1 Uganu le leresibirubei Heremíasi houn sun huríu ha meha aganóubaña Ehiptu, uburugu burí Migüdólu, Táfünesi Ménfisi luma lóubawagu Suru.

2 —Lariñahare Aburemei Suntigabafu le Lubungiute Ísüraeli: Ariha humaali burí lamiselu le nábürügüdübei luagun Herusalén luma luagun burí líbiri luburugute Hudá. Gádeihali burí guentó, úatiña aganóutiña ñein, 3 luma wuribani le burí hadügübei, ladüga anabagua hamutina lau háhuduragun houn amu búngiugu, águdaha hagía kupali houn; búngiugu ha úmabei mani hamá ni kata, ni hagía, ni huguya, ni hagüchagu. 4 Óunaha numutiña nani profetagu saragu wéiyaasu ariñaga hun, lun madügün humani burí lagübüri katei le aubei magundan nan. 5 Gama lumoun madügüntün gasu nau. Lubaragiñe hamuga hígiruni huriban ábarüga hasigirun águdaha kupali houn amu búngiugu. 6 Ábati liñuragun nigañi, aba lásüdün kei watu gemeti luburuguterugu burí Hudá luma burí lémerirugu Herusalén. Aba lerederun málouga chülǘ lumoun dan le.

7 —Nariñahare lubeiti au, le Aburemei Suntigabafu le Lubungiute Ísüraeli: Ka uagu hanügei óunwenbu wuribani le huouguoun? Ka uagu hadüga lun hóunwegun sun lílana Hudá, wügüriña, würiña, irahüñü, íbini figigiña darí lun merede lan ni aban? 8 Ka uagu hanabaguana lau hóuserun, águdaha huguya kupali houn amu búngiugu ya Ehiptu le ñeinhin lubéi hiabin aganawa? Lau lira, háluahañein hagumuchaguagüdün hungua. Ábame hiabin lun hénpulume lánina ǘnabuguni hadan sun néchanigu ha ubouagubaña. 9 Bulíei humaali san sun wuribani le meha hadügübei hagüchagu, luma burí le hadügübei lurúeitegu Hudá hama hámarigu, luma burí le hadügübei huguya guánarügü hama húmarigu lumúanrugu Hudá luma burí lémerirugu Herusalén? 10 Chülǘ lumoun dan le masansirun humagili higaburi, masandi huguya anufudei magunfulirun huméi narufudahan luma nilurudun le níchugubei hun luma houn hagüchagu.

11 —Ligía nariñagunbei hun, au le Aburemei Suntigabafu, le Lubungiute Ísüraeli: Aranse naali naritagun lun nanügün wuribani huagun luma lun nagünrinchaguni sun Hudá. 12 Nadügüba lun sun lan ha erederubaña hádangiñe lílana Hudá, aba houdin aganawa Ehiptu, lun hagünrinchawagun sunsuinagubei ñein. Sun hagía, lúmagiñe le ñǘraütimagilibei lumoun le wéiyatimahalibei, hóunweguba ladüga wuribu, o ilamaü ábame hasalirun hénpulume lánina íñarawaguni luma ǘnabuguni, ábanbei katei hanufunati le lunbei lasuseredun houn. 13 Nabeichubaña ha aganóutiña Ehiptu kei meha nabeichuni Herusalén lau lamiselu, ilamaü luma sandi. 14 Úabei ni aban hádangiñe fiuraü lílana Hudá ha ñǘdünbaña aganawa Ehiptu erederuti wínwanñu. Íbinime ánhaña abusenra hagiribudun Hudáun lun haganóun ñein, magiribudúnbaña, haweidigia fiu ha aramudagutiña ha esefurutiña lídangiñe wuribu.

15 Hati subudibéi houn luagu águdaha hamá hámarigu kupali houn amu búngiugu, hama würiña ha ñéinbaña, hama huríu ha aganóubaña lidan suru libiti Ehiptu, aba hariñagun lun Heremíasi:

16 —Madügünbadiwa gasu lau uganu le banügübei woun lúmagiñe Aburemei 17 wadügamémebei le waritagubei wadügün. Wágudahamemeba kupali ru wagíame diwéin keisi idewesei tun bungiu to lurúeite sielu, ítara kei wadügüni chülǘ lumoun dan le, kei meha giñe hadügüni wagüchagu hama warúeitegu hama wábutigu luburuguterugu burí Hudá luma burí lémerirugu Herusalén. Ladüga géigintiwa meha saragu, buidu ligía dan woun, miabin ligía lamiselu woun; 18 ánheinti lúmagiñe wígiruni wágudahan kupali luma wedewehan diwéin tun Lurúeite Sielu, úati ni kata wama, ani hilagua hagía wamutuniña lau ilamaü o wuriburugu.

19 Ábaya giñe hariñagun würiña:

—Wagia, adaaguatiwa meha durudia tau tiyawa lurúeite sielu, ru wagía kupali tuma diwéin tun, gama lumoun sun le, lau hagundan wámarigu. Ani wadügamémebei.

20 Ábati lariñagun Heremíasi houn sun wügüriña hama würiña ha óunabubalin ítara:

21 —Haritaguatün san luagu mefén lan buga Aburemei, o bulíei lani luagu águdaha humá kupali houn amu búngiugu luburuguterugu burí Hudá luma lémerirugu Herusalén, huguya, hagüchagu, hábutigu hama sun lílana fulasu? 22 Gama lumoun aba siñaali lan lawanduni Aburemei luriban higaburi, le aubei magundan lan. Ligía günringuaali lubéi hageira uguñe weyu, úouga aganóutiña ñein; ábanhali hénpulu lánina íñarawaguni, aban katei hanufunati. 23 Lamiselu le gádanbalün guentó, lídangiñeti hadagaragüdün houn amu búngiugu, afigouha ítara kóntüra Aburemei, ani ladüga magunfulirun humani larufudahan luma lilurudun, magunfulirun huméi giñe lugumadin.

24 Ariñagati giñe Heremíasi houn lílana fulasu, hóuntima würiña:

—Aganba huméi uganu le lúmagiñeti Aburemei, sun huguya lílana Hudá ha aganóubaña Ehiptu. 25 Lariñahare Aburemei Suntigabafu, le Lubungiute Ísüraeli: "Huguya. Würiña, ariñaga humaali lau hiyuma ani hadügübei. Ariñagatün luagu füramasehadün lan luagu hadagaragüdüba lan tun lurúeite sielu, ani hagunfuliruba lan lau hererun. Buiti, gúnfuli huméi, adüga humeime le hariñagubei! 26 Gama lumoun aganba huméi sun huguya lílana Hudá ha aganóubaña Ehiptu le nariñagubei hun au, le Aburemei: Fiñutina luagu niri, iri le wéirigutimabei, luagu mariñagundigia hamaali lanme Hudaana niri lidan sun Ehiptu, máfiñurunhañame ariñaga: Luagu libagari Aburemei. 27 Lugundun aranseñunuba lun nóunahan lamiselu hawagun. Sun lílana Hudá ha aganóubaña Ehiptu, hagumuchaguba ladüga wuribu o ilamaü. 28 Abahüdǘwarügübaña esefurutiña luéi hóunwegun wuriburugu lun hagiribudun Ehiptugiñe, lun Hudáun. Ítara luba harihini sun ha Hudaabaña, ha lúnbaña hayabin aganawa Ehiptu ka lan ererun agunfulirubei, anhein nererun lubéi lumoun hererun lan. 29 Au, le Aburemei, níchigaali seini le hun keisi aba makü lun hachoururuni luagu lagunfuliruba lan nasiadirunün luagu nabeichagubadün lan lidan ageiraü le: 30 Nederegerubei Ofurá le urúei Ehiptuna háhaburugun láganiñu, ítara kei nederegeruni Sedekíasi le lurúeite Hudá lúhaburugun Nabukodonosoru le lurúeite Babilónia le lágani lánina óunweni".