1 Ísüraelina, aganba huméi uganu lúmagiñeti Bungiu le, 2 lariñahare Aburemei:

«Mafalara huméi hani híbiri néchanigu hénpulu,

malouchun huguyame lau burí seini siélugiñeti,

kei hadüga néchani hagía.

3 Úati hu lan hechun gürigia ha lun ni kata.

Cháüntiña aban tugudina wewe áraabu,

aba luadigimariduni gagiwerihati tau lichichilin,

4 lárigiñe aba hewendedagüdüni lau pülata luma golu,

aba hádaraguni lau gürabu luéi léiguadun.

5 Ítara haña habungiutegu kei abugahatiña dunuru lidan ichari le ginti;

siñati hadimurehan,

gasu hóuyuahoun ladüga siñati héibugun.

Manufudeda humá hawéi,

lugundun madügüntiña wuribati ni buiti ni ka un».

6 Aburemei, úati ni aban kei buguya.

Wéiritibu, wéiriguti biri ani gabafuti.

7 Kaba manufude buéi,

buguya le harúeite néchanigu?

Lunti inebewa ban.

Hadan sun chu tau hama urúeigu ubouagu,

úati ni aban kei buguya.

8 Ibidiouguati hau súngubei.

Siñati larufudahan murusun wewe ni kata houn!

9 Pülata anügǘti lídangiñe fulasu le gíribei Tárüsisi habungiutegubaña,

luma golu anügǘti lídangiñe fulasu le gíribei Ufasi,

gagiwerihatiña adügübaliña

aba hadaüraguagüdüniña tau gamisa guchu tuma funatu,

háhüchagun gáhüchaguatiña.

10 Aburemei Búngiubei le inarüniti,

Aburemei le wínwanbei, Urúei lun sun dan.

Dan le lagañidun, adadagarati ubóu;

siñá hamuti néchanigu ligañi awanda.

11 (Huguya Ísüraelina, ariñaga humá houn gibe tubungiutegu: «Búngiugu ha madügünbalin sielu luma ubóu, hagumuchaguba ubouagugiñe; meredebei ni aban hádangiñe lábugiñe sielu».)

12 Aburemei adügübalin múa lau lubafu;

derebugugüdalei ubóu lau lichú lau;

tulegualéi sielu lau lualin lichügü.

13 Lau lumalali le ítarabei kei wayuhuru,

ahuuhagüda lumuti duna sielu,

warigüda lumuti dúeri lígirugugiñe ubóu,

durunguagüda lumuti labirihaniga labadinagua huya,

sagá lumuti garabali le ñéingiñe lubéi lareidei.

14 Ibidiouguati hau sun gürigia.

Nibusigarigüda hamuti guáriuagu le adügübaliña:

Iyawaü ha iyeenitiña guáriuagu, ani mabagaritiña;

15 kátaña mebegitiña guáriuagu, nibusigaridünatiña,

lagünrinchagubaña Aburemei danme laguseragüdün.

16 Mítaranti Lubungiute Hakobu kei guáriua hagía,

Lubungiute Hakobu adügübalin sun le aniheinbei!

Anúadira lumuti Ísüraeli keisi lumegen.

Aburemei Suntigabafu líribei.

17 Buguya néchani le geyegua hamaadibubei báganiñu,

budabei bílagu.

18 Lugundun lariñahare Aburemei:

«Nachüüraaña lílana fulasu le diseun guentó.

Níchigaaña lidoun lénrengunga,

ariha náamuga ánhana háluaha».

19 Fugiabu au, lídanñadina günringuaü!

Máraninati niwounun!

Haritaguatina yebe nawandubei lan gáriti le!

20 Günrinwagua nikianpun, tumuwagua sun tagürüga,

fui hamaadina nirahüñü, úaaña!

Úaaña kaba lan adaaraguoun nikianpun,

kaba lanya átuleraguoun tikorutinan.

21 «Ibidiouguati hau hóuniri mudún ha lídanbaña fulasu le;

máluahan hamuti Bungiu.

Ligía mawanserún habéi,

baragua sun habiñanigu.

22 Aganba humá!

Anihánba uganu achülürüti!

Anitén aban ladürürühaniga luéigiñe nórute

le lunbei lígiruni luburugute burí Hudá fulasume mageirawati

le ñeinba lubéi haganawa ounli áraabuna».

23 Aburemei, subudi numuti luagu mama lan wügüri laburemebei libagari,

luagu mabafu lan luagu lisinun.

24 Béibawa lau irichaü, Aburemei;

mama lau bigañi, ladüga bagumuchaguagüdübadiwa.

25 Rariguagüdabei bigañi hawagun néchanigu ha ibidiñehabubaña bun,

ha máluahanbalibu,

ladüga hougua hamaaña lílana lageira Hakobu

ani günringua hamaaña buidu,

aba hígiruni fulasu lidan günringuaü.