1 Lidan ligadürün lirumudiri lagumadihan Hoakimü le liráü Hosíasi, le lurúeite Hudá, aba ladimurehan Aburemei lun Heremíasi, lariñaga lun:

2 —Barüba aban hóuburatu to abürügülei, babürüheime sun le ariñaga náalibei bun libügürü Ísüraeli, Hudá hama híbiri néchanigu lúmagiñe dan le nagumeserúnbei adimureha bun, lidan lidaani Hosíasi dagá uguñe. 3 Fagua danme haganbuni lílana Hudá luagu sun wuribani le naritagubei nóunahan hawagun, hígirei luriban hóuserun, ábame ferudunanani hariban luma hafigoun.

4 Aba lagúarun Heremíasi lun Baruku le liráü Neríasi, aba lariñaguni sun le lariñagubei Aburemei lun, aba labürühani Baruku tidan aban hóuburatu to abürügülei. 5 Lárigiñe, aba lasubudiragüdün Heremíasi lun Baruku:

—Ítara kei le aubei nadariragua nungua siñati nidin litenpulunrugu Wabureme. 6 Bidin lubeimeti luéyuri ayunaruni le lunbei liabin, ábame baliihanu hóuburatu to nabürüdagüdüboun bun, lun haganbuni gürigia hama lílana luburugute burí Hudá ha ñǘbuinbaña ñahoun luganute Aburemei. 7 Fagua hayumuragun lun Aburemei, ígira hameime luriban hóuserun, lugundun hanarimeti igañi le aubei lasiadirei Aburemei wageira.

8 Aba ladügüni Baruku sun le lariñagubei profeta Heremíasi lun: Aba lidin ténpulurugu, aba laliihani luganute Aburemei tídangiñe hóuburatu to buga labürüdüboun.

9 Lidan linefun hati lidan liseingün lirumudiri lagumadihan Hoakimü, le liráü Hosíasi, le lurúeite Hudá, aba lariñawagúniwa lunti lan hayunarun lílana Herusalén ligibugiñe Aburemei kéisirügü ha ñǘbuinbaña lídangiñe amu burí uburugu le lani Hudá. 10 Aba lidin Baruku lidoun tibürürün ténpulu le íñugiñebei luéigiñe ebelaagülei le gíribei Iseri Bena, aba laliihani lererun Heremíasi le bürüwañubei tidan hóuburatu tugía houn sun lílana fulasu, lirumunrugúgiñe Safán le abürühabalin sun le asuseredubei fulasurugu.

11 Aganba lumuti Mikaíasi, le liráü Gemaríasi, le libari Safán sun luganute Aburemei le laliihabei Baruku tídangiñe hóuburatu, 12 aba lidin tidoun luban urúei, lirumunrugun le abürühabalin sun le asuseredubei fulasurugu, ñéinñanu sun agumadihatiña ha íñugutimabaña óundaraguañu: Elisamá le abürühabalin sun le asusereduti fulasurugu, Delaíasi le liráü Semaíasi, Elünatán, le liráü Akübóru; Gemaríasi, le liráü Safán; Sedekíasi le liráü Ananíasi, hama burí amu ábutigu. 13 Aba labahüdaguni Mikaíasi sun le laganbubei dan le laliihanbarun Baruku hóuburatu hagibugiñe gürigia. 14 Aba hóunahani ábutigu Heudí, le liráü Netaníasi, libari Selemíasi, lílawa Kusí, ariñaga lun Baruku lun lanügünu hóuburatu to buga laliihaboun hagibugiñe gürigia houn. Ábati lanügünu Baruku hóuburatu, aba lidin tau houn, 15 aba hariñagun lun:

—Ñuruba, aliihaboun hóuburatu woun.

Aba laliihanu Baruku houn, 16 ítara kei haganbuni, aba haríagun hawouguoun lau anufudei aba hariñagun:

—Gasu wasubudiragüdüni sun le lun urúei.

17 Aba hariñagun lun Baruku:

—Ida liña san babürühani sun le?

18 Lariñaga Baruku houn:

—Heremíasi ariñagubalin sun le nabürühabei tidan hóuburatu to nun.

19 Ábati hariñagun lun:

—Buguya luma Heremíasi, heiba aramudagua, masubudiraléi ni aban halíañadün lan.

20 Aba hígirunu ábutigu hóuburatu tugía lirumunrugu Elisamá le abürühabalin sun asusereduti, aba houdin lúbiñoun urúei asubudiragüdei sun katei lun. 21 Aba lóunahani urúei Heudí anügoun hóuburatu lirumunrugúgiñe Elisamá le abürühati, aba lanügünu Heudí, aba laliihanu ligibugiñe urúei hama sun lánigu ha geyegubaña lau. 22 Kei lidan lubéi linefun hati, tídanñein rumu to lánina lidiliga urúei ligibugiñe régigi lau watu gemeti. 23 Sagü lásurun laliihan Heudí ǘrüwa o gádürü laini, ábaha líbuguni urúei tau aban gusiñu, aba láguruni wáturugun. Ítara liña ladüga darí lágudunu súngubei hóuburatu tuguya. 24 Ni urúei, ni lánigu ha aganbubalin taliihóun hóuburatu, masanditiña anufudei marufudun hagía igarigu. 25 Ayumuraguati yebe Elünatán, Delaíasi luma Gemaríasi lun urúei lun mágudun lanu hóuburatu tugía, gama lumoun madügünti gasu hau, 26 ariñagarügü ligía lun Heraméeli le haduhe urúeigu, lun Seraíasi le liráü Asüriéli luma lun Semaíasi le liráü Abüdéli lun hadaürüni profeta Heremíasi luma Baruku le abürühabei lun. Gama lumoun aba laramuduniña Aburemei luéi.

27 Lárigiñe lágudunu urúei hóuburatu to lauboun dimurei burí le labürüdagüdübei Heremíasi lun Baruku, aba ladimurehan Aburemei lun Heremíasi, lariñaga lun:

28 —Barüyabá aban hóuburatu, babürühayéime sun le buga bürüwañubei tidan to furumiñetu, to láguduboun Hoakimü le lurúeite Hudá. 29 Bariñagame giñe lun: "Lariñahare Aburemei: Gudá bumutu hóuburatu, dáügüdabei Heremíasi luéigiñe labürüdün tidan luagu liábinba lan lurúeite Babilónia agünrinchaguei ageiraü le, lígirei lanme úouga gürigia ni animaalugu lidan. 30 Nariñahare lubeiti bun, Hoakimü, lurúeite Hudá, luagu madügawagunbadibu lan luagu lálana larúeihan Dawidi. Lerederuba búgubu danme hilaadibu ágawei lárouga le wéyuaguna luma lidiliga le áriebuna, 31 ani buguya hau badügawagun hama bánigu ha arúeihabaña buma, nabeichubadün luagu hifigoun. Nábürügüdübei sun wuribani le uágubei nariñaga huagun, le aubei madügün humá gasu, hawagun lílana Herusalén luma hawagun lílana Hudá".

32 Ábayati lanügün Heremíasi ábanya hóuburatu, aba líchugunu lun Baruku le abürühabei lun, aba labürühani sun le lariñagubei Heremíasi lun, le buga bürüwañubei tidan hóuburatu to láguduboun urúei Hoakimü. Bürügüdati giñe Heremíasi amu burí dimurei lanwoun ítarayuma kei burí le abürüdübei furumiñe.