1 Lidan liseingün hati lídanmeme irumu ligía, lememe ligadürün lirumudiri larúeihan Sedekíasi Hudá, aba ladimurehan profeta Ananíasi, le liráü Asuru, le Gabaónna lun Heremíasi ténpulurugu hagibugiñe fádirigu hama sun lílana fulasu, lariñaga lun:

2 —Lariñahare Aburemei Suntigabafu, le Lubungiute Ísüraeli: "Náhalachagubei lubafu lurúeite Babilónia, 3 ábame nadügün lun lagiribudun sun tílagu ténpulu le lanügübei Nabukodonosoru le lurúeite Babilónia Babilónioun bián irumu lárigiñe le. 4 Nagiribudagüdübei giñe Hekoníasi, le liráü Hoakimü, le lurúeite Hudá lárigoun, hau sun híbiri gürigia ha meha anügǘbaña Hudaagiñe lun Babilónioun. Náhalachagubei lubafu lurúeite Babilónia. Au, le Aburemei ariñagubalin».

5 Aba lariñagun profeta Heremíasi lun profeta Ananíasi hagibugiñe fádirigu hama gürigia ha ñéinbaña ténpulurugu:

6 —Adügadügü láamugei Aburemei katei le! Gúnfuligüdadügü láamugei Bungiu dimurei le bariñagubei, lun giñe lagiribudun tílagu ténpulu hama sun ha anügǘbaña Babilónioun Babilóniagiñe! 7 Gama lumoun aganbabéi le, le nariñagubei bun luma houn sun lílana fulasu: 8 Profetagu ha meha lánina binadu dan, lubaragiñe wágurahouniwa au buma, adimurehatiña meha luagu wuribu, ilamaü luma sandi kóntüra saragu néchanigu luma arúeihani wéinamuti. 9 Gama lumoun dan le ladimurehan aban profeta luagu ñeinbei lan lubuidun dan, ánheingubeirügü asusereda le lariñagubei, ligíarügüba lachoururún luagu Aburemei lan óunahabalin.

10 Ábati lagidaruni Ananíasi yugu luéigiñe ligiina Heremíasi, aba láhalachaguni, 11 ariñageina ligía hagibugiñe sun lílana fulasu:

—Lariñahare Aburemei: «Ítara luba nadüga bián irumu lárigiñe le, nagidarubei lubafu Nabukodonosoru le lurúeite Babilónia hagiinawagugiñe sun néchanigu, ábame náhalachaguni».

Aba lidin Heremíasi. 12 Átiri dan lárigiñe lagidaruni Ananíasi yugu ligiinagiñe Heremíasi, aba ladimurehan Aburemei lun Heremíasi, lariñaga lun:

13 —Beiba, bariñagame lun Ananíasi luagu nariñahare lan au, le Aburemei: Halaguatibu aban yugu le lauti wewe, gama lumoun aransedina aban yugu lauti gürabu. 14 Lugundun nariñahare au, le Aburemei Suntigabafu, le Lubungiute Ísüraeli: Rúhadina aban yugu lauti gürabu hagiinawagu sun néchanigu lun heseriwidun keisi idamuni lun Nabukodonosoru, le lurúeite Babilónia. Íbini animaalugu áraabuna, ru naaña labun lubafu.

15 Ábati lariñagun Heremíasi lun Ananíasi:

—Aganbabá Ananíasi! Mama Aburemei óunahabalibu, rúhadibu aban emenigini málati houn gürigia ha. 16 Ligíati lariñahare lubéi Aburemei: «Anha, nóunahabadibu, gama lumoun lun bagumuchagun ligibuagugiñe ubóu le. Bóunweba lidan irumu le, ladüga adügaadibu lun hagarabaagun gürigia nuagun lau bererun».

17 Aba lounwen profeta Ananíasi lidan lisedün hati lidan irumuméme ligía.