1 Aba líchuguni Nabukodonosoru, le lurúeite Babilónia Sedekíasi le liráü Hosíasi lurúeiteme Hudá leweñegua Hekoníasi, le liráü Hoakimü. 2 Gama lumoun ni Sedekíasi, ni ha arúeihabaña luma, ni lílana fulasu, madügüntiña gasu lau uganu le líchugubei Aburemei houn lídangiñe profeta Heremíasi.

3 Aba lóunahani urúei Sedekíasi Hukali, le liráü Selemíasi, luma fádiri Sofoníasi, le liráü Maseíasi ariñaga lun profeta Heremíasi:

—Bafurieida wawagu lun Aburemei le Wabungiute.

4 Madaürǘngili buga Heremíasi, gayaraagili lubeiti léibugun haganagua lílana fulasu. 5 Furihañati buga lisudaranigu urúei Ehiptuna Ehiptugiñe. Dan hasubudirunbalin Kalüdéana ha ageindagubaña luma Herusalén, aba hadisedun ñéingiñe.

6 Ábati ladimurehan Aburemei lun profeta Heremíasi, aba líchugun lúrudu lun lun lariñagun 7 houn óunagüleigu:

—Ariñaga humá lun lurúeite Hudá le óunahabalün álügüdaha numa, luagu lisudaranigu lan urúei Ehiptuna ha yebe ñǘbuinbaña lun híderagunün, giribuha lan Ehiptun. 8 Hagiribuduba Kalüdéana lun hageindagun luma Herusalén, hárügüdübei, ábame háguduni. 9 Nariñaguña hun, au, le Aburemei: Maritagua humá luagu hadiseduba lan Kalüdéana, lugundun mama luba. 10 Íbini anhein hagañeira wuribu hama hasudaranigu Kalüdéana ha ageindagubaña huma guentó, herederame fiúrügü wügüriña sándihaña hádangiñe tidan hakianpun, hásaaruba wügüriña hagía, ábame háguduni uburugu.

11 Dan le hóudiña lubéi súdaragu Kalüdéana Herusaléngiñe ladüga hasubudiruni luagu añate lan lisudaranigu urúei Ehiptuna, 12 aba láfuridun Heremíasi uburugugiñe lun lidin lumúanrugun Benhamín ariha lun lafanreinhóun aban alagan hadan lílana lageira. 13 Gama lumoun dan lachülürünbei luagu Lubenari Benhamín, aba lararamuni aban wügüri gíriti Iríasi, liráü Selemíasi, libari Ananíasi, hábuti óunigihatiña, lariñaga lun:

—Buguya básügüra hamoun Kalüdéana!

14 Lariñaga Heremíasi lun:

—Iyeeni le, másügürünbadina hamoun Kalüdéana!

Gama lumoun meberesegúnti Iríasi lau, aba lárügüdüni, aba lanügüni houn ábutigu. 15 Aba hagañidun ábutigu luma Heremíasi, aba habuleseiruni, aba hadaürüni tidan luban Yónatan, le abürühabei, to hadügüboun furisunme. 16 Aba hanügüni Heremíasi tidoun furisun to guribiniboun, ñein hígirei luagu saragu dan.

17 Aba lariñagun urúei Sedekíasi, lun hanügüni Heremíasi lun. Dan ñéinhali ligibugiñe, aba lálügüdüni aramudaguarügü, lariñaga lun:

—Anihein san uganu lúmagiñeti Wabureme?

Lariñaga Heremíasi lun:

—Anha anihein, anihán uganu ligía: Bábürühaba labun lubafu lurúeite Babilónia.

18 Aba giñe lariñagun Heremíasi lun urúei Sedekíasi:

—Ka san nidurunbei lun urúei, o houn ha agumadihabaña o houn lílana fulasu, hádarunbalina furisunrugun? 19 Hagañagia profetagu ha buga ariñagubaña luagu mageindagunbei lan lurúeite Babilónia huma, ni hama lílana fulasu le? 20 Aganba humana guentó urúei, ayumuraguatina hun lun mígirun humá lunya nanügǘn tidoun luban Yónatan le abürühabei, luéi nounwen ñein.

21 Ábati lariñagun urúei Sedekíasi lun lerederun Heremíasi adaürǘwa tidan tibürürün furisun, lun lan giñe sagü lan weyu hanügün aban fein lun. Ítara liña ladügǘn sun dan le anuhein lubéi fein uburugu. Ítara liña lerederun Heremíasi tibürürünrugu furisun.