1 Lidan ligadürün lirumudiri larúeihan Hoakimü, le liráü Hosíasi Hudá, aba líchugun Aburemei aban uganu lun Heremíasi habügürü sun lílana Hudá. Ligía bugaha furumiñeti lirumudiri larúeihan Nabukodonosoru Babilónia. 2 Aba lasubudiragüdüni profeta Heremíasi uganu ligía houn sun lílana Hudá luma houn lílana Herusalén. Lariñaga:

3 —Lúmagiñe litareisin lirumudiri larúeihan Hosíasi le liráü Amón Hudá, darí lumoun dan le wein-ǘrüwa irumu guentó lúmagiñe ladimurehan Aburemei nun, aba nadimurehan hun saragu wéiyaasu; gama lumoun madügüntün gasu nau. 4 Ani lau sun saraguhali lan wéiyaasu lóunahaniña Aburemei lánigu profeta humoun, madügüntün gasu, maha huguya haganbun. 5 Ariñagaaña profetagu hun: "Ígira huméi luriban hóuserun; ítara luba gayara lan habagaridun lidan fulasu le líchugubei Aburemei hun luma houn hagüchagu lun sun dan. 6 Mafalara humá amu búngiugu, meseriwida humá houn. Magañidagüda huméi Aburemei eseriwida houn búngiugu ha guánarügü hadüga, ábame móunahan lan ni murusun wuribani huagun". 7 Lariñahareti Aburemei hun guentó: "Máhatün hadügün gasu nau; gáñigüda humaadina eseriwida houn búngiugu ha guánarügü hadüga, hadügüña wuribani húniwagua".

8 —Ligía lariñagunbei Aburemei Suntigabafu: "Kei madügün hubéi gasu lau neweridihan, 9 nagúara houn sun gürigia ha nóruteruguna luma lun nuwügürin Nabukodonosoru le lurúeite Babilónia lun hayabin lun hábürühan luagun fulasu le luma hawagun sun lílana luma hawagun sun ha besinagubaña huma. Nagünrinchagubadün sunsuinagubei. Nadügübadün ni kátame lun sun dan, nadügübadün káteime le hanufunati. 10 Nadügüba lun maganbúndigiaali lanme uremu lánina fedu luma ugundani hadan, ni leremuna maríei, ni lumalali dübü le amuligülei, ni lun larihínya larugoungadüna lanpu. 11 Lagünrinchaguba fulasu le, lárigirugurügaalime eredera. Lábugiñebaña lilurudun lurúeite Babilónia gürigia ha luagu ǘrüwa-wein-diisi irumu. 12 Danme lagunfulirun ǘrüwa-wein-diisi irumu ligía, ábame nafayeiragüdüni lurúeite Babilónia luagu lifigoun hau sun lumutuniña, le hageira Kalüdéana, ábame nagünrinchaguni lun sun dan au, le Aburemei, ariñagubalin. 13 Nábürügüdübei sun le uágubei nariñaga luagun fulasu le, sun le bürüwañubei tidan líburu to. Sun le ariñaga láalibei Heremíasi lidan niri kóntüra sun néchanigu. 14 Heseriwiduba giñe houn néchanigu luma houn urúeigu gabafutiña. Ítara luba nafayeiruniña luagu le hadügübei".

15 Lariñahare Aburemei, le Lubungiute Ísüraeli nun:

—Arihabéi weru le buin tau diwéin to lánina nigañi. Barüboun, ábame bátagüdünu houn sun néchanigu le ñéinhinba lubéi nóunahabu. 16 Danme le hátunu, ábame hagumeserun ewereha, ábame kéinaba lálülüdün hau ladüga wuribu le lunbei nóunahani hawagun.

17 Aba nanügünu diwéin lúhaburugugiñe Aburemei, aba nátagüdünu houn sun gürigia ha úmounbaña lóunahana. 18 Guragüda numuti lun Herusalén luma lun burí luburugute Hudá hau sun urúeigu hama ábutigu, lun hagünrinchagun, lun lárigirugurügü lan eredera, katei hanufunati, keisi hénpulu lani íñarawaguni le, ítaramemegiña darí lumoun dan le. 19 Guragüda numutu giñe lun urúei Ehiptuna, hau sun lánigu, 20 luma houn ámuñegueina rasa gürigia ha ñéinbaña; houn sun lurúeitegu Usu hama lóubawaguna hageira Filistéana: Asükalón, Gasa, Ekürón luma le erederubei lídangiñe Asüdódu; 21 lun Edomu, Moabü luma Amón; 22 houn sun lurúeitegu Tiru luma Sidón; houn sun urúeigu ha lurúeitegu fulasu burí le lani barana Mediteraniu; 23 houn türibu ha lani Dedán, Temá, luma Busu, luma houn gürigia ha ásaragubalin hachügü; 24 houn sun lurúeitegu Arawia; houn sun harúeitegu ámuñegueina hawuyeri gürigia ha aganóubaña lidan fulasu mageirawati; 25 houn sun lurúeitegu Simürí, Elamü luma Media; 26 houn sun lurúeitegu nórute, dandu ha yarafaguabaña keisi ha díseguabaña hawariuagua. Houn sun lurúeitegu sun ubóu, lurúeite Babilónia, ligíaba ata agumuhóuni.

27 Lárigiñe aba lariñagun Aburemei nun:

—Ariñagabá houn luagu nariñahare lan houn, au, le Aburemei Suntigabafu, le Lubungiute Ísüraeli, lun hátagun darí habacharuadun, ewereha hagíame, heigua hagíame múarugun lun másaarunhaña lan ladüga wuribu le lunbei nóunahani hawagun. 28 Ánhaña maha hanügünu diwéin búmagiñe lun hátunu, bariñagame houn: "Lariñahare Aburemei Suntigabafu: Lau sun luwuyeri, hátuboun. 29 Ladüga nagumesera óunahei abeichúni hawagun lílana uburugu le uágubei liridúa niri. Haritaguatün san luagu mabeichúnbadün lan? Habeichúba, ladüga nóunahaali wuribu haganaguóun sun lílana ubóu. Au, le Aburemei Suntigabafu, ariñagubalin".

30 —Buguya, Heremíasi, subudigüdabéi burí katei le houn lau niri:

"Aganbagüda lumuti Aburemei lumalali le wayuhuru íñugiñe,

lídangiñe fulasu sánduti le ñein lubéi laganawa.

Lagúarahaba kóntüra lánigu

kei hagúarahan ha adügühabalin beibei.

31 Aganbúati areinchuni darí lumoun lébeha ubóu,

lugundun laguseragüdübaña Aburemei néchanigu

laguseragüdübaña sun gürigia,

lasiadirubaña ha salufuribaña lun óunweni.

Aburemei ariñagubalin".

32 Lariñahare Aburemei Suntigabafu:

"Liábinba lamiselu houn gürigia aban lárigi aban;

ladagaruba aban lanarime dan lúmagiñe luéigiñe lígirugu ubóu".

33 Hame láfaragun Aburemei lidan weyu ligía,

herederuba riwagu múarugu lúmagiñe lagumeseha ubóu lumoun lébeha.

Úabei ni aban ayahuti hárigi,

mabudahóunbaña lun hábunahoun;

herederuba múarugu kei hádiga animaalu.

34 Hagúaraha, huguya hóuniri mudún,

hagúaraha lau igarigu!

Huguya le adundehabaliña ibiñanigu,

abalabahóua humá múarugu!

Chülüha lóurate áfarahani,

ani huguya háfarawaguba keisi mudún dibunetiña.

35 Siñabei hanurahan hóuniri mudún,

siñabei hesefurun ha adundehabaliña ibiñanigu.

36 Agúarahatiña hóuniri mudún,

wáguatiña ha adundehabaliña ibiñanigu lau igarigu,

ladüga lagünrinchaguni Aburemei sagadi le heigan habiñanigu.

37 Aba lagañidun Aburemei,

aba lagünrinchaguni lubuidun burí hachari.

38 Furiti kei aban liñún lúbiñegiñe aba lagünrinchaguni hageira,

ladüga ladurangun ligañi Aburemei aba lóunahan aban lanarime wuribu hawagun.