33 Lerederuba Asoru málouga lun súnwandan,

haganóuba ounli áraabuna ñein.

Au, le Aburemei ariñagubalin.

Úadigiaañame aganóutiña ñein,

ni íbini ásügürütiña merederagunbaña ñein».

34 Dan lagumeserunbei Sedekíasi arúeiha Hudá, aba líchuguni Aburemei ñunsu le lun Heremíasi libügürü Elamü:

35 «Nariñahare au le Aburemei Suntigabafu:

Náhalachaguboun ligimaran Elamü to meni lárumate.

36 Nanügüba garabali hawagun gürigia ha

lídangiñe gádürügubei oubaü,

lun lachagaraguniña lidoun sun fulasu,

darime lun úaali lan ageiraü le ñeinhin lumuti machülü hamá aramudagua.

37 Nadadagaragüdübei Elamü hagibugiñe láganiñu,

nóunahaba wuribani luagun,

Nóunahabei nigañi luagun,

nóunahaba wuribu luagun darí lagünrinchagun sunsuinagubei.

Au, le Aburemei ariñagubalin.

38 Níchugubei lálana narúeihan Elamü,

Nadügüba lun hóunwegun lurúeitegu hama lábutigu.

Au, le Aburemei ariñagubalin.

39 Gama lumoun nasansirubei lubunurun Elamü.

Au, le Aburemei ariñagubalin».